अध्यक्षके उम्मेदवार पाठकसे प्यानल घोषणा
पहुरा समाचारदाता
धनगढी २६ बैशाख । अइना जेठ ९ गते हुइना नवजीवन सहकारी संस्था लिमिटेडके निर्वाचनमे सञ्चालक समितिके अध्यक्ष पदके उम्मेदवार गोपालराज पाठकसे अपन प्यानल घोषणा करले बटै ।
शुकके रोज धनगढीमे पत्रकार सम्मेलन करटी पाठकसे अपन चुनावी प्यानल घोषणा करल हुइट । अध्यक्षके उम्मेदवार पाठकसे दुई कार्यकाल नवजीवन सहकारीके सञ्चालक समितिमे रहिके काम करसेकल बटै ।
पाठकके प्यानलसे सञ्चालक समितिके उपाध्यक्षमे उत्तम जोशी,सञ्चालक समिति सदस्यमे कोपिला कुँवर, गणेश बम, जगतराम चौधरी, जयराज जोशी, ठोमनाथ ढकाल (टी.एन), भरतराज जोशी ओ लक्ष्मीराज पन्त उम्मेदवार रहल बटै ।
ओस्टेक पाठक प्यानलसे लेखा तथा सुपरीवेक्षण समितिके संयोजकमे गणेशप्रसाद जोशी, सदस्यमे खेमराज पाठक ओ गणेशप्रसाद उपाध्यायके उम्मेदवारी रहल जनाइल बा । पत्रकार सम्मेलनमे बोल्टी अध्यक्षके उम्मेदवार पाठक संस्थामे सुशासन कायम करके विकृति हटैना शून्य सहनशीलता अपनैना बटैलै ।
यैसिन बा पाठक प्यानलके प्रतिवद्धता
१. संस्थागत सुशासन ः संस्थाके ख्याती ओ गौरव कायम रख्न हरेक मेरक विकृति हटैना शून्य सहनशीलता अपनाजाई । संस्थामे कैना नयाँ कार्यक्रमहे प्रभावकारी बनैना शेयर सदस्यमध्येसे सम्बन्धित विषयके जानकारहुक्रे, सञ्चालक कर्मचारी सम्मिलित योजना तर्जुमा उपसमिति गठन करके लागु करजाई ।
२. लगानी तथा असुली ः संस्थामे रहल तरलताहे न्यूनीकरण करटी सहकारी मापदण्ड भिटर सीमित कैना प्रयास करजाई जेकर लाग लगानीके नयाँ क्षेत्रके पहिचान ओ व्याजदरमे समयसापेक्ष परिवर्तन करटी उत्पादनमुखी क्षेत्रमे लगानी विस्तार कैना बा । साथे निस्क्रिय कर्जाके असुलीके लाग विशेष कार्यदलके गठन करके असुली कार्यहे प्रभावकारी बनाजाई ।
३. सदस्य हित ः संस्थामे रहल कार्यके जानकारी करैना ओ शेयर सदस्यके गुनासो तथा सुझाव ग्रहण करके संस्थाके कार्यक्रमहे प्रभावकारी बनाइक लाग सूचना अधिकारी सहितके प्रणाली स्थापना कैजाई । सदस्यसे पैटी रहल सुविधाके क्षेत्रविस्तर करटी लैजैना बा ।
४. उत्पादन ः संस्थासे सकार करल जमिनहे संस्थाके सम्पत्तिके रुपमे ग्रहण करके सम्भाव्यताके आधारमे उत्पादन क्षेत्रमे प्रयोग करजाई ओ किसान शेयर सदस्य रहल क्षेत्रमे लघुवित्त कार्यक्रमहे विस्तार करजाई । साथे मजगाउँमे रहल नवजीवन खाद्य उद्योगहे विस्तार कैजाई ।
५. जनशक्ति विकास ः संस्थामे रहल कर्मचारीहे प्रविधिमैत्री बनैटी लैजाई ।
६. भौतिक विकास ः संस्थाके जोशीपुर सेवा केन्द्रमे आवश्यक पर्ना भवन निर्माण ओ चौमाला सेवा केन्द्रके कार्यालय भवन निर्माणके लाग जग्गा खरिद करजाई ।
७. प्रविधि ओ स्रोत साधन ः संस्थाके कार्यहे प्रभावकारी बनैना समय सापेक्ष आधुनिक सफ्टवेयरके प्रयोग करटी अनलाइन कारोवारहे प्रोत्साहन करटी मसलन्दके खर्चमे कटौती करजाई ।
८. कार्यकालके परिणाम (हमार लक्ष्य) ः संस्थाके सेवा प्रविधिमैत्री बनैटी कारोबार ओ सुशासनके हिसावसे देशभरमे पहिल स्थानमे पुगैना लक्ष्य लेहल बा ।
