राष्ट्रिय मावि विचैपुरके ६३औं वार्षिकोत्सव
प्रदेश सरकार शिक्षा ओर लगानी लगैले बाः मुख्यमन्त्री शाह
पहुरा समाचारदाता
धनगढी, ६ फागुन । कैलाली जिल्लाके कैलारी गाउँपालिका वडा नम्बर २ उजलीशेम्रामे रहल राष्ट्रिय मावि विचैपुरके ६३ औं वार्षिकोत्सव तथा अभिभावक दिवस मंगरके रोज सम्पन्न हुइल बा ।
विद्यालय व्यवस्थापन समिति अध्यक्ष नविनकुमार बोहराके अध्यक्षतामे हुइल कार्यक्रममे सुदूरपश्चिम प्रदेश सरकारके मुख्यमन्त्री कमलबहादुर शाह रहल रहिट । कार्यक्रममे सम्बोधन करटी उहाँ प्रदेश सरकारसे शैक्षिक क्षेत्रमे लगानी बह्राइल बटैले बटै । उहाँ कहलै, ‘ढेर विद्यालय भौतिक पूर्वाधारके आवश्यकता रहे । कलेसे बनल विद्यालय जिर्ण हुके जोखिमयूक्त रहिट । अनिवार्य आवश्यकता रहल ठाउँमे लौव भवनके निर्माण हुइल बा ।’
सक्कु ठाउँमे एकचोटे विद्यालय भवन बनाई नैसेकल हो, ‘जहाँ बनैही पर्ना बा कलेसे क्रमागत रुपमे बजेट विनियोजन करे सेक्जाई । ओस्टेक करके उहाँ प्रदेशके बजेटहे वित्तिय हस्तान्तरण करके स्थानीय सरकारहे डेहे सेक्ना म्ुख्यमन्त्री शाह बटैलै । वार्षिकोत्सवके अवसरमे विद्यालयसे निर्माण करल छात्रावास भवनकेफे मुख्यमन्त्री शाह उदघाटन करलै ।
कार्यक्रमके विशिष्ट पहुना कैलारी गाउँपालिका अध्यक्ष राजसमझ चौधरी यी विद्यालयके आवश्यकता अनुसार पालिका सहयोग करल बटैलै । उहाँ कहलै,‘यी विद्यालयमे विद्यालय भवनके आवश्यकता रहे । ओकर निर्माण सुरु हुइल बा । एक जाने शिक्षकके आवश्यकता रहे । यहाँ शिक्षकफे पठैना निर्णय हुइल बा ।’कैलारी गाउँपालिकासे शिक्षा, स्वास्थ्य ओ किसानहुकनके माग अनुसार कृषि क्षेत्रमे विशेष जोर डेहल बटैलै ।
कार्यक्रममे विशिष्ट पहुना जिल्ला समन्वय समिति कैलालीके सभापति टिकाकुमारी चौधरी भुल आपन अधिकारमे रहल जटरा सहयोग कैना प्रतिवद्धता जनैली ।
कार्यक्रममे वडा नम्बर २ के वडा अध्यक्ष विकास चौधरी विद्यालयमे पूर्व ओर कटैनी लडियाके कटान हुइटी रहल ओरसे तटबन्धके माग करल रहिट । ओस्टेक करके सुर्मी नाला बढैपुर सडक निर्माणमे ढिलाई हुइटी रहल ओरसे प्रदेश सरकारके ओर चासो देखाडेना आग्रह करलै ।
कार्यक्रममे विद्यालयके प्रअ जीतबहादुर रावत विद्यालयके वार्षिक प्रतिवेदन प्रस्तुत मुख्यमन्त्री शाहहे डेना ज्ञापनपत्र सुनाइल रहिट । कलेसे उ ज्ञापनपत्र विद्यालय व्यवस्थापन समिति अध्यक्ष नविन बोहरा हस्तान्तरण करल रहिट । कार्यक्रममे कैलारी गाउँपालिका वडा नम्बर ३ के वडा अध्यक्ष सन्तराम चौधरी, वडा–६ के वडा अध्यक्ष प्रेमबहादुर चौधरी, राजनितिक दलके प्रतिनिधि, बुद्धिजिवी, अभिभावकहुकनके सहभागिता रहे ।
कार्यक्रममे विद्यालयहे सहयोग करुइया संघ, संस्था, पूर्व शिक्षक, भवन निर्माण उपभोक्ता समिति, शैक्षिक तथा वार्षिकोत्सवके अवसरमे हुइल खेलकुदमे सहभागि विद्यार्थीनहे सम्मान कैगिल बा ।
