दुसरा पञ्चवर्षीय योजनाके मस्यौदा पारित

पहुरा समाचारदाता
धनगढी, १६ जेठ । प्रदेश विकास परिषद्के चौठा बैठकसे आर्थिक वर्ष २०८३÷८४ से २०८७÷८८ समके लाग तयार करल दुसरा पञ्चवर्षीय योजनाके मस्यौदा पारित करल बा ।

परिषदके अध्यक्ष तथा सुदूरपश्चिम प्रदेशके मुख्यमन्त्री कमलबहादुर शाहके अध्यक्षतामे शनिच्चरके रोज बैठल बैठकसे योजनाके मस्यौदा पारित करल हो । परिषद्के बैठकसे पारित करलसंगे मस्यौदा मन्त्रीपरिषदमे पेश कैना बा ।

प्रदेश नीति तथा योजना आयोगसे तयार करल उ योजना टमान आधारमे टेक्के निर्माण करल हो । योजनाके तयारीमे पहिल पञ्चवर्षीय योजनाके समीक्षा, नेपाल सरकारके सोह्रौँ योजना, संविधान, ऐन–नियम, आर्थिक सर्वेक्षण, तथा टमान सरोकारवालासंगके व्यापक छलफलहे समेटल बा ।

योजनासे “समुन्नत सुन्दर सुदूरपश्चिम” हे दीर्घकालीन सोचके रूपमे आघे सारल बा, कलेसे प्रदेशवासीके गुणस्तरीय जीवन सुनिश्चित कैना मुख्य लक्ष्य राखल बा । उत्पादन ओ उत्पादकत्व वृद्धि, गरिबी न्यूनीकरण, रोजगारी सिर्जना, पूर्वाधार विकास, स्वास्थ्य तथा शिक्षा सुधार, वातावरण संरक्षण ओ सुशासन प्रवद्र्धनहे योजनासे प्रमुख उद्देश्यके रूपमे समेटल बा ।

यी योजना अन्तर्गत कृषि, पर्यटन, उद्योग ओ सेवा क्षेत्रहे प्राथमिकतामे रख्टी आर्थिक वृद्धि हासिल कैना, यातायात, ऊर्जा, खानेपानी ओ डिजिटल पूर्वाधार विकास कैना तथा सामाजिक क्षेत्रमे समान पहुँच सुनिश्चित कैना रणनीति आद्धे सारल बा ।
साथे, जलवायु परिवर्तन अनुकूलन, जैविक विविधता संरक्षण तथा विपद् जोखिम न्यूनीकरणहे समेत उच्च प्राथमिकता डेहल बा । शिक्षा क्षेत्रमे गुणस्तरीय, समावेशी ओ रोजगारमुखी उच्च शिक्षाके विकास कैना लक्ष्य लेहल बा ।

छात्रवृत्ति कार्यक्रम, डिजिटल शिक्षण प्रणाली, अनुसन्धान प्रवद्र्धन तथा सीप विकासमे जोड डेना योजना रहल बा । प्रदेश सरकारसे यी योजनाहे दिगो विकास, सुशासन, डिजिटल रूपान्तरण ओ समावेशी आर्थिक विकासओरके महत्वपूर्ण मार्गनिर्देशक दस्तावेजके रूपमे लेहल बा ।

दुसरा पञ्चवर्षीय योजना प्रदेशके समग्र विकासके मार्गचित्र ः मुख्यमन्त्री शाह

सुदूरपश्चिम प्रदेशके मुख्यमन्त्री कमलबहादुर शाह दुसरा पञ्चवर्षीय योजनाहे प्रदेशके समग्र विकासके मार्गचित्रके रूपमे प्रस्तुत करले बटै ।

उहाँ योजना “समुन्नत सुन्दर सुदूरपश्चिम” निर्माण कैना लक्ष्यसहित दिगो, समावेशी ओ सन्तुलित विकासमे केन्द्रित रहल बटैलै । प्राकृतिक स्रोत ओ सम्भावनासे समृद्ध हुइलेसेफे प्रदेश गरिबी, बेरोजगारी, भौगोलिक विकटता ओ पूर्वाधार लगायतके समस्या समाधान कैना योजना तयार करल उहाँ स्पष्ट परलै ।

मुख्यमन्त्री शाहके अनुसार पहिल पञ्चवर्षीय योजनासे प्राप्त सिकाइके आधारमे ‘आत्मनिर्भर समुन्नत सुदूरपश्चिम’के दीर्घकालीन सोचसहित प्रदेशवासीके गुणस्तरीय जीवन सुनिश्चित कैना लक्ष्य राखल बा । योजनामे लगानी प्रवद्र्धन, उद्यमशीलता विकासमार्फत रोजगारी सिर्जना, दिगो आर्थिक वृद्धि, गुणस्तरीय शिक्षा ओ स्वास्थ्यमे पहुँच विस्तार, जैविक विविधता संरक्षण तथा सूचना प्रविधिमे आधारित पारदर्शी सेवा प्रवाहहे प्राथमिकता डेहल बा ।

उहाँ कृषि, पर्यटन, ऊर्जा, उद्योग, पूर्वाधार, शिक्षा, स्वास्थ्य ओ सामाजिक सुरक्षाके क्षेत्रमे लक्षित कार्यक्रममार्फत उत्पादन, रोजगारी ओ आयआर्जन वृद्धि हुइना विश्वास व्यक्त करलै । साथे सेवा प्रवाहमे सुधार, प्रविधिके प्रयोग, पारदर्शिता ओ उत्तरदायित्वमार्फत सुशासन सुनिश्चित कैना उहाँ प्रतिवद्धता जनैलै ।