मुख्यमन्त्री शाहहे दलके नेतासे हटैना अविश्वास प्रस्ताव दर्ता
पहुरा समाचारदाता
धनगढी, १९ जेठ । सुदूरपश्चिम प्रदेशके मुख्यमन्त्री कमलबहादुर शाहहे संसदीय दलके नेतासे हटैना उहाँक पार्टीके सांसदहुक्रे अविश्वासके प्रस्ताव दर्ता करले बटै ।
कांग्रेस संसदीय दलमे मुख्यमन्त्री शाहविरुद्ध अविश्वास प्रस्ताव दर्ता करल कांग्रेस सुदूरपश्चिमके सांसद दिवानसिंह बिष्ट बटैलै ।
‘कांग्रेसके १८ सांसदमध्ये नम्मा समयसे प्रकाशबहादुर देउवा देशबाहेर बटै,’ उहाँ कहलै, ‘नेपालमे रहल १७ सांसदमध्ये नौ जाने हस्ताक्षर करके संसदीय दलमे अविश्वासके प्रस्ताव दर्ता करल बटी ।’
सांसद बिष्टसे संसदीय दलके नेता फेरटी सरकार परिवर्तन कैना उद्देश्यसहित अविश्वासके प्रस्ताव दर्ता करल बटैलै । यहोर नेपाली कांग्रेस सुदूरपश्चिम संसदीय दलके प्रमुख सचेतक विक्रमसिंह धामी भर प्रस्ताव दर्ताबारे अपनहे जानकारी नैहुइल बटैलै ।
कांग्रेसके सांसद मुख्यमन्त्री शाहहे पदसे राजीनामा डेना माग करटी आइल रहिट । ओइने राजीनामा नैडेलेसे दल नेतासे हटाडेना धम्की डेटी आइल रहिट ।
प्रस्ताव दर्तामे हस्ताक्षर करुइयामे दिवानसिंह विष्ट, गीताकुमारी चौधरी, तुल्सी देवकोटा, डम्मरी महरा, पदमबहादुर शाही, बेलबहादुर राना मगर, मानबहादुर रावल, ललिता सुनार ओ जुनाकुमारी दानी रहल बटै । जेठ ८ गते नेपाली काँग्रेसके संसदीय दलके जेष्ठ सदस्य मानबहादुर रावलके संयोजकत्वमे संसदीय दलके बैठकसे उ निर्णय करल रहे ।
