९औं थारू साहित्य राष्ट्रिय सम्मेलन सुरु
पहुरा समाचारदाता
नेपालगन्ज, १६ फागुन । ९औं थारू साहित्य राष्ट्रिय सम्मेलन बर्दियाके राजापुर नगरपालिकामे शुकसे सुरु हुइल बा । उ सम्मेलन थारू लेखक सङ्घ नेपाल तथा जङ्ग्रार साहित्यिक बखेरीके संयुक्त आयोजनामे बर्दियास्थित राजापुर–२, जोतपुर गाउँमे सुरु हुइल हो ।
थारू लेखक सङ्घ नेपालके अध्यक्ष डा. कृष्णराज सर्वहारीके अध्यक्षतामे सुरु हुइल सम्मेलनके प्रारम्भमे वरिष्ठ साहित्यकार डा. राजकुमार थारूके ‘थारू साहित्य र अन्य समालोचना’, गणेश वर्तमानके ‘लौटल मनिया’, सुनसरी जिल्लाके ‘हौली’ पत्रिका ओ ‘पोष्टाको घुर्घट खोलाई’ के विमोचन करल रहे ।
कार्यक्रममे थारू राष्ट्रिय आयोगके अध्यक्ष बिष्णुप्रसाद चौधरी, सदस्य सुवोध थारू, पूर्व मन्त्री डा. गोपाल दहित, राजापुर नगरपालिकाके मेयर दिपेश थारू ओ कन्चनपुरी समाजसेवी सुनिता चौधरी लगायत थारू साहित्यके अवस्था ओ ओकर संरक्षण तथा विकासके लाग तिनु तहके सरकारसे विशेष ध्यान डेहे पर्ना जोड डेहल रहिट ।
शनिच्चरसम चल्ना उ सम्मेलनमे आठठो छलफल सत्र राखलमे शुकके ‘राजापुर नगरपालिकाके शिक्षा यात्रा’ शीर्षकमे राजापुर नगरपालिकाके मेयर दिपेश थारू राजेश, पूर्व जिल्ला शिक्षा अधिकारी जीतबहादुर शाह, पूर्व प्रधानाध्यापक किरण आचार्यसँग युवक माविका प्रधानाध्यापक नरेशकुमार थारू बहस सम्पन्न करल जङ्ग्रार साहित्यिक बखेरी बर्दियाके अध्यक्ष सोम डेमनडौरा बटैलै । उहाँ उ मेरके छलफल पूर्व मन्त्री डा गोपाल दहित, लुम्विनी प्रदेश सांसद धर्म बहादुर थारु, पूर्व मेयर दुर्गा बहादुर थारु कबिरसँग अधिवक्ता सन्तराम धारकटुवा थारू विकास ओ बाधा शीर्षकमे छलफल हुइल फेन जानकारी डेलै ।
ओस्टके संस्कृतिकर्मीत्रय एकराज चौधरी, मिनराज चौधरी, भगवतीप्रसाद चौधरीसँग रेडियो गुर्वावाके स्टेसन म्यानेजर पुष्पा चौधरी बर्किमार (थारू महाभारत) के पात्रबारे बहस सम्पन्न करल रही । उहे मेरके सङ्क्रमणकालीन न्याय ओ द्वन्द्वपीडितके सवाल शीर्षकमे थारू आयोगके अध्यक्ष विष्णुप्रसाद चौधरी, मेयर दिपेश थारू राजेश, तथा द्वन्द्वपीडित समाजके अध्यक्ष भागीराम थारूसँग अध्येता शेखर दहित बहस कार्यक्रम करल रहिट ।
