२९ विधाके तालिम एक्के ठाउँसे सिख्ना मौका जुरल

पहुरा समाचारदाता
धनगढी, १६ फागुन । धनगढी उपमहानगरपालिका–१ के पुरान एयरपोर्ट तथा खुला मञ्चमे यिहे फागुन ८ गतेसे सुरुवाट हुइल सीप तथा रोजगार मेलामे यूवाहुकनहे २९ विधाके तालिम एक्के ठाँउसे सिख्ना मौका जुरल बा ।

यी मौका धनगढी उपमहानगरपालिकासे आयोजना करके जुरा डेलक हो । तालिम सञ्चालनके लाग मेलास्थलमे दुई ठो भारी कार्यशाला हल बनाइल बा । पहिल हलमे १८ ठो टमान मेरके तालिम सञ्चालन हुइटी रहल बा । जेम्ने मोबाइल तथा सीसीटीभी मर्मत, बिल्डिङ इलेक्ट्रिकल, एसी तथा रेफ्रिजेरेटर मर्मत, अटो क्याड, हार्डवेयर नेटवर्किङ, ग्राफिक्स डिजाइनिङ, डिजिटल मार्केटिङ, पुरोहित तालिम, इसीडी वालविकास शिक्षक, फेसन डिजाइन, एडभान्स टेलरिङ, हेयर कटिङ तथा स्टाइलिङ, नाई (बार्बर), एडभान्स ब्युटिसियन, प्लम्बिङ, वेल्डिङ, इलेक्ट्रिक भेहिकल (ईभी) मर्मत तथा लेखा व्यवस्थापन तालिम समावेश बा ।

दुसरा हलमे ११ ठो तालिम सञ्चालनमे बटै, जेम्ने सांस्कृतिक पोसाक निर्माण, बेतबाँस क्राफट, टायल तथा मार्बल फिक्स्चर, डकर्मी, मोटरसाइकल तथा स्कुटर मर्मत, रिसेप्सनिष्ट, वेटर, कफी बारिस्टा, हाउस पेन्टिङ, फर्निचर तथा फास्टफुड कुकिङ तालिम निःशुल्क प्रदान करल बा । ओस्टेक, मेलामे १२ ठो वर्कसप सञ्चालन हुइटी रहल बा । जेम्ने प्रशिक्षार्थीहुक्रे प्रत्यक्ष रुपमे कार्य करके सिख्ना अवसर पैठै ।

दैनिक दुई चरणमे १८ ठो तालिम सञ्चालन हुइटी रहल बा । सकारे ८ बजेसे १२ बजेसम पहिल चरण ओ दुपहर १ बजेसे ५ बजेसम दुसरा चरणके तालिम सञ्चालन हुइटी रहल बा । बाँकी ११ ठो तालिम बिहान १० से ४ बजेसम एक्के चरणमे सञ्चालन हुइठै ।

सुदूरपश्चिमके नौ जिल्लाके ८८ स्थानीय तहसे आवेदन डेहल ४ हजार आठ तीस जाने मध्ये अन्तिम छनौटमे परल १ हजार ४० जाने युवा यी मेलामे अब्बे टमान विधामे सीप सिख्टी रहल बटै । तालिममे सहभागी हुइनामे ५७० जाने पुरुष ओ ४७० जाने महिला बटै । ओइने सुदूरपश्चिमके ३९ स्थानीय तहके हुइट ।

धनगढी उपमहानगरपालिकाके ओरसे मेलाके फोकल पर्सन चन्द्रबहादुर महरा मेलाके सफल व्यवस्थापनके लाग टमान कमिटी गठन करल जनैलै । २९ ठो तालिम व्यवस्थापन कैना संयोजक, विषयगत क्षेत्रके ८ जाने व्यवस्थापक, ८ जाने सह–व्यवस्थापक, ९२ जाने प्रशिक्षक, १० जानेक सचिवालय टिम, १४ जाने इभेन्ट व्यवस्थापन टिम, १० जाने सुरक्षा टिम, ३५ जाने स्वयंसेवक टिमसे मेलाके समन्वय तथा सञ्चालन करटी रहल बटै ।

धनगढी उपमहानगरपालिकाके प्रमुख गोपाल हमालके अनुसार युवा बेरोजगारी ओ सीप अभावहे सम्बोधन करटी नयाँ रोजगारी सिर्जना कैना यी पहल धनगढीके लाग केल नैहो, सुदूरपश्चिमके लाग महत्वपूर्ण बा ।’
यी मेला चैत ८ गतेसम जारी रना आयोजक धनगढी उपहानगरपालिका जनैले बा ।