कैलाली बहुमुखी क्याम्पसमे नेविसंघ विजयी
पहुरा समाचारदाता
धनगढी, २९ चैत । कैलाली बहुमुखी क्याम्पस (केएमसी) के स्वतन्त्र विद्यार्थी युनियन (स्ववियु)मे झण्डे साढे तीन दशकपाछे नेपाल विद्यार्थी संघ (नेविसंघ) विरासत लौटेले बा ।
सुदूरपश्चिम विश्वविद्यालयके आंगिक क्याम्पसके रुपमे रहल केएमसीमे हुइल स्ववियु निर्वाचनमे नेविसंघ विजयी हुइल हो । शुकके सार्वजनिक अन्तिम मतपरिणाम अनुसार स्ववियु सभापतिमे नेविसंघके सन्तोष पन्त विजयी हुइल बटै । उहाँ ८२७ मत पैलै । पन्त वर्तमान स्ववियु सचिवफे हुइट । उहाँक प्रतिस्पर्धी अखिल (क्रान्तिकारी) के पवन सुनार ५५८ मत पैलेसे कलेसे वर्तमान स्ववियु सभापतिसमेत रहल अनेरास्ववियुके यमराज जोशी ४२७, एकीकृत समाजवादी निकट अनेरास्ववियूसे सुनिलराज जोशी ६८ ओ नेविसंघके बागी उम्मेदवार अम्बिका चौधरी ९२ मत पैले बटी ।
सचिवमे नेविसंघ ओ कोषाध्यक्षमे अखिल क्रान्तिकारीके उम्मेदवार विजयी हुइल बटै । स्ववियु सचिवमे नेविसंघसे ओमप्रकाश वस्ती ओ कोषाध्यक्षमे धर्मराज तिम्ल्सिेना विजयी हुइल बटै । कोषाध्यक्षमे नेविसंघके प्रमिला शाह चार मतसे पराजित हुुइली । तीन हजार पाँच सयसे ढेर मतदाता विद्यार्थी रहल उ क्याम्पसमे २७ गते हुइल मतदानमे दुई हजार ५७ मत खसल रहे ।
३४ वर्षपाछे नेविसंघसे विरासत लौटाइल
कैलाली बहुमुखी क्याम्पसमे अभिनसम १४ जाने स्ववियु सभापति निर्वाचित हुइल बटै । ओम्ने सात जाने नेविसंघ, दुई जाने नेविसंघके बागी ओ पाँच जाने अनेरास्ववियुके बटै । सुदूरपश्चिमके सर्वाधिक विद्यार्थी अध्ययन कैना कलेजके रुपमे रहल उ क्याम्पसके स्ववियु सभापतिमे नेविसंघ भर ३४ वर्षपाछे विजयी हुइल हो । यी आघे ०४७ सालमे हुइल स्ववियु निर्वाचनमे नेविसंघके तपराज जोशी सभापतिमे निर्वाचित हुइल रहिट ।
०५३ ओ ०५५ मे हुइल स्ववियु निर्वाचनमेफे नेविसंघमे आवद्व विद्यार्थी नेता सभापतिमे निर्वाचित हुइल रहिट । मने, ओइने नेविसंघसे टिकट नैपाइलपाछे बागी चुनाव लरल रहिट । ०५३ सालमे नेविसंघके बागी उम्मेदवार हरि रेग्मी ओ ०५५ सालमे नेविसंघके बागी उम्मेदवार प्रकाश बोगटी स्ववियु सभापतिमे निर्वाचित हुइल रहिट ।
०४७ सालआघेक सक्कु निर्वाचनमे भर नेविसंघ विजयी हुइल रहे । ०३८ सालमे नेविसंघके धर्मबहादुर सिंह क्याम्पसके पहिल स्ववियु सभापतिके रुपमे निर्वाचित हुइल रहिट । ०३९ सालमे बिरबहादुर ठकुल्ला, ०४० सालमे टीकाराम खनाल, ०४१ सालमे पदम बिष्ट, ०४३ सालके मेघराज खड्का ओ ०४४ सालमे धर्मराज भण्डारी सभापतिमे निर्वाचित हुइल रहिट । ओइने सक्कु नेविसंघके उम्मेदवार रहिट ।
०५१ सालमे हुइल निर्वाचनमे भर पहिल चो अनेरास्ववियुसे बाजी मारल रहिट । नेविसंघके प्रमोद पाठकहे पराजित करटी अनेरास्ववियुके टेकबहादुर चन्द स्ववियु सभापतिमे विजयी हुइल रहिट । अन्य पदमे भर नेविसंघके उम्मेदवार विजयी हुइल रहिट । ०५७ साल यहोरके सक्कु निर्वाचनमे स्ववियु सभापतिमे अनेरास्ववियु विजयी हुइल रहे । ०५७ सालमे डेजी पाण्डे, ०६१ सालमे यज्ञराज ढुंगाना, ०७३ मे चुडामणी भट्ट ओ ०७९ मे यमराज जोशी सभापतिमे निर्वाचित हुइल रहिट ।
