थारु पत्रकार संघके अध्यक्षमे सन्तकुमार र्निविरोध निर्वाचित

पहुरा समाचारदाता
धनगढी, २५ फागुन । थारु पत्रकार संघ नेपाल (थापस) के केन्द्रीय अध्यक्षमे सन्तकुमार चौधरी चयन हुइल बटै ।

संघके फागुन २४ गते शनिच्चर काठमाडौंमे हुइल छैटौं राष्ट्रिय महाधिवेशनसे उहाँ अध्यक्षमे छनोट हुइल बटै । संघके उपाध्यक्षमे जनकराज चौधरी, सवि चौधरी ओ महिला उपाध्यक्षमे दिप्तीशिखा चौधरी, महासचिवमे हेमन्त चौधरी, सचिवमे सरला चौधरी, कोषाध्यक्षमे कारी महतो, सदस्यमे मिनादेवी विश्वास छानल बटै ।

निर्वाचन समितिके संयोजक श्रवण चौधरी, सदस्य मदन चौधरी तथा गीता चौधरीके टिमसे बार बार समय थप करेबेर अन्य उम्मेदवारी नैपरल । थप सदस्य कार्यसमितिके पहिल वैठक बैठके मनोनित कैना तथा संस्थाके काम द्रुत गतिमे आघे बह्रैना अध्यक्ष चौधरी प्रतिवद्धता व्यक्त करलै ।

थारु पत्रकार संघ, नेपालके लाग अभियन्ता इन्दु थारूसे अपन दिवंगत बाबा ओ काकाके स्मृतिमे स्थापना करल जोखन–जगत रत्गैया स्मृति पुरस्कार २०८१ दाङके घोराहीसे थारु भषामे प्रकाशित हुइटी आइल लौव अग्रासन थारु साप्ताहिकहे प्रदान करल बा । उ साप्ताहिकके सम्पादक सन्तोष दहितहे नगद ३० हजार रुपियाँ राशीसहित कदरपत्रसे सम्मान कैगिल बा ।

ओस्टेक करके, पत्रकार दिनेश चौधरीहे सतौन स्मृति पत्रकारिता पुरस्कार ओ गायक विकास चौधरीहे सतौन स्मृति प्रतिभा प्रोत्साहन पुरस्कार जनही २५ हजार नगद राशिसहित पुरस्कृत कैगिल । उ पुरस्कार वर्तमान युवा तथा खेलकुदमन्त्री तेजुलाल चौधरीसे स्थापना करल हुइट ।

ओस्टेक, हिमालखबरकर्मी उर्मिला गम्वाहे १० हजार रुप्या राशीके ओएसिस पत्रकारिता पुरस्कार २०८१ प्रदान करल बा । उ पुरस्कार पुरस्कार चितवनके डा मनोज चौधरीसे स्थापना करल हुइट । कार्यक्रममे छैटौं महाधिवेशनमे सहयोग कैना टमान संघ संस्था, व्यक्तिहे समेत कदरपत्रसे सम्मान कैगिल रहे ।

महाधिवेशनके उदघाटन सत्रमे प्रमुख अतिथिके मन्तव्यके क्रममे यु्वा तथा खेलकुदमन्त्री तेजुलाल चौधरी थारु कल्याणकारिणी सभा माघी महोत्सव मनैना, थारु महिला समाज जितिया मनैना केल स्थापना हुइल भान रहल तिक्तता पोख्लै । थारुके नाममे खोलल कौनो संस्थासे द्रुत गतिमे कौनो सार्थक काम करे नैसेकल उहाँक असन्तुष्टि रहे । ‘कार्यक्रममे घोंघी खैना ओ मोटैना’ बाहेक अर्थोक हुई नैसेकल उहाँ बटैलै ।

थारु कल्याणकारिणी सभाहे कार्यालय बनैना जग्गा तथा घरके लाग कटरा रकम चाहठ, मै जुगाड करम कहेबेर कौनो ठोस प्रस्ताव नैआइल उहाँक कहाई रहे । ‘थाकससे कटरा जाने थारु विद्यार्थीहे हालसम छात्रबृत्ति डेहल ?’ कार्यक्रममे उपस्थित थाकसके केन्द्रीय अध्यक्ष प्रेमीलाल चौधरीहे उहाँ प्रश्न करलै । काम नैकैना संस्था स्थापना करके समय वर्वाद कैनासे अपन छावाछाईक पढाइ लेखाइमे ध्यान डेना उहाँ आग्रह करलै ।

मन्त्री चौधरी नयाँ पत्रकार जन्माई नैसेकलमे थारु पत्रकार संघप्रति तिक्तता पोख्टी संघहे तालिमके लाग रकम चहलेसे सघैना तयार रहल बटैलै । उहाँ थारु पत्रकार संघके लाग अपनसे स्थापित सतौन स्मृति पत्रकारिता पुरस्कारके लाग हालहे १ लाखके अक्षयकोष स्थापना करडेना घोषणाफे करलै ।

उदघाटन सत्रमे फोनिज वरिष्ठ उपाध्यक्ष तथा थापसके पूर्व अध्यक्ष तथा सल्लाहकार लक्की चौधरी हाल थापसके १७ जिल्लामे शाखा बिस्तार हुइना ओ करिब ३ सय पत्रकार गोलबद्ध हुइनामे थारु पत्रकार संघके डेन रहल बटैलै ।

ओस्टेक, थापसके पूर्व अध्यक्ष तथा सल्लाहकार डा कृष्णराज सर्वहारी अपनेहुक्रे दुःख कैके हुरकाइल थारु पत्रकारके छाता संगठनहे प्रदीप लेखीके नेतृत्वसे विगत ३ वर्षमे एक चो फे पदाधिकारीहुकनके पूर्ण बैठकसम नैबैठके शुन्य अवस्थामे पुगाइलमे काम कार्वाहीके अवस्था हेरके माइनस जिरो नम्बर डेना मन लागल तिक्तता पोख्लै । उहाँक संस्थाके संस्थापकहुकनके योगदान सम्झना तथा मुखपत्र फुलरियाहे निरन्तरता डेना आग्रह करलै ।

उदघाटन सत्रमे थारु आयोगके सदस्य सुबोधसिंह थारु, थारु कल्याणकारिणी सभाके अध्यक्ष प्रेमीलाल चौधरी, नेपाल आदिबासी जनजाति पत्रकार महासंघ (फोनिज) के अध्यक्ष गजुृरधन राई शुभकामना डेहल रहिट ।

ओस्टेक करके, श्रमजीवि पत्रकार संघके अध्यक्ष जन्मदेव जैशी, जातीय पत्रकार संघके पदाधिकारी, स्थानीय विकास प्रशिक्षण केन्द्रके कार्यकारी निर्देशक कानुनलाल चौधरी, थापसके लाग पुरस्कार संस्थापक डा मनोज चौधरी, थापसके संस्थापक सदस्य तथा आदिवासी जनजाति विद्यार्थी महासंघके अध्यक्ष चन्द्रप्रसाद चौधरी लगायत महाधिवेशन सफलताके शुभकामना डेहल रहिट ।