विश्व शान्तिके लाग चैतन्य साइकल यात्रा
पहुरा समाचारदाता
धनगढी, १८ बैशाख । बुद्ध जयन्तीके पावन अवसरमे चैतन्य पाठशालासे आयोजना करल “विश्व शान्तिके लाग चैतन्य साइकल यात्रा २०८३” उत्साहपूर्ण वातावरणमे सम्पन्न हुइल बा ।
शान्ति, सद्भाव ओ सहिष्णुताके सन्देश समाजमे फैलैना उद्देश्यसे आयोजना करल उ कार्यक्रमसे समाजमे सकारात्मक सन्देश प्रवाह कैना आयोजकके विश्वास रहल बा । बैशाख १८ गते ६ बजे धनगढीके चौराहासे सुरु हुइल यात्रामे विद्यार्थी, शिक्षक, अभिभावक तथा स्थानीय सर्वसाधारणके उल्लेखनीय सहभागिता रहल रहे ।
यात्रा धनगढी चौराहासे दिप प्रज्वलन करटी सुरु हुके बुद्ध चौकमे भगवान बुद्धके उपदेश ओ भगवान बुद्धके शालिकमे फुलमाला अर्पण करटी फुलवारीमे स्थानीय तथा समाजसेवीके अग्रतामे दिप प्रज्वलन करटी पाठशालाके लाग यात्रा मोरल रहे ।
कार्यक्रमके मूल उद्देश्य विश्वमे शान्ति स्थापना, मानवबीचके आपसी सद्भाव अभिवृद्धि ओ अहिंसाके सन्देश प्रवाह कैना रहल चैतन्य पाठशालाके अध्यक्ष गणेश प्रसाद जोशी बटैलै ।
उहाँ युवाहुकनहे स्वस्थ जीवनशैलीओर प्रेरित कैना, वातावरण संरक्षणप्रति सचेत बनैना तथा सामाजिक उत्तरदायित्वबारे जागरूक करैना लक्ष्य समेत राखल बटैलै ।
कार्यक्रममे धनगढी तथा अत्तरियासे समेत साईकल यात्री सहभागिता रहल रहिट ।
कार्यक्रम सफल बनैना प्रत्यक्ष तथा अप्रत्यक्ष रूपमे सहयोग कैना सक्कु जनहनमे धन्यवाद ज्ञापन करटी यैसिन रचनात्मक ओ सन्देशमूलक कार्यक्रम अइना दिनमेफे निरन्तर सञ्चालन कैना चैतन्यके लक्ष्य रहल पाठशालाके प्राचार्य प्रेमनिधि ओझा बटैलै ।
