भुर्काभुर्की सामुदायिक वनके १२औ वार्षिक साधारण सभा निम्जल
पहुरा समाचारदाता
पहलमानपुर, १२ फागुन । कैलालीके घोडाघोडी नगरपालिका वडा नम्बर १० लठहियामे रहल भुर्काभुर्की सामुदायिक वन उपभोक्ता समुहके १२औ वार्षिकोत्सव साधारण सभा तथा सार्वजानिक सुनुवाई सोम्मारके सम्पन्न हुइल बा ।
समुहके अध्यक्ष मोहनलाल जोगीके अध्यक्षतामे हुइल कार्यक्रममे वर्का पहुना सिएफसीसी पहलमानपुरके अध्यक्ष पुष्कलबहादुर वम रहल रहिट । कार्यक्रममे उहाँ एक परिवार एक सामुदायिक वन ओ सामुदायिक वनके सेवा पाइक लाग कार्यालयमे सूचना निकारल हेरे अइना आग्रह करलै ।
विशिष्ट पहुना घोडाघोघोडी १० के वडा सदस्य जालुराम चौधरी वनुवा भिटर रहल जीवजन्तुहे बचाइ सेकलेसे केल वनुवा बचल अर्थ लग्ना बटैलै ।
सव डिभिजन वन कार्यालय सुखडके वन प्राविधिक जुगराम चौधरी वनुवा लेहेक खोज्ना मने संरक्षण करे नैखोज्ना डेखल ओरसे सुधार करेपर्ना आग्रह करलै । कार्यक्रममे समुहके पूर्व उपाध्यक्ष गगन अधिकारी सामुदायिकप्रति सक्कु जानेक अपन्त्व हुइलेसे केल वन संरक्षण हुइना बटैलै ।
अमर शहिद आवि विद्यालयके व्यवस्थापन समितिके अध्यक्ष धनिराम चौधरी अपन बाल बच्चा जस्टे हेरविचार नैकरटसम बनुवा बचाइ नैसेक्ना बटैलै ।
स्वागत मन्तव्य चोरी शिकारी नियन्त्रण दल सयोजक बलबहादुर सुनार करल रहिट । कार्यक्रम सञ्चालन समूहके सचिव चन्द्रबहादुर सिंह ओ २३ लाख १० हजार ४ सय ४६ छयालिस रुपैया बराबर आय व्यय सुनाइल रहिट ।
