यूपीआरमे सिफारिस कार्यान्वयनबारे छलफल

विभेदके संस्कार भत्कैना जरुरी बाः प्रदेश सभामुख भण्डारी

पहुरा समाचारदाता
धनगढी, ७ जेठ । विश्वव्यापी आवद्यिक समिक्षा (यूपिआर)मे सिफारिसके स्थानीयकरणमे प्रदेश तथा स्थानीय सरकारके भूमिकाबारे छलफल कैगिल बा ।

राष्ट्रिय मानव अधिकार आयोग सुदूरपश्चिम प्रदेशके आयोजना तथा यूएनएफपिएके सहयोगमे विफेक रोज धनगढीमे यूपीआरमे सिफारिस कार्यान्वयनबारे छलफल कैगिल हो । राष्ट्रिय मानव अधिकार आयोग सुदूरपश्चिम प्रदेश प्रमुख मानबहादुर कार्कीके अध्यक्षतामे हुइल कार्यक्रममे सुदूरपश्चिम प्रदेश सरकारके सभामुख भीमबहादुर भण्डारी प्रमुख अतिथि रहल रहिट ।

कार्यक्रममे सभामुख भण्डारी विभेद ओ हिंसा न्यूनीकरणके लाग सम्पत्तिउप्पर महिलाके अधिकार हुइना आवश्यक रहल बटैले बटै । भेदभाव, मानव अधिकार उलङ्घन तथा लैङ्गिक हिंसाके घटना महिला आर्थिक रुपमे औरमे निर्भर हुइल कारण हुइटी रहल कहटी सभामुख भण्डारी कहलै, “सम्पत्तिउप्पर महिलाके अधिकार नैहुइटसम यैसिन घटना नैरोकी ।”

मानवीय एवम् भौतिक विकास, अधिकार प्राप्ती ओ अधिकार प्रत्यायोजनके सवालमे मुलुक जहाँके उहे नैरहल कहटी उहाँ ढेर चिजके विकास हुसेकल उल्लेख कहलै । “काल्हके तथ्याङ्कमे आधारित हुके कुछ हुइल नैहो कना भाष्य नबनाई । अब्बे ढेर चिजके विकास हुसेकल बा”, सभामुख भण्डारी कहलै,“आज ज हो उ बाट आइल नैहो । ढेर बाट ह्सेकल बा । मने, पर्याप्त हुइल नैहो ।” जौनफे अन्तर्राष्ट्रिय फोरममे ठरहयाइलपाछे नेपाल ल्याप्चे लगाके अइना करल उल्लेख करटी भण्डारी अपन धरातलफे हेर्न जरुरी रहल औल्याइलै । उहाँ सरकार ओ कानुनके केल्ह कमीकमजोरी डेखाके नैहुइना कहटी सरोकारवाला सक्कु लल्गेसे ढेर बाट सुधार करे सेक्ना बटैलै ।

कार्यक्रममे सामाजिक विकास मन्त्री मेघराज खडका प्रदेशमे बालविवाह, मातृ मृत्युदर उच्च रहल बटैलै । उहाँ महिलाहुकनहे आर्थिक शसक्तीकरण करे सेक्लेसे केल्ह हिंसा न्यूनिकरण हुइना बटैलै ।

प्रदेशसभा सदस्य ललिता सुनार समाजमे अभिनफे जनचेतनाके स्तरमे सुधार नैआइल बटैली ।

धनगढी उपमहानगरपालिकाके नगर उपप्रमुख कन्दकलाकुमारी राना पालिकाके ११ सय ९० योजनामे ५०० केल्ह गौरवके योजना रहल बाँकी सामाजिक क्षेत्रके योजना रहल बटैली । स्थानीय सरकारसे छोट–छोट कल्याणकारी क्षेत्रमे काम कैना जरुरी रहल बटैली ।

मुख्यमन्त्री तथा मन्त्री परिषद कार्यालयके सचिव राजकुमार दुङगाना बालबालिका तथा महिलामे लगानी बह्रैना आवश्यक रहल बटैलै । उहाँ कहलै, आज महिला तथा बालबालिकामे लगानी कैबी कलेसे काल्हके दिन ओकर प्रतिफल डेखाई ।

राष्ट्रिय मानव अधिकार आयोगके सचिव मुरारी प्रसाद खरेल यूपीआरमे आइल सिफारिस कार्यान्वयनके लाग सरकारहे आग्रह करलै । यूपीआरमे २८४ ठो सिफारिस आइल ओरसे कार्यान्वयन आवश्यक रहल बटैलै । मानव अधिकारमैत्री पद्धति नैहुके दानमुखी हुइल उहाँ बटैलै ।

सामाजिक विकास मन्त्रालयके सचिव दानबहादुर सुनार बालविवाह हुइल ६ हजार बालविवाहके हुइल डेखा परलमे जम्मा ५२ ठो मुद्दा दर्ता हुइल बटैलै । प्रदेशमे १ हजार जाने जन्म हुईबेर ८८ जाने कम उमेरके किशोरी डाई रहल बटैलै । भोज कैना उमेर घटैना बाट उठटी रहेबेर २० बर्षसे टरे करे नैहुइना बटैलै ।

इन्सेक प्रदेश संयोजक खडकराज जोशी यूपीआरमे सिफारिस हुइल मुद्दा केल्ह कार्यान्वयन हुइलेसे सक्कु जानेक ढेर जानेक मुद्दा समावेश हुइना बटैलै ।

उपभोक्त हित संरक्षण मञ्चके अध्यक्ष धनपति ढुङगेल ५० बरसमे हम्रे जौन ठाउँमे रहे ठाउँमे रहल बटैलै ।
कैलारी गाउँपालिकाके महिला तथा बालबालिका शाखा प्रमुख बालकुमारी चौधरी बालविवाह व्याप्त रहल कहटी भोज कैना उमेर १८ बरसमे झरलेसे बालविवाहे तथ्यांक कम करेसेक्ना बटैली । मानसिक विरामीके समस्या व्याप्त रहल, अतिज्म भायवाह रहलफे बटैली ।

कार्यक्रममे यूएनएफपिएके लैङिक तथा मानव अधिकार विश्लेषक समिर घिमिरे कार्यपत्र प्रस्तुतीकरण करल रहिट । कार्यक्रमके संचालन राष्ट्रिय मानव अधिकार आयोग सुदूरपश्चिम मानव अधिकार अधिकृत दैवज्ञराज न्यौपाने करल रहिट ।