अब्बेक सरकार चुनावसम यथावत रहीः पूर्व प्रधानमन्त्री देउवा
पहुरा समाचारदाता
धनगढी, २६ फागुन । नेपाली काँग्रेसके सभापति तथा पूर्व प्रधानमन्त्री शेरबहादुर देउवा अब्बेक सरकार चुनावसम यथावत रना बटैले बटै ।
नेपाली काँग्रेस सुदूरपश्चिम प्रदेशके पहिल प्रदेश सम्मेलनके उदघाटन शत्रमे सम्बोधन करटी उहाँ उ बाट बत्वाइल रहिट । अब्बे नेपाली काँग्रेस ओ एमालेके सरकार बा, सभापति देउवा कहलै, नेकपा एमाले ओ काँग्रेस सरकारके नेतृत्व आधा आधा कैना सहमति हुइल बा । अब्बे नेकपा एमालेके अध्यक्ष केपी शर्मा ओली प्रधानमन्त्री बटै । सहमति अनुसार उहाँक कार्यकाल ओराइलपाछे उहाँ नेपाली काँग्रेसमे जिम्मेवारी सुम्पही ओकरपाछे मै प्रधानमन्त्री बनम ।
उहाँ कहलै, ‘अब्बेक आवश्यकता स्थायी सरकार हो । स्थायी सरकार रहलेसे केल विकास विकास सम्भव बा । सरकार फेर बदलसे विकास हुई नैसेक्ना ओ जनताफे नैचाहल हुइट ।
अब्बेक संविधान समावेशी रहल ओरसे कौनो पार्टीके बहुट नैरहल ओरसे नेपाली काँग्रेसहे बहुमत ल्यानक लाग सक्कु जाने समन्वय करके जैना आवश्यक रहल सभापति देउवा बटैलै ।
नेकपा एमाले ओ काँग्रेस अब्बे सत्ता साझेदार रहल मने चुनाव लरेबेर एक दुसरके प्रतिस्पर्धी रना उहाँ बटैलै । २०८४ सालके चुनावसम पार्टी ओ सत्ताहे गाह्रो हुइना कौनो काम नैकैना कार्यकर्ताहुकनहे देउवा आग्रह करलै ।
प्रदेश सम्मेलनमे पार्टीके उपसभापति पूर्ण बहादुर खडका, महामन्त्री गगन थापा, विश्व प्रकाश शर्मा, केन्द्रीय सहमहामन्त्री महालक्ष्मी उपाध्याय (डिना), भिष्मराज आङदम्वे, जीवन परियार, पूर्व उपसभापति गोपालमान श्रेष्ठ, पूर्वमहामन्त्री कृष्ण प्रसाद सिटौला, शंशाक कोइराला, पार्टी प्रवक्ता पकाशशरण महत, केन्द्रीय सदस्य बालकृष्ण खाँड, डा.जीवन राना, इशवरी न्यौपाने, दिलेन्द्र प्रसाद बडु, नेपाली काँग्रेस कैलालीके सभापति नारायणदत्त भट्ट, प्रदेश महामन्त्री मेघराज खडकालगायत मन्तव्य राखल रहिट ।
सम्मेलन सुदूरपश्चिम प्रदेश सभापति विरबहादुर बलायरके अध्यक्षतामे हुइल रहे ।
