धनगढीमे ई–वेस्ट प्रशोधन प्रशिक्षण सुरु
पहुरा समाचारदाता
धनगढी, १३ बैशाख । धनगढी उपमहानगरपालिकासे ई–वेस्ट प्रशोधन प्रशिक्षण सुरु करले बा ।
उ तालिमके उदघाटन ललितपुर महानगरपालिकाका मेयर चिरिबाबु महर्जन करल रहिट । वेस्ट जैना बस्तुहे फेरसे प्रशोधन करके फेरसे कैसिक प्रयोगमे ल्याने सेक्ना कना सिखाइक लाग प्रशिक्षण सुरु हुइल हो । यी तालिम दुई महिनाके रना बा ।
तालिम उदघाटन कार्यक्रममे ललितपुर महानगरपालिकाके मेयर महर्जन धनगढी उपमहानगरपालिकासे करल विकासके प्रशंसा करटी ललितपुर धनगढी उपमहानगरपालकासे ढेर बाट सिखेपर्ना रहल बटैलै । धनगढीसे नेपालमे पहिल चो सुरु करल यी तालिमके उदघाटनके क्रममे मेयर महर्जनसे धनगढीके ६ लेन सडक, वहाँ जडान करल स्मार्ट लाइट ओ सडकके हरियाली देख्के अपने बहुट प्रभावित हुइल बटैलै ।
’मै टे धनगढीके बत्ती बरल डेखके छक्क परनुँ, लेभल मिलल बत्ती देखके मै एकदम खुसी बटु, धनगढीसे गोपाल हमाल जैसिन काम कैना मेयर पैना गर्वके बाट हो’,उहाँ कहलै ।
मेयर महर्जनले ललितपुर विश्व सम्पदा सूचीमे परल छोट भूगोलके सहर हुइलेसेफे फोहोर व्यवस्थापनमे अभिन चुनौती रहल उल्लेख करलै उहाँ ललितपुरमे पेट्रोल–डिजेलके गाडी नैकिन्न नीति लेहल ओ फोहोर बोक्न बाहेकके सक्कु गाडी विद्युतीय खरिद करसेकल जानकारी डेलै । धनगढीसे सुरु करल ई–वेस्ट व्यवस्थापनके यी नमुना कार्यक्रम अपनेफे ललितपुरमे लागू कैना उहाँ बटैलै ।
कार्यक्रममे उहाँ अपने ओ धनगढीके मेयर गोपाल हमालबिच चार वर्षआघे मलेसियामे भेट हुके स्मार्ट सिटीके अवधारणाबारे छलफल हुइल स्मरण करटी अब्बे धनगढीसे उहीहे व्यवहारमे उतारमे प्रशंसा करलै ।
धनगढी उपमहानगरपालिकाके सभाहलमे आयोजित उ कार्यक्रममे मेयर महर्जन भूकम्पपाछे ललितपुरके मन्दिर पुननिर्माणमे जनसहभागितासे भारी रकम सङ्कलन करके काम करल अनुभव समेत सटलैं ।
हम्रे एक दुसरसे सिक्न हो, धनगढी अब्बे नमुना काम करटी रहल उत्कृष्ट उपमहानगरपालिका बनल,’ उहाँ कहलै ।
कार्यक्रममे धनगढी उपहानगरपालिका उप प्रमुख कन्दकला कुमारी राना जनताके अपर मयााके कारण धनगढी उपमहानगरपालिकासे एकपाछे दुसर प्रगती हुइटी गैल बटैली । कलेसे जनताके चासोफे बह्रल बटैली । फोहोर मैला व्यवस्थापनके कारण धनगढी उपमहानगरपालिका स्तह परिवर्तन हुइल उहाँ बटैली ।
कार्यक्रममे धनगढी उपमहानगरपालिकाके नगर प्रमुुख गोपाल हमाल, ललितपुर महानगरपालिकाके प्रमुख प्रशासकीय अधिकृत रेखा दास श्रेष्ठ, वडा अध्यक्षहुक्रे, टमान शाखाके विषयगत शाखाके प्रमुख हुकनके सहभागिता रहे ।
