प्रदेश स्तरीय मानव अधिकार रक्षक सञ्जालके बैठक सम्पन्न
पहुरा समाचारदाता
धनगढी, १७ बैशाख । अनौपचारिक क्षेत्र सोव केन्द्र (इन्सेक) सुदूरपश्चिम प्रदेश कार्यालय, धनगढीके सहकार्यमे सुदूरपश्चिम प्रदेश स्तरीय मानव अधिकार रक्षक सञ्जालके बैठक विफेक रोज धनगढीमे सम्पन्न हुइल बा ।
सुदूरपश्चिम प्रदेश स्तरीय मानव अधिकार रक्षक सञ्जालके बैठक सयोजक देवीप्रसाद खनालके अध्यक्षतामे हुइल रहे । इन्सेक सुदूरपश्चिम प्रदेश संयोजक खडकराज जोशी सुकुम्बासीके समस्या मानव अधिकार तथा सार्वजनिक सरोकारके सवाल हुइल ओरसे राज्यसे सरकारी जमिन अतिक्रमण करके बैठल सुकुम्बासी बस्ती हटैना नीति लेहल ओरसे उहे नीति बमोजिम सुकुम्बासी बस्ती हटैना त्रममे वास्तविक सुकुम्बासीके पहिचान करके उचित बसोबासके व्यवस्था करेपर्ना बटैलै ।
उहाँ हरेक नागरिकके आवासके अधिकार मौलिक हक रहल ओरसे मानव अधिकार रक्षकहुक्रे सुकुम्बासी बस्ती हटाइल स्थलगत अनुगमन करके राज्यहे खबरदारी ओ जवाफदेही बनाई परठ ।
सुदूरपश्चिम प्रदेश स्तरीय मानव अधिकार रक्षक सञ्जालके बैठकमे संयोजक देवीप्रसाद खनाल प्रदेश सरकारसे स्थानीय सरकारसे ल्यन्ना नीति तथा कार्यक्रम मानव अधिकार मैत्री हुइल नैहुइल मानव अधिकार रक्षकहुक्रे अनुगमन करेपर्ना ओ सम्बन्धित निकायसंग छलफल करेपर्ना बटैलै ।
सुदूरपश्चिम प्रदेश स्तरीय मानव अधिकार रक्षक सञ्जालके सदस्य सोमनाथ राना २०८३ जेठ २२ गते (सन् २०२६ जुन ५) मे विश्व वातारण दिवस रहल ओरसे मानव अधिकार रक्षकहुक्रे आ—अपन कार्यक्षेत्रके स्थानीय युवा क्लव, बाल अधिकार चेतना समुह, विद्यालय ओ स्थानीय सरकारसंग समन्वय करके बृक्षारोपण करेपर्ना ओ बाढ डुवान क्षेत्रके नागरिकहे सुरक्षित स्थानमे धारेक लाग स्थानीय सरकारके ध्यानाकर्षण करेपर्ना बटैलै ।
