सहज रुपमे सूचना उपलब्ध करैना निर्देशन

पहुरा समाचारदाता
धनगढी, २६ वैशाख । कैलालीके प्रमुख जिल्ला अधिकारी गोगनबहादुर हमाल सूचना मागकर्ताहे सही सूचना सहज रुपमे उपलब्ध करैना सरकारी कार्यालयमे कार्यरत सूचना अधिकारीहुकनहे निर्देशन डेले बटै ।

हुलाक निर्देशनालयसे शुकके धनगढीमे आयोजना करल सूचनाके हक सम्बन्धी छलफल कार्यक्रममे उहाँ डेहे मिल्न सूचना सहज रुपमे उपलब्ध करैना निर्देशन डेलै । सूचना पैना हक कानुनमे व्यवस्था हुइल ओरसे सार्वजनिक निकायसे माग करल सूचना पैना नागरिकके अधिकार रहल उहाँके कहाई बा । “हम्रे अझ जिम्मेवार हुइलओरसे कानुनके अक्षरस पालन कैना हमार कर्तव्य हो”, हमाल ठप्लै,“सूचना मागकर्ता नेपाली नागरिकहे डेहे मिल्ना सूचना अनिवार्य रुपमे डेहे परठ ।”

सूचनाके हकके प्रभावकारी कार्यान्वयनसे सुशासन, पारदर्शीता कायम हुइना प्रमुख जिल्ला अधिकारी हमालके विश्वास बा । उहाँ हरेक कार्यालयके प्रत्येक निर्णयके एक प्रतिलिपी सूचना अधिकारीहे डेना व्यवस्था मिलाई पर्ना बटैले बटै । “ओसिन हुइलेसे सूचना अधिकारीहे सक्कु बाट जानकारी हुइना ओरसे सूचना डेना सहज हुई”, हमाल कहलै ।

कार्यक्रममे हुलाक निर्देशनालयके निर्देशक जितेन्द्र विक सार्वजनिक निकायहे जिम्मेवार, पारदर्शी बनैना ओ नागरिकहे सुसूचित करेक लाग सूचनाके हकके व्यवस्था हुइल बटैलै । सार्वजनिक निकायसे पाँच मेरके सूचनाबाहेक बाँकी सक्कु सूचना नियम बमोजिम माग करल मागकर्ताहे डेना जरुरी रहल उहाँक कहाई रहे । सरकारी कार्यालयसे २० मेरके सूचना तीन÷तीन महिनामे स्वतः प्रकाशन करके नागरिकहे सुसूचित कैना व्यवस्था रहल उहाँ बटैलै ।

कार्यक्रममे कैलालीमे रहल टमान सरकारी कार्यालयके सूचना अधिकारीके सहभागिता रहल रहे ।