युवा परिवर्तनके संवाहकः मुख्यमन्त्री शाह
पहुरा समाचारदाता
धनगढी, ९ जेठ । सुदूरपश्चिम प्रदेशके मुख्यमन्त्री कमल बहादुर शाह युवाहुक्रे परिवर्तनके संवाहक रहल बटैले बटै ।
गैसस महासंघके आयोजनामे यूरोपियन यूनियनके सहयोग तथा यूवा अभियानके समन्वयमे शनिच्चरके रोजसे धनगढीमे सुरु हुइल “सुदूरपश्चिम प्रदेश युवा सम्मेलन २०२६” के उदघाटन सत्रहे सम्बोधन करटी मुख्यमन्त्री शाह मुलुकमे हुइल टमान परिवर्तनमे युवाहरूके सकारात्मक सोच, सक्रियता ओ प्रविधिमैत्री प्रयोगके महत्वपूर्ण भूमिका रहल उल्लेख करलै ।
उहाँ २००७ सालके क्रान्तिसे २०४६÷४७ के जनआन्दोलन, २०६२÷६३ के जनआन्दोलन हुइटी पछिल्का जेन्जी पुस्ताके आन्दोलनसम युवाहुक्रे लोकतन्त्र, गणतन्त्रके स्थापना तथा सुशासन प्रवद्र्धन ओ भ्रष्टाचार न्यूनीकरणके लाग उल्लेखनीय योगदान करल बटैलै ।
मुख्यमन्त्री शाह अइना आर्थिक वर्ष २०८३÷८४ के नीति तथा कार्यक्रममे युवाके आवाज समावेश कैना प्रदेश सरकार सकारात्मक रहल स्पष्ट परलै । उहाँ डिजिटल युगमे युवाहे अवसरसंगे सचेतनाके आवश्यकताफे रहलमे जोड डेलै ।
कार्यक्रममे गैरसरकारी संस्था महासंघ नेपाल सुदूरपश्चिम प्रदेश अध्यक्ष देवी प्रसाद खनालके सभापतित्व हुइल कार्यक्रममे महासंघके केन्द्रीय उपमहासचिव किरण थापा ओ भवराज रेग्मी, केन्द्रीय सचिव सावित्रा घिमिरे, केन्द्रीय सदस्य तथ प्रदेश सहइन्चार्ज कौशिला चौधरी, युवा अभियानके अध्यक्ष योगेन्द्र काफ्ले तथा सुदूरपश्चिम प्रदेश युवा परिषद्के कार्यकारी सदस्य पृथ्वीबहादुर शाह लगायतके उपस्थिति रहल रहे ।
“यंग पिपुल कमिङ टुगेदर टु स्ट्रेन्थेन डिजिटल सिभिक स्पेस” कना मूल नारासहित सुरु हुइल दुई दिने सम्मेलनमे सुदूरपश्चिम प्रदेशके नौवटै जिल्लासे युवाहुकनके सहभागिता रहल बा । सम्मेलन जेठ १० गतेसम सञ्चालन रही ।
कार्यक्रममे महासचिव भवराज रेग्मी, उपमहासचिव किरण थापा, यूवा अभियन्ता ठाकुर प्रसाद करिया प्रधानलगायतसे सहजीकरण करटी रहल बटै । सम्मेलनसे सुदूरपश्चिम प्रदेश स्तरीय घोषणा जारी कैना जनागिल बा ।
