मुख्यमन्त्री शाहसे टेढी र गुर्गी बाँधके निरीक्षण
पहुरा समाचारदाता
धनगढी, ८ जेठ । सुदूरपश्चिम प्रदेशके मुख्यमन्त्री कमलबहादुर शाह कैलालीके कैलारी गाउँपालिका–८ टेढीस्थित टेढी बाँध तथा वडा नम्बर २ कुकुरभुक्कामे रहल गुर्गी बाँधके निरीक्षण करले बटै ।
बिफेक रोज मुख्यमन्त्री शाह कटैनी लडियामे निर्माण करल जिल्लाके पुरान सिँचाइ आयोजना अन्तर्गत रहल बाँधके स्थलगत निरीक्षण करल हुइट । टेढी सिँचाइ आयोजनासे पालिकाके वडा नम्बर २, ३, ५, ६, ओ ८ तथा गुर्गी सिँचाइ आयोजनासे पालिकाके वडा नम्बर १, ३, ५ ओ ७, के कृषक लाभान्वित हुइटी आइल रहिट । २०६४ सालमे आइल बारह्से बाँध क्षतिग्रस्त बनाइबर इ आयोजना पूर्ण रूपमे सञ्चालनमे आइ सेकल नैहो । बाँध भट्कनाके साथे नहर निर्माण हुइ नैसेकके उ क्षेत्रके किसान वर्षौंसे समस्यामे परटी रहल बटै ।
बाँधके निरीक्षणपाछे मुख्यमन्त्री शाह प्रभावित क्षेत्रके किसानहे राहत पुगाइक लाग तथा कृषि क्षेत्रहे प्रोत्साहन कैना आवश्यक बजेट विनियोजन करे पर्ना जोड डेलै । उहाँ जनताके माग सम्बोधन करक लाग प्रदेश सरकार सकारात्मक ओ प्रतिबद्ध रहल उल्लेख करलै ।
कैलारी गाउँपालिका अध्यक्ष राजसमझ चौधरीके अनुसार टेढी ओ गुर्गी बाँध पुनर्निर्माणसँगे सिँचाइ नहर निर्माण हुइलमे हजारौं कृषक प्रत्यक्ष लाभान्वित हुइना बटै । उहाँ उ क्षेत्रके करिब ९५ प्रतिशत जनता कृषिमे निर्भर रहल बटैटी हाल किसान वर्षाके पानीमे निर्भर हुइना बाध्य रहल ओ चैते धान खेतीसमेत करे नैसेक्ना अवस्था रहल जानकारी डेलै । साथे, सिँचाइ अभावमे किसानहुक्रे महँगा मूल्यमे डिजेल किनके पानीसे खेती कैना बाध्यता रहल उहाँके कहाय रहल बा ।
बाँध निर्माणके लाग प्रदेश ओ स्थानिय सरकारसे बजेट विनियोजन करलेसे फेन कार्यान्वयन नैहोके योजना अलपत्र परल स्थानीय लखन चौधरी गुनासो करलै । ‘योजना समयमे सम्पन्न नैहोके एकदमे दुखद बात हो’, स्थानीय चौधरी कहलै, ‘सरकारसे विनियोजित रकम कार्यान्वय हुइलमे किसानहे राहत हुइना रहे ।’
निरीक्षणमे मुख्यमन्त्रीसँगे राष्ट्रिय सभा सदस्य, नेपाली कांग्रेस कैलालीके सभापति नारायणदत्त भट्ट, उपाध्यक्ष खेम चौधरी, सुदूरपश्चिम प्रदेश प्रदेश नीति तथा योजना आयोगके सदस्य नृप सुनार, कैलारी गाउँपालिकाके अध्यक्ष राजसमझ चौधरी लगायत स्थानीय कृषकहुक्रनके उपस्थिति रहल रहे ।
