केएमसीमे अनुसन्धानमूलक प्रथम अन्तर्राष्ट्रिय सम्मेलन हुइना
पहुरा समाचारदाता
धनगढी, १३ फागुन । कैलाली बहुमुखी क्याम्पस धनगढी कैलालीसे अनुसन्धानमूलक प्रथम अन्तराष्ट्रिय सम्मेलन २०८१ आयोजना कैना हुइल बा ।
इहे फागुन १५ ओ १६ गते हुइना सम्मेलनबारे मंगरके रोज पत्रकार सम्मेलन कैटी जानकारी करागिल हो । सम्मेलनमे अन्तराष्ट्रिय विश्वविद्यालयके विषयविज्ञसे सम्बन्धित विषयमे प्रस्तुती, प्यानल छलफल हुइना कार्यक्रमके संयोजक मोहनसिंह साउद जानकारी डेलै ।
उहाँ शिक्षा, मानविकी, व्यवस्थापन ओ विज्ञान विषयमे अनुसन्धान कर्ता अर्थात विषयवित्रहुक्रनसे प्रस्तुती तथा छलफल हुइना बटैलै ।
शिक्षा, नवप्रवर्तन ओ व्यवसाय मार्फत समाजहे सशक्त बनैनाके साथे ज्ञानसीप आदानप्रदान कैना कार्यक्रमके मुख्य उद्देश्य रहल जनाइल बा । सम्मेलनमे नेपाल सहित १० देशके २६ ठो विदेशी विद्यालयके प्रबुद्ध व्यक्तित्वहुक्रनके सहभागिता रहना जनाइल बा ।
सम्मेलनमे त्रिभुवन विश्वविद्यालय, सुदूरपश्चिम विश्वविद्यालय, मध्य–पश्चिम विश्वविद्यालय, नेपाल संस्कृत विश्वविद्यालय, काठमाडौं विश्वविद्यालय, गंगा एस स्कूल, अमर ज्योति विद्यालय, थकाली आर सेन्टर लगायतके नेपाली विश्वविद्यालय एवं शैक्षिक संस्थाके प्रस्तुती रहना जनाइल बा ।
ओस्टके अन्तराष्ट्रिय विश्वविद्यालय ओर अलीगढ मुस्लिम विश्वविद्यालय, एमिटी विश्वविद्यालय, अन्नासाहेब डांगे कलेज अफ इन्जिनियरिङ एण्ड टेक्नोलोजी भारत, सागा विश्वविद्यालय जापान लगायत विश्वविद्यालयके बौद्धिक व्यक्ति सहभागी हुइना जनाइल बा ।
सम्मेलनमे सहभागिताके लाग नेपाल, भारत, बंग्लादेश, पाकिस्तान, श्रीलंका, मोरक्को, तान्जानिया, अष्ट्रेलिया, थाइल्याण्ड ओ जापानसे बौद्धिक व्यक्ति धनगढी पुगल समेत संयोजक साउँद जानकारी डेलै ।
