थारू साहित्य राष्ट्रिय सम्मेलनमे नौ बुँदे घोषणापत्र जारी

पहुरा समाचारदाता
धनगढी, १७ फागुन । बर्दियाके राजापुर–२, जोेतपुर गाउँमे हुइल नवौं थारु साहित्य राष्ट्रिय सम्मेलनमे नौ बुँदे राजापुर घोषणापत्र २०८१ जारी करले बा ।

थारू लेखक संघ नेपाल ओ जंग्रार साहित्यिक बखेरी, बर्दियाके आयोजना, बर्दिया, राजापुर नगरपालिकाके आर्थिक सहयोग, यूनिक नेपाल बर्दिया, वरघर समिति, जोतपुरके सहकार्यमे २०८१ फागुन १५ से १७ गतेसम लुम्बिनी प्रदेशके राजापुर नगरपालिका–२, जोतपुर गाउँमे हुइल नवौं थारू साहित्य राष्ट्रिय सम्मेलनके सक्कु सहभागीहुक्रे प्रतिवद्ध हुके नौ बुदे घोषणापत्र जारी करल यिहे फागुन १५ से १७ गतेसम हुइल सम्मेलनसे नौ बुँदे राजापुर घोषणापत्र २०८१ जारी करल सम्मेलनके संयोजक डा. कृष्णराज सर्वहारी जनैलै ।

घोषणापत्रमे थारू भाषा, साहित्य, संस्कृति, अन्त्यके लाग थारु साहित्यिक संघ संस्था, भाषाप्रेमी लेखक, प्रकाशक, सम्पादकहुक्रे एकजुट हुके सहकार्य कैना कहल बा ।थारू लोक साहित्य तथा संस्कृतिके संरक्षण प्रवद्र्धन कैना टमान क्षेत्रके जानकार अग्रजहुकनके अनुभव आदानप्रदान, कथावाचन कैना कहल बा ।

थारु लोक साहित्यके जानकार पुस्ताहे सम्मान कैनाके साथे साहित्यके टमान विधामध्ये कौनो एक विधामे प्रतिस्पर्धा कराके पुरष्कृत कैना कहल बा । थारू लेखक संघ नेपालसे स्थापित थारू भाषा ओ साहित्यके क्षेत्रमे महत्वपूर्ण योगदान डेहुइया स्रष्टाहुकनहे सम्मान ओ पुरस्कारके लाग अक्षय कोषके राशी वृद्धि करटी जैना कहल बा ।

थारू भाषा, साहित्यके समृद्धिके लाग साहित्यकारहुकनहे प्रोत्साहित कैना, पाण्डुलिपि प्रकाशनके वातावरण बनैना कहल बा ।
थारू भाषा, साहित्य ओ संस्कृतिके संरक्षण तथा प्रवद्र्धनके लाग बजेट विनियोजन कैना स्थानीय पालिका प्रदेश तथा संघीय सरकारमे पहल कैना तथा दवाव डेना कहल बा । नवौं थारू साहित्य राष्ट्रिय सम्मेलनके स्मारिका प्रकाशन कैना, अइना दशौं थारू साहित्य राष्ट्रिय सम्मेलन पर्सा जिल्लामे २०८२ फागुन महिनामे आयोजना कैना कहल बा ।

ओस्टेक करके बर्दिया, राजापुर नगरपालिकामे सम्पन्न ९औं थारू साहित्य राष्ट्रिय सम्मेलन भव्य, सभ्य एवम् सफलतापूर्वक सम्पन्न कैना सहयोग पुगैना राजापुर नगरपालिका, यूनिक नेपाल, जोतपुरके वरघर समिति, प्यानालिस्ट, सहजकर्ता, स्वयम्सेवक, राजनीतिक दलके अगुवा, शिक्षक, विद्यार्थी, समाजसेवी, बुद्धिजीवी, सञ्चारकर्मी, टमान पेशा व्यवसायी तथा प्रत्यक्ष अप्रत्यक्ष रुपमे सहयोग करुइया एवम् टमान जिल्लासे सहभागी हुइल सक्कु जनहनहे धन्यवाद ज्ञापन कैगिल बा ।