मनैनके कारण विपद जोखिम बह्रटाः कानून मन्त्री सार्की
पहुरा समाचारदाता
धनगढी, १५ फागुन । सुदूरपश्चिम प्रदेश सरकारके आन्तरिक मामिला तथा कानून मन्त्री हिरासिंह सार्की मानवके कारण विपदके जोखिम बह्रल बटैले बटै ।
विपद् जोखिम न्यूनीकरण तथा व्यवस्थापन ओ जोखिम संचारमे मिडियाके भूमिका सबलीकरण सम्बन्धमे सुदूरपश्चिम प्रदेशके संचारकर्मीहुकनके लाग सुरु हुइल दुई दिने कार्यशालामे मन्त्री सार्की उ बाट बत्वाइल रहिट ।
उहाँ कहलै, ‘ अब्बे विकासके नाउँमे डोजरके प्रयोगसे जथाभावी उत्खनन करल कारण पहिरोके घटना बह्रल बा । अन्धाधुँध गिट्टीबालु निकारेबेर लडिया खोलाके मुहान बन्द हुइना करल बा । पानीके मुहान ठुनके बाढके जोखिम बह्रल उहाँ मन्त्री कहलै । संचारकर्मीनसे सही ओ सामयिक सूचनासे प्रदान करलेसे जनधनके क्षति कम करे सेक्नाफे उहाँ बटैलै ।
कार्यशालामे सुदूरपश्चिम प्रदेशके विपद्के अवस्था, प्राधिकरणसे जोखिम संचारमे लेटी रहल पहल, नेपालके जलवायु सेवा एवं बाढ पूर्वानुमानके बुझाई, विपद् जोखिम न्यूनीकरण तथा व्यवस्थापन रिपोर्टिङके व्यवहारिक पक्ष, विपद्के लाग पूर्वतयारी कैना पत्रकारहुकनके भूमिका लगायत प्रस्तुतीकरणसहित समूह कार्य हुइटी रहल बा ।
राष्ट्रिय विपद जोखिम न्यूनिकरण तथा व्यवस्थापन प्राधिकरण ओ सुदूरपश्चिम प्रदेश सरकार आन्तरिक मामिला तथा कानुन मन्त्रालयके संयुक्त आयोजना ओ मर्सिकोर नेपालके प्राविधिक सहयोगमे कार्यशाला हुइटी रहल बा ।
कार्यशाला उदघाटन कार्यक्रम राष्ट्रिय विपद जोखिम न्यूनिकरण तथा व्यवस्थापन प्राधिकरणके प्रवक्ता तथा सहसचिव डा. डिजेन भट्टराईके अध्यक्षतामे हुइल रहे । कार्यक्रममे कैलाली जिल्लाके प्रमुख जिल्ला अधिकारी गोगन हमाल ओ नेपाल पत्रकार महासंघ सुदूरपश्चिम प्रदेश अध्यक्ष भरत शाह मन्तव्य राखल रहिट ।
पहिल रोज राष्ट्रिय विपद जोखिम न्यूनिकरण तथा व्यवस्थापन प्राधिकरणके प्रवक्ता तथा सहसचिव डा. डिजेन भट्टराई, आन्तरिक मामिला तथा कानून मन्त्रालयके विपद सम्पर्क व्यक्ति दिपेन्द्र सिंह विष्ट, सिनियर डिभिजनल मेट्रोलोजिष्ट विभुति पोख्रेल, सिनियर डिभिजन इन्जिनियर रामप्रसाद अवस्थी, पूर्व शिक्षा मन्त्री गंगालाल तुलाधरलगागत विपद सम्बन्धी प्रस्तुतीकरण राखल रहिट । कार्यक्रम संचालन दिपक सापकोटा करल रहिट ।
