डब्लुएचआर कैलालीके जिल्ला अधिवेशन तथा चौठा वार्षिक साधारण सभा

पहुरा समाचारदाता
धनगढी, २१ जेठ । मानव अधिकारका लागि महिला एकल महिला समुह (डब्लुएचआर) कैलालीके दुसरा जिल्ला अधिवेशन तथा चौठा वार्षिक साधारणसभा कार्यक्रम विफेक रोज धनगढीमे सम्पन्न हुइल बा ।

मानव अधिकारका लागि महिला एकल महिला समुहके प्रदेश अध्यक्ष भगवती हमालके अध्यक्षतामे हुइल कार्यक्रममे राष्ट्रिय मानव अधिकार आयोग सुदूरपश्चिम प्रदेश प्रमुख मानबहादुर कार्की प्रमुख अतिथि रहल रहिट ।

मानवअधिकार आयोगसे एकल महिलाके लाग सदैव काम करटी आइल ओ हक अधिकारके लाग सहभागिता जनाकेफे सहयोग कैना तयार रहल बटैलै । उहाँ सफल नेतृत्व चयनके लाग शुभकामना व्यक्त करल रहिट ।

कार्यक्रमके विशिष्ट अतिथि डब्लुएचआरके सल्लाहकार तथा फाया नेपालके अध्यक्ष गोमा आचार्य पहिले एकल महिला कहिके कोई नैबोलैना करल मने अब्बेफे बोलैना करल बटैली ।

पुरान कार्यसमिति चुनौतीके बाबजुट काम करले बा, उहाँ कहली ‘लौवा कार्य समितिहे काम कैना चुनौती रही उहीहे चिरटी आघे बह्रे पर्ना बा । एकल महिलाहे बदनाम कराई खोजल बा । अपनेहुकनके घर छिमेकमे कोई ओसिन महिला हुईही कलेसे समुहमे जोरे परल बा ।

कार्यक्रममे मानव अधिकारका लागि महिला एकल महिला समुहके प्रदेश उपाध्यक्ष शान्ती महत महिलाहे महिलाहुके जलम लेहेबेरसे विभेद सुरु हुइना करल बटैली ।

उहाँ एकल महिलाके गोसिया गुमल संगे खुशी गुमल बटैली । अभिनफे एकल महिलाहे हेर्ना दृृष्टिकोण फरक रहल कहटी लैङिक हिंसा हुइटी रहल ओरसे आब एकल महिलाहुक्रे शोकहे शक्तिमे बडल्के आघे बह्रना उहाँ सुझाव डेली ।

कार्यक्रममे मानव अधिकारका लागि महिला एकल महिला समुहके कोषाध्यक्ष मिना भण्डारी आर्थिक प्रतिवेदन प्रस्तुत करल रहिट । समुहसे २०८२ सालमे १८ लाख ८२ हजार बराबरके टमान योजना संचालन करल बटैली । संस्थासे हिंसा प्रभावित, द्वन्द प्रभावित, सीमान्तकृत ओ एकल महिलाहुकनहे मनो परामर्श कार्यक्रम, एकल महिला बालिकाहुकनहे छात्रवृति कार्यक्रम, १६ दिने महिला विरुद्ध अभियान अन्र्तगत स्थानीय सरोकारवालासंग अन्तरक्रिया, एकल श्रमिक महिला दिवस स्थानीय सरकारविच अन्तरक्रियालगायत कार्यक्रम करटी आइल उहाँ बटैली ।

मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी संस्थासे कैटी गतिविधि ओ प्रगति प्रतिवेदन प्रस्तुत करल रहिट ।

मानव अधिकारके लागि महिला एकल महिला समुह कैलालीसे विगत २०७८ सालसे एकल महिला तथा सीमान्तकृत महिलाके सवालमे वकालत तथा पैरवी करटी आइल बटैली । यी संस्थाके कार्यक्षेत्र सुदूरपश्चिमके ९ जिल्ला रहल बा । गैह नाफा मुलक संस्था रहल उहाँ जनैली ।

मानव अधिकारका लागि महिला एकल महिला समुह कैललीके अपने भवन रहल बा कलेसे यी संस्थासे एकल महिलाके सामाजिक, सास्कृतिक, राजनितिक तथा आर्थिक सवालमे वकालत तथा पैरवी कैना करठ कलेसे विपत तथा जोखिमके साथे हिंसामे परल महिलाहुकनहे काउनसेलिङ ओ न्यायके लाग पैरवी कैना करल उहाँ जनैली । यी वर्ष यी सस्थासे ८० जनहनहे मनोपरामर्श तथा ८० जाने हिंसा पीडितहे न्याय डेहुवाइल बटैली ।

यी संस्थासे एकल महिला सवालमे सशक्तिकरण, वकालत तथा पैरवी करटी आइल बा कलेसे ६५ ठो समुह विस्तार करके ३ हजार ९९५ जाने एकल महिला सदस्यके तथ्यांक रख्न सफल रहल बा । विपन्न एकल महिला तथा सीमान्तकृत महिलाके छाई ओ टुहुरा बाल बालिका १६० जाने छात्राहुकनहे छात्रवृत्ति वितरण कैना सफल हुइल बा ।

सुदूरपश्चिम प्रदेशके ९ जिल्लामे कैलालीमे भर १४ जनहनहे प्रदान करले बा । ओस्टेक करके अन्तराष्टिय दिवस जस्टे एकल महिला दिवस, महिला श्रमीक दिवस, विश्व शान्ती दिवस १६ दिने महिला हिंसा विरुद्धके अभियान दिवस, वेपत्ता दिवस लगाएत टमान कार्यक्रम सरोकारवालासंग समन्वय करके मनैटी आइल उहाँ बटैली ।

सरोकारवालासंग टमान सहकार्य करके कार्यक्रम करटी रहल बा कलेसे समय समयमे सरोकारवालासंग समन्वयय बैठक करके सल्लाह सुझाव लेनाफे करल बा ।\

समुह विस्तार तथा हरेक समुहमे सहयोगी कक्षा संचालन ओ बचत ऋण कार्यक्रम निरन्तर चल्टी रहल बा । जेकर कारण ढेर एकल महिलासे समुहसे ऋण लेके छेगरीपालन, बंगुर पालन, तरकारी खेती, कुखुरा पालन, ढकीया बुन्न, वेसार खेती, अचार बनैना तालिम, वेमौसमी तरकारी खेती, एकल महिला छहारी निर्माणके लाग नगरपालिका तथा प्रदेश सरकारसे बजेट छुट्यइना सफल हुइल उहाँ जनैली ।

अब्बे आर्थिक सशक्तिकरण हुइल बा कलेसे टमान आपर्ना जोखिमसे बाँचल बटै कलेसे स्थानीय सरकार वडा, गाउपालिका तथा नगरपालिकामे पहँुचफे हुइल बा । जेकर कारण आपन लाग कार्यक्रम छुट्यइना सफलफे हुइना हुइल बा । स्थानीय स्तरके टमान समितिमे प्रतिनिधित्वफे करे लागल बटै ।

समाजमे एक विभेदरहित समाजके निर्माण कैना परिवर्तनके वाहकके रुपमे परिचालित हुइल बटै । मानव अधिकारके लागि महिला एकल महिला समुह कैललीसे वार्षिक अडिट तथा नविकरणफे करटी आइल बा ओ वर्षके २ चो अनुगमन तथा मुल्यांकन ओ सामाजिक लेखा परिक्षणफे कैना करल बा ।

ओस्टेक करके संस्थाके दुसरा जिल्ला अधिवेशनसे मनोदरी भण्डारीके अध्यक्षतामे नयाँ जिल्ला कार्यसमिति चयन हुइल बा । जेकर उपाध्यक्षमे धना कुमारी ओझा, सचिवमे लक्ष्मी चौधरी कोषाध्यक्षमे वेद अवस्थी, सहसचिवमे विमला देवल रहल बटै ।
ओस्टेक करके सदस्यमे हेमाकुमारी कोराला, तुल्सा जोशी, कञ्चनमाया योञ्जन तामाङ, चोहिया चौधरी, सविता चौधरी रहल बटै । ओस्टेक करके सल्लाहकारमे गोमा आचार्य रहल बटै । कार्यक्रममे समुहके सदस्यहुकनके सहभागिता रहल रहे ।