नेपाल मगर संघसे फागुन १५ गते स्थापना तथा एकता दिवस
पहुरा समाचारदाता
धनगढी, ११ फागुन । नेपाल मंगर संघसे ४३औं स्थापना दिवस धनगढीमे मनैना जनैले बा ।
संघसे ४३औं स्थापना तथा एकता दिवस यिहे फागुन १५ गते धनगढी उपमहानगरपालिका वडा नम्बर ५ तारानगरके थारु देउथानमे मनैना हुइल हो । सुदूरपश्चिम प्रदेश सरकारसे मगर समुदायहे नैचिन्हल ओरसे पहिचानबारे जानकारी डेहक लाग टमान कार्यक्रमके आयोजना स्थापना तथा एकता धनगढीमे मनाई जैटी रहल नेपाल मगर संघ कैलालीके अध्यक्ष दलबहादुर घर्तीमगर जानकारी डेलै । उहाँ फागुन १५ गते ११ बजे धनगढीके चौराहा ओ गुरही चौकसे विविध मौलिक झाँकी सहित धनगढी परिक्रमा कैना बटैलै ।
दुपहर १२ बजे कार्यक्रम स्थल तारानगरके थारु देउथानमे सुदूरपश्चिम प्रदेशके मुख्यमन्त्री कमलबहादुर शाहसे कार्यक्रम उदघाटन हुइना जानकारी करैलै ।
नेपाल मगर संघ सुदूरपश्चिम प्रदेशके अध्यक्ष कमलबहादुर पुन मगर यी वर्ष स्थापना दिवस मगर समुदायके पहिचान ओ टमान मागसहित मनाई जैटी रहल बटैलै ।
उहाँ राज्यके हरेक निकायमे मगर समुदायके सामानुपातिक समावेशी प्रतिनिधित्वके ग्यारेन्टी, भाषिक समानता, सक्कु खाले विभेदके अन्त्यके लाग राज्यहे दवाव डेना उद्देश्यसहित स्थापना दिवस मनैना बटैलै ।
स्थापना दिवसके अवसरममे लिगलिगे दौड, नौमति बाजा, झाँक्री विधी, सारङगी हाता, मारुनी नाँच, भुमे नाँच, पैसरी नाँच, सोरठ्ठी नाँच, कौडा नाँच लगायतके सांस्कृतिक प्रस्तुती समेत रना जनैले बा ।
मगर समुदायसे यी दिनहे भौतिक भेषभुषा, भाषा, सामाजिक, सास्कृतिक, धार्मिक, शैक्षिक ओ आर्थिक पक्षमे समिक्षा, भेटघाट ओ एकताके रुपमे मन्टी आइल बा ।
इतिहासमे अपने अलगे रहल मगर समुदाय विगत चार शतााब्दी आघेसे कथित आधुनिक नेपालके विस्तारपाछे राज्यके मुलधारसे विस्थापित हुइटी आइल बा ।
वि.स. १६१६ पाछेसे प्राकृतिक स्रोत, जल, जंगल, जमिन, खानी ओ व्यापारिक क्षेत्र उप्परके अधिकार ओ राज्यके प्रशासनिक, राजनितिक, सामाजिक, सांस्कृतिक, भाषिक, शैक्षिक अधिकारसे बञ्चित करल संघके प्रदेश अध्यक्ष पुनमगर जनैलै ।
समतामुलक संरचनामे आधारित मगर समुदायके सामाजिक संरचना अतिक्रमित हुइल बा । नेपाल ओ नेपालीके मुक्ति ओ स्वतन्त्रताके लाग जहानिया राणा शासनके विरुद्धमे मोर्चा बन्दी, विद्रोह करके राणा शासक जंग बहादुर राणा विरुद्ध प्रथम सहिद विर योद्धा स्वर्गिय लखन थापामगरके अगुवाईमे हुइल रहे । वि.स. १९३३ साल फागुन २ गते गोरखा जिल्ला काहुलेभंगारमे शासक जंग बहादुर राणाके गुलामीहुक्रे उहाँक हत्या करल रहिट । नेपालके जनगणना २०७८ अनुसार नेपालके कुल जनसंख्या २ करोड ९१ लाख ९२ हजार ४८० मध्ये मगर समुदाय केल २० लाख १३ हजार ४९८ अर्थात ६.९ प्रतिशत रहल विल्गाइठ । मगर जातिके सुदुरपश्चिम प्रदेशमे ५२ हजार ७९७ अर्थात २.६ प्रतिशत जनसंख्या रहल संघ जनैले बा ।
जिल्लागत अनुसार कैलालीमे ११ हजार २४०, डोटीमे ७ हजार २७५, कञ्चनपुरमे ६ हजार ९६४, डडेल्धुरामे २ हजार १५३, बाजुरा ५७, बझाङमे ७१, अछामम १ हजार ६८१, दार्चुलामे २३० ओ बैतडीमे १२६ रहल तथ्याङक डेखैले बा ।
नेपाल मगर संघ कैलाली मगर समुदायके भेषभुषा, भाषिक, सांस्कृतिक, समाजिक, आार्थिक, शैक्षिक रुपसे सचेतना करैटी विकृतिहे हटैटी समृद्ध मगर समाज निर्माणके लाग दस्तावेजीकरण करैटी टमान कार्यक्रम करटी आइल बा ।
फागुन १५ गते मगर स्थापना दिवस, माघी मिलन, पुष पन्ध्र, भुमे पर्व, प्रथम शहिद लखन स्मृति दिवसलगाएत टमान जनचेतनाके कार्यक्रम करटी आइल संघ जनैले बा ।
