भासनम बहुट बट्चिफ्लार बा मोर देश
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
झग्रा किल डेख्ठु कानुन बनैना ठाउँम
भ्रष्टाचार किल डेख्ठु विकासके नाउँम
फुटल डेख्ठु पार्टि पार्टिले हर गाउँम
मिठ मिठ किल भाषण सुन्ठु हर चुनाउम
ओहमार,
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
देशके शिक्षा, स्वास्थ्य अस्त व्यस्त डेख्ठु
शासन प्रशासन हर ठाउँम भ्रष्ट डेख्ठु
जनतनके जीवनम दुःख ओ कष्ट डेख्ठु
शासकम राजशी शैलीम मस्त डेख्ठु ।
भाषण शिक्षा निशुल्क होस्याकल
भाषण स्वास्थ्य निशुल्क होस्याकल
भाषणम डगर पिच बन्स्याकल
भाषणम खोल्ह्वा लड्याम पुल बन्स्याकल
ओहकैख मै कठु,
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
देशम प्रजातन्त्र गणतन्त्र अइलक बर्सौ बिट्सेकल
गाउँम स्कुल बा तर मस्टर्वाके अभाव डेख्ठु
गाउँम स्वास्थ्य चौकी फे बा तर डक्टर्वा निडेख्ठु
गाउँम सिंहदरबार रुपि वडा, स्थानीय तह फे बा
तर जनतनके समस्या जसके टस डेख्ठु
कागजके नीतिम कृषि क्रान्ति आइल डेख्ठु
तर वास्तविक किसान मल नापाख लाइनम डेख्ठु ।
काखर कि
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
गाउँक बग्रहान भौजि छाइछावन कलेजम पह्राइ निसेक्ल हुइट
बन्कटान् बाज्या बर्सौसे दमके रोगी बाट उपचार कराइ निसेक्ल हुइट
डगर नाखुल्ख जुम्लाके जुम्ली काकाके स्याउ पोहर फे सब कुहक गैलिन्
कर्नाली लड्याम पुल नाहोख खच्चर फे पुहख गैलिन्
अहमिन् सम,
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
चुनाउक ब्यालम पर्चा घोषणापत्र बाटट् डेख्ठु
घोषणापत्र लिखल विकासके योजना डेख्ठु
नेता कार्यकर्तन सिकार भातम भुलल डेख्ठु
डाडुभैयाबिच पार्टिक नाउँम झग्रा किल डेख्ठु
नेतन तेलार गाडीम किल न्याङ्गत डेख्ठु
यहर फाँटलचिठल लुग्राम गाउँक मनैन डेख्ठु
चतुर नेतन खै कसिक जनतन मनैठ
भाषणम देशह सिङ्गापुर स्वीट्जरल्याण्ड बनैठ
चुनाउम मेरमेरिक मिठ चिक्टार बात सुनैठ
गरिब जनतनके बात फे ओनैठ
मानौ चुनाउ पाछ
आब देशक गरिबी हट्ख सुख समृद्धि आजाइ
दुखी गाउँक मनैनके समस्या हट्जाइ ।
गाउँक भट्कल स्कुल बन्जाइ
स्वास्थ्यम कायापलट होजाइ
तर नेतनके तेलार बोलि फगट डेख्ठु
तेलार बाटिन् हुकनक भाषन किल
बर्षौसे जमैल बाट शासन किल
ओह त कठु,
उठ निसेक्ना गरी रिनम डुबल बा मोर देश
भासनम बहुट बट्चिफ्लार बा मोर देश ।
-मान बहादुर चौधरी ‘पन्ना’
