धनगढीमे सीप तथा रोजगार मेला सुरु

सीप मेलाहे राष्ट्रिय अभियानके रुपमे आघे बह्रैना जरुरी

पहुरा समाचारदाता
धनगढी, ७ फागुन । उद्योग वाणिज्य तथा आपूर्ति मन्त्री दामोदर भण्डारी सीप तथा रोजगार मेलाहे राष्ट्रिय अभियानके रुपमे आघे बह्रैना जरुरी रहल बटैले बटै ।

धनगढी उपमहानगरपालिकाके आयोजना तथा टमान संघसंस्थाके सहकार्यमे धनगढीमे हुइटी रहल सीप तथा रोजगार मेलाके उद्घाटन कैटी मन्त्री भण्डारी ओइसीन बटाइल हुइट ।

‘हमार यहाँके दक्ष जनशक्ति बाहर जैना ओ हम्रे बाहरसे यहाँके लाग लाने पर्ना अवस्था रहल बा’, उहाँ कहलै, ‘हमार यहाँ कत्रा जनशक्ति चाहल बा, उहीहे मापन कैके इ मेरके मेलाहे राष्ट्रिय अभियानके रुपमे आघे बह्रैना आघे बह्रैना जरुरी रहल बा ।’
सीप तथा रोजगारके लाग सरकारी तथा गैरसरकारी संघसंस्था टमान तालिम तथा अभिमुखीकरण लगायत कैटी आइल बटैटी उहाँ आब इ मेरके तालिमहे एकीकृत राष्ट्रिय ढाँचामे फेन आयोजना तथा सञ्चालन करे पर्ना जोड डेहल रहिट ।

यरक साथे मन्त्री भण्डारी दक्ष जनशक्ति उत्पादन करक लाग सीप तथा रोजगार मेलाके समयावधि एक महिना प्रयाप्त नैरहल कहटी समयावधि फेन हेरफेर करे पर्ना औँल्याइल रहिट ।

सुदूरपश्चिम प्रदेश सरकारमे भुमि व्यवस्था तथा कृषि सहकारी मन्त्री विरबहादुर थापा प्रदेश सरकारसे स्वदेशमे रोजगारी करे चाहल यूवाहे सहयोग कैना तयार रहल बटैलै । उहाँ कहलै, ‘पहाडमे रहल खाली जमिनहे भाडा लेके तरकारी खेती करलेसे ओकर भाडा प्रदेश सरकार तिरडेना ओ यहाँसम ल्यन्ना व्यवस्था मिलाई सेक्जाई ।’

कार्यक्रममे पूर्वमन्त्री तथा प्रदेश सभा सदस्य माननीय प्रकाश बहादुर देउवा, पूर्व मन्त्री रमेश धामी, प्रदेश सभा सदस्य धर्मराज पाठक नेता मन नैपरलेसे नेता बडल्ना मने यूवाहुकनके अपने देश छोरके और देशमे रोजगारीके लाग नैजैना आग्रह करलै ।

धनगढी उपमहानगरपालिकाके नगर प्रमुख गोपाल हमाल हरेक नेपाली यूवाहे आ अपन ठाउँसे सीप लेना यूवाहे आघे सारेपर्ना बटैलै । काठमाण्डौमे पहिले अइसिन मेला लगैले रहे,’ उहाँ कहलै –‘हमार यहाँफे सुरु हुइल बा । यी मेरिक सीप तथा रोजगार मेला प्रत्येक स्थानीय तह ओ प्रदेश सरकार नेतृत्व लेना जरुरी बा ।’

धनगढी उपमहानगरपालिकाके उपप्रमुख कन्दकला राना स्वागत मनतब्य रख्टी उपमहानगरपालिकासे १८ से ४० बरस युवाहुक्रनहे ८ विधामे २९ मेरके तालिम डेहे लागल जानकारी कराइल रही । उहाँ सुदुरपश्चिम प्रदेशके ९ जिल्लाके ४७ पालिकासे आवेदन अइलेसे फेन आब ३९ पालिकाके एकहजार ४० जनहनहे तालिम डेना उहाँ जानकारी डेहल रही ।
रोजगार मेलामे वेल्डिङ, पुरोहित, वेटर, टायल मार्बल फिक्स्चर, फेसन डिजाइन, एडभान्स व्युटिसियन, लेखा व्यवस्थापन तालिम, एडभन्स टेलरिङ, कफी वारिस्ता लगायत तालिम डेना जनाइल बा ।

४० दिनसम चल्ना तालिममे युवाहे स्वरोजगार तथा आत्मनिर्भर बनाइक लाग बजारके माग अनुसार सीप सिखाके दक्ष बनैना, स्वदेशमे रोजगारके अबसर पैना मेरके दक्ष बनैना, साथे बाहर जाइ चहुइया युवाहे समेत दक्ष बनाके दक्षताके अभावमे विदेशमे असुरक्षित ओ न्युन ज्यालामे रोजगारी करे पर्ना बाध्यता समेत हटैना उपमहानगरपालिकाके लक्ष्य रहल बा । ओस्टके मेलामे युवाहे दक्ष बनाके स्वउद्यमी बन्ना ओ स्र्टाटअप व्यवसायके लाग उत्प्रेरित कैना लगायतके लक्ष्य रहल बा ।

तालिम तथा रोजगार व्यवसायी महासंघ सुदुरपश्चिमके अध्यक्ष प्रमोद पाठकके अध्यक्षतामे हुइल उद्घाटन समारोहमे नगरप्रमुख गोपाल हमाल, जनप्रतिनिधी, सरकारी तथा गैरसरकारी संघसंस्थाके प्रतिनिधी, सरोकारवाला निकाय लगायतके उपस्थिति रहल रहे ।