धनगढीमे फागुन ८ गतेसे लग्ना सीप तथा रोजगार मेलाके तयारी पुरा

पहुरा समाचारदाता
धनगढी, ७ फागुन । धनगढीमे फागुन ८ गतेसे सीप तथा रोजगार मेला शुरु हुइ लागल बा ।

धनगढी उपमहानगरपालिकाके आयोजनामे हुइ लागल मेलाके तयारी पुरा हुइल बुधके रोज पत्रकार सम्मेलन मार्फत जानकारी कराइल बा । उपप्रमुख कन्दकला राना मेलाके तयारी पुरा हुइल जानकारी डेली । उपमहानगरपालिकासे १८ से ४० बरस युवाहुक्रनके लाग स्वरोजगार हुइना सहयोग पुगैना टमान ८ विधामे २९ मेरके तालिम डेहे लागल उहाँ बटैली । उहाँ एक हजार ४० जनहनहे तालिम डेहे लागल फेन जानकारी डेली ।

तालिम तथा रोजगार व्यवसायी महासंघ लगायत टमान संघसंस्थासँके सहकार्यमे मेला आयोजना हुइ लागल बा । मेलामे सहभागी हुइक लाग चारहजार ८३० जनहनके आवेदन परल तालिम तथा रोजगार व्यवसायी महासंघ सुदुरपश्चिमके अध्यक्ष प्रमोद पाठक जानकारी डेलै ।

मेलाके लाग सुदूरपश्चिमके सक्कु स्थानीय तहसे युवाहुक्रे आवेदन डेहल रहिट । उ मध्ये फोनसे ओ प्रत्यक्ष बोलाके अन्तरवार्ता लेके तालिमके लाग छनौट करल पाठक बटैलै ।

सुदुरपश्चिम प्रदेशके ९ जिल्लाके ४७ पालिकासे आवेदन अइलेसे फेन आब ३९ पालिकाके एकहजार ४० जनहनहे तालिम डेना उहाँ जानकारी डेलै ।

विल्डिङ पेन्टरके तालिमके लाग २५ सिट, पुरोहितके लाग २५, वेटरमे ५०, टायल मार्बल फिक्स्चर तालिमके लाग ५०, फेसन डिजाइन, एडभान्स व्युटिसियन, लेखा व्यवस्थापन तालिम, एडभन्स टेलरिङ, कफी वारिस्ता लगायत तालिमके लाग कोटा निर्धारण करल रहे ।

उहे छनौट हुइल युवाहे तालिममे सहभागी हुइना धनगढी उप–महानगरपालिकाके मेयर गोपाल हमाल बटैलै । तालिमके लाग छनोट हुइल युवाहे एक महिनासम निःशुल्क तालिम डेजैना बा । तालिम ओराइलपाछे स्वरोजगार बनक लाग अभिमुखीकरण तालिमसमेत डेजैना बा ।

४० दिनसम चल्ना तालिममे युवाहे स्वरोजगार तथा आत्मनिर्भर बनाइक लाग बजारके माग अनुसार सीप सिखाके दक्ष बनैना, स्वदेशमे रोजगारके अबसर पैना मेरके दक्ष बनैना, साथे बाहर जाइ चहुइया युवाहे समेत दक्ष बनाके दक्षताके अभावमे विदेशमे असुरक्षित ओ न्युन ज्यालामे रोजगारी करे पर्ना बाध्यता समेत हट्ना उपमहानगरपालिकाके अपेक्षा रहल बा ।
ओस्टके मेलामे युवाहे दक्ष बनाके स्वउद्यमी बन्ना ओ स्र्टाटअप व्यवसायके लाग उत्प्रेरित कैना लगायतके लक्ष्य रहल मेयर हमाल बटैलै ।

धनगढी उपमहानगरपालिका वडा नम्बर १ स्थित खुला मञ्चमे आयोजना हुइना मेलाके उद्घाटन नेपाल सरकारके उद्योग, वाणिज्य तथा आपुर्ति मन्त्री दामोदर भण्डारी कैना जनाइल बा । दिनके १ बजे उद्घाटन हुइना मेलामे सक्कु जनहनहे सहभागिताके लाग उपमहानगर अपिल करले बा ।