मुक्तकमैयाके समस्या समाधान कैना सरकार प्रतिबद्ध बा : मन्त्री चौधरी
पहुरा समाचारदाता
धनगढी, २० बैशाख । कृषि तथा पशुपन्छी विकास, वन तथा वातावरणमन्त्री गीता चौधरी मुक्तकमैया समुदायके गाँस, बास, शिक्षा, स्वास्थ्य ओ रोजगारीके समस्या समाधान कैना सरकार प्रतिबद्ध रहल बटैले बटी ।
मुक्तकमैया समाज जिल्ला समिति कञ्चनपुरके आयोजनामे शुक्लाफाँटा नगरपालिका–१० झलारीस्थित खुला मञ्चमे आयोजित जागरणसभामे उहाँ मुक्तकमैया, हलिया, हरवाचरवा तथा कम्लरीके अधिकारके लडाइँमे सरकार सँगसँगे आघे बह्रना बटैली ।
अपने फेन इहे समुदायके छाइ रहल ओरसे इ क्षेत्रप्रति आउर जिम्मेवार होके काम कैना उल्लेख कैटी मन्त्री चौधरी भूमिसम्बन्धी समस्या समाधानहे प्राथमिकतामे राखके काम कैना धारणा रख्ली ।
“अपनेन्के समस्या मोर फेन समस्या हो, मै इ बारे जानकार बटु । ओहेमारे अधिकारके लडाइँमे मै ओ सरकार अपनेन्सँगे बा”, उहाँ कहली ।
कार्यक्रममे प्रतिनिधिसभा सदस्य कृपाराम राना मुक्तकमैया, कम्लरी, हलियालगायत आरक्ष पीडितके न्यायिक पुनःस्थापनके लाग सरकार गम्भीर हुइ पर्नामे जोड डेलै ।
“कतिपयसँग लालपुर्जा बा, मने जग्गा नैहो । कहोँरो जग्गा बा, मने लालपुर्जा नैहो”, उहाँ कहली, “डेहल जग्गा लडिया किनार वा वन क्षेत्र लग्गे रहल ओरसे प्रयोगयोग्य नैहो, बारह्पहिरोके जोखिममे बैठे पर्र्ना बाध्य बावै, आब अइसीन अवस्था अन्त्य हुइ परल ।”
प्रतिनिधिसभा सदस्य ज्ञानेन्द्रसिंह महत मुक्तिके घोषणा किल पर्याप्त नैरहल कहटी पुनःस्थापना, सुरक्षित आवास ओ आधारभूत सेवाके सुनिश्चितताके लाग सरकार काम करे पर्ना बटैलै ।
“महिन विश्वास बा, आब नागरिक सरकार खोज्टी नेंगे पर्र्ना अवस्था नैहो, सरकार नै नागरिकसम पुगके समस्या समाधानमे केन्द्रित हुइ”, उहाँ कहलै ।
मुक्तकमैया समाजके केन्द्रीय अध्यक्ष पशुपति चौधरी मुक्त घोषणा हुइल दुई दशकसे ढेर समय हुइलेसे फेन अधिकांश समस्या समाधान हुइ नैसेकल गुनासो करलै ।
“कुछ परिवारके पुनःस्थापना हुइलेसे फेन तीन हजारसे ढेर मुक्तकमैया परिवार आभिन पुनःस्थापनाके पर्खाइमे बटै”, उहाँ कहलै, “ढेर जाने परिचयपत्र पैले बटै मने जग्गा पाइल नैहुइट । राज्यसे पैना सुविधाके सुनिश्चितता कैना सरकारसे काम करे परल ।”
जागरणसभाके अन्य वक्ताहुक्रे मुक्त कमैया समुदायके दिगो पुनःस्थापना, भूमि व्यवस्थापन, शिक्षा, स्वास्थ्य, रोजगारी तथा आधारभूत सेवामे पहुँच सुनिश्चित कैना राज्यसे प्रभावकारी नीति ओ ओकर कार्यान्वयन करे पर्नामे जोड डेहल रहिट ।
उहे बिच मन्त्री चौधरी दैजी बेदकोट नगरपालिकास्थित दैजी छेला औद्योगिक क्षेत्रके अवलोकन करल रही । उहाँसँगे प्रतिनिभिसभा सदस्य राना, महता, बेदकोट नगरपालिका प्रमुख भोजराज बोहरालगायत उ क्षेत्रके अवलोकन करल रहिट ।
उहे क्रममे मन्त्री चौधरी ओद्योगिक क्षेत्रके निर्माण प्रक्रियाके विषयमे बुझके प्रक्रिया आघे बह्रैना सहजीकरण कैना प्रतिबद्धता जनाइल रही ।
“सरकारसे कानुनी तथा प्रशासनिक सुधारमार्फत समस्या समाधान कैना काम करटी रहल बा”, उहाँ कहली, “जनताके अपेक्षाहे निराशामे परिणत हुइ नैडेना मेरके अहोरात्र खटके काम करटी रहल बटी । औद्योगिक क्षेत्रलगायत स्थानीयके माग सम्बोधनके लाग आवश्यक पहल कैना मै प्रतिबद्ध बटुु ।”
तीन दशकसे चर्चामे रहल कञ्चनपुरके बेदकोटस्थित दैजी छेला औद्योगिक क्षेत्र पाँच बरस आघे शिलान्यास हुइल रहे, मने निर्माणकार्य आघे बह्रे सेकल नैहो ।
करिब ९०० बिघा क्षेत्रफल, रु नौ अर्ब लागत अनुमान ओ २२ हजार रोजगारीके अपेक्षा करलेसे फेन वन फँडानी ओ प्रक्रियागत जटिलताके कारण काम आघे बह्रे नैसेकल जनाइल बा ।
