ग्रामीण भेगके स्कूलके बालबालिकाहुकनहे शैक्षिक सामाग्री हस्तान्तरण कैटी
पहुरा समाचारदाता
धनगढी, १३ फागुन । धनगढी उपमहनगरपालिकाके नगर प्रमुख शैक्षिक कोषमे टमान सहयोगी संघसस्था ओ व्यक्तिहुकनके सहयोगमे ५९ हजार ४० हजार ७५० रुप्या नगद जम्मा हुइल बा ।
शैक्षिक सुधार कोषसे नमूना विद्यालय निर्माणके लाग कार्य हुइटी रहल ग्रामीण क्षेत्रके ५ ठो विद्यालयके (भवानी माध्यमिक विद्यालय धनगढी –९, सिद्धनाथ माध्यमिक विद्यालय धनगढी –१२, चन्द्रोदय माध्यमिक विद्यालय धनगढी –१८, बेहडा बाबा माध्यमिक विद्यालय धनगढी –१६ ओ ठेकराज माध्यमिक विद्यालय धनगढी –११) बालिका (छात्रा)हे सहयोग प्राप्त हुइल रकमसे शैक्षिक सामाग्री खरिद करके (कमीज, पाईन्ट, सुइटर, ट्रयाक सुट, टिसर्ट, दुई जोर करिया ओ उज्जर जुता, दुई जोर नीला ओ उज्जर मोजा, झोला ) हस्तान्तरण कैटी रहल धनगढी उपमहानगरपालिकाके नगर प्रमुख गोपाल हमाल जनैलै । जम्मा ११ सय ८३ जाने छात्राहुकन विद्यालय ड्रेस वितरण कैना उहाँ जनैलै ।
ग्रामीण भेगके खेतीपाती नैरहल रोगजारी नैहाके जीवन यापन कैना कर्रा रहल जौन बालबालिका सामुदायिक विद्यालयमे पह्रठै । जे विद्यालयके ड्रेस, शैक्षिक सामाग्री किन्ना पैसा नैहुइना, विद्यालय जाईबेर हिनताबोध हुइना, टमान कारणसे ओ विशेष करके छाईहुक्रे बाबक पैन्ट घालके विद्यालय अइना, डोरीके बान्धके अइना यी सक्कु बाट सुनसेकलपाछे टमान बैंक तथा संस्थासे अनुरोध करलपाछे सहयोग प्रदान हुइल उहाँ जनैलै ।
सहयोग करुइया संस्थामे शिखर इन्स्योरेन्स १३ लाख १५ हजार, भाटभटेनी सुपरमार्केट ५ लाख २५ हजार, हिमालय डिष्टलरी लिमिटेड ५ लाख २५ हजार, एलआरई स्कुल कठमाण्डौ ५ लाख, माछापुच्छे« बैंक ५ लाख, ग्लोवल आइएमई बैंक ५ लाख, कृषि विकास बैंक ५ लाख, एभेरेष्ट बैंक २ लाख १० हजार, नवजीवन सहकारी २ लाख १० हजार, नेपाल बैंक लिमिटेड २ लाख सहयोग करले बा ।
ओस्टेक हिमालय बैंक १ लाख ९९ हजार, महालक्ष्मी बैंक १ लाख ५० हजार, एसविआई बैंक १ लाख ५ हजार, नविल बैंक ७८ हजार,प्रभु बैंक ५२ हजार ५ सय, गरिमा बैंक ५० हजार, सुदूर नेपाल बचत सहकारी संस्था २० हजार ओ धनगढी उपमहानगरपालिकाके इन्जिनियर कमल ओझा ३७ हजार ५ सय करके जम्मा भवनी मावि ओ सिद्धनाथ माविमे वितरण सम्पन्न हुइल बा कलेसे और विद्यालयमे शैक्षिक सामाग्री हस्तान्तरण हुइटी रहल उहाँ जनैलै ।
