धनगढीमे सामुदायिक कुकुरके बन्ध्याकरण

पहुरा समाचारदाता
धनगढी, १८ चैत । कैलालीके धनगढी उपमहानगरपालिकासे सामुदायिक (छाडा छोरल) कुकुरके बन्ध्याकरण अभियान सुरु करल बा । सामुदायिक कुकुरके कारण समस्या सिर्जना हुइलपाछे उपमहानगरपालिकासे नियन्त्रणके लाग बन्ध्याकरण अभियान आघे बह्राइल बटाइल बा ।

धनगढी उपमहानगरपालिकासे कुछ वर्षसे सामुदायिक कुकुर नियन्त्रण अभियान सञ्चालन करटी आइल बा । सामुदायिक कुकुर नियन्त्रणके लाग बन्ध्याकरण सबसे प्रभावकारी उपाय रहल उपमहानगरपालिका जनैले बा ।
उपमहानगरपालिकासे यिहे चैत्र १७ गते अँटवारसे सामुदायिक कुकुर बन्ध्याकरण शिविर सञ्चालन करले बा । उपमहानगरपालिकासे चार दिन (बुधर) सम सञ्चालन हुइना शिविरमे दुई सय ८० ठो सामुदायिक कुकुरके बन्ध्याकरण कैना लक्ष्य लेहल जनैले बा । उपमहानगरपालिका कार्यालयके अनुसार शिविर सञ्चालन करल पहिल दिन अँटवार ९५ ठो सामुदायिक कुकुरके बन्ध्याकरण करल बा ।

उपमहानगरपालिका पशुसेवा शाखा प्रमुख डाक्टर समीरकुमार ठाकुर चार दिनसम चल्न शिविरमे छाडा छोरल कुकुरके केल बन्ध्याकरण कैना बा । छाडा छोरल कुकुरके संख्या नियन्त्रण कैना उपमहानगरपालिकासे हरेक वर्ष बध्याकरण शिविर आयोजना करटी आइल पशुसेवा शाखा प्रमुख ठाकुर बटैलै ।

उपमहानगरपालिका पशुसेवा शाखासे छाडा छोरल कुकुर पक्रना नगरपालिका कर्मचारीहुकनहे सहयोग कैना नगरवासीहे आग्रह समेत करल बा । सामुदायिक कुकुरके बिगबिगीके कारण मनैनमे रेविजके संक्रमण हुइना, सडक दुर्घटनामे बृद्धि हुइना तथा फोहर दूर्गन्ध बह्रना लगायतके समस्या कम कैना नियन्त्रणके प्रयास हुइटी आइल बा ।

पशुसेवा शाखा प्रमुख डाक्टर ठाकुर काठमाण्डौंके मण्डला भेटेनरी अस्पतालके प्राविधिक सहयोग ओ धनगढी उपमहानगरपालिकाके आर्थिक सहयोगमे बन्ध्याकरण शिविर सञ्चालन करल हो । डाक्टर ठाकुरके अनुसार पहिल दिन अँटवार उपमहानगरपालिकाके वडा नम्बर ३, ७, ५ ओ १३ मे रहल ९५ ठो सामुदायिक कुकुरके बन्ध्याकरण करल बा । धनगढीमे कुकुरके संख्या ढेर हुइल ओरसे बन्ध्याकरण करल बा ।

धनगढीमे बिहानके समयमे सामुदायिक कुकुरसे कटना ओ रखेदना जोखिम रहल उपमहानगरपालिका जनैले बा । बन्ध्याकरणसे सामुदायिक कुकुरके संख्या घटैना बताइल बा । शिविरमे खटल विज्ञसहितके टोलीसे नगरके टोल–टोलमे पुगके कुकुरहे नियन्त्रणमे लेके शिविर स्थलमे ल्यानके बन्ध्याकरण लगायत उपचार करलपाछे नियन्त्रण लेहल ठाउँमे छोरना करल डाक्टर ठाकुर बटैलै ।