बागेश्वरी कृषि सहकारीके १३औं वार्षिक साधारण सभा सम्पन्न
पहुरा समाचारदाता
हसुलिया, १६ फागुन । कैलाली जिल्लाके कैलारी गाउँपालिका वडा नम्बर १ मे रहल बागेश्वरी कृषि तथा लघु उद्यम सहकारी संस्था लिमिटेडके १३ औं वार्षिक साधारण सभा शुकके रोज भव्यताके साथ सम्पन्न हुइल बा ।
सहकारीके अध्यक्ष श्याम मल्लके अध्यक्षतामे हुइल कार्यक्रममे पूर्व संघीय कृषि मन्त्री गौरीशंकर चौधरी प्रमुख अतिथि रहल रहिट । कार्यक्रममे सम्बोधन करटी उहाँ बागेश्वरी कृषि तथा लघु उद्यम सहकारीसे कृषकहुकनहे प्रत्यक्ष फाइदा पुगल बटैलै । उहाँ कहलै, ‘ग्रामीम भेगमे बैंकके उपस्थिति नैरहल अवस्थामे कैलारीमे यी सहकारीके स्थापना हुके यहाँके कृषकहुकनक सहयोगीके रुपमे आघे बह्रल बा ।’
कार्यक्रममे सहकारीके सचिव प्रभुराम चौधरी, सहकारीके उपाध्यक्ष जीतबहादुर रावतलगायत शुभकामना मन्तव्य व्यक्त करल रहिट । सहकारीके कोषाध्यक्ष सन्तराम चौधरी लेखा प्रतिवेदन प्रस्तुत करटी ६ करोड ६२ लाख ७४ हजार २२६ सय ९० पैसा बराबरके करोबार हुइल उहाँ जनैलै ।
वार्षिक साधारण सभा कार्यक्रममे सहकारीसे असल ऋणी, असल बचतकर्ता ओ पूर्व कर्मचारीनहे सम्मान कैगिल बा । जेम्ने असल ऋणी सम्मानित हुइलमे सोनी सोव, हरिप्रसाद चौधरी, रामकुमार चौधरी, उषादेवी न्यौपाने, ज्ञानबहादुर भुल, बलिराम चौधरी, सुन्दरलाल चौधरी रहल बटै ।
असल बचतकर्ता सम्मानितमे छेदवा डगौंरा, गणेश बहादुर चौधरी, सत्य नारायण चौधरी, बसन्ती चौधरी, अनितादेवी चौधरी, नयन बहादुर चौधरी, राजकुमार चौधरी रहल बटै । सम्मानित हुइल सक्कु जनहनहे दोसल्ला ओ सम्मानपत्रसे सम्मान करल हो । ओस्टेक सहकारीसे पूर्व व्यवस्थापक ज्ञानबहादुर चौधरीहे सम्मानपत्र, ओ एक महिनाके तलब भत्तासहित सम्मान कैगिल हो ।
कार्यक्रमके सञ्चालन मदन प्रसाद पौडेल करल रहिट । कार्यक्रममे शेयर सदस्य, टमान संघ संस्थाके प्रतिनिधिहुकनहे सहभागिता रहे ।
