सामुदायिक वनमे बच्चासहितपाटेबाघ डेखलपाछे स्थानीय त्रासित

पहुरा समाचारदाता
धनगढी, २२ जेठ । कैलालीके कैलारी गाउँपालिकास्थित घुरहा नदी आसपास रहल सामुदायिक वनमे दुई बच्चासहित पाटेबाघ देखा परलपाछे स्थानीय त्रासित हुइल बटै ।

स्थानीयके अनुसार कैलारी गाउँपालिका–४ के गाउँस्थित हरियाली महिला सामुदायिक वन, मिलन सामुदायिक वन ओ वडा नम्बर ६ के भगतपुरस्थित सयपत्री सामुदायिक वन क्षेत्रमे डमरुसहित बाघ ओहोरदोहोर करल देखा परटी रहल हो । यी सामुदायिक वन घुरहा लडिया वारपार एक्के क्षेत्रमे रहल बटै । पछिल्का कुछ दिन यहोर डमरुसहितके बाघ डेखा परे लागलपाछे स्थानीय त्रसित बनल बटै ।

बाघसे दुई ठो गोरु, एक ठो बँदेल मारसेकल हरियाली महिला सामुदायिक वन उपभोक्ता समितिके सचिव सुनिताकुमारी चौधरी जानकारी डेलै । उहाँके अनुसार भगतपुरके स्थानीयसे बच्चासहित लडिया वारपार करटी रहल अवस्थामे बाघहे डेखल रहिट ।

ओेस्टेक करके, वनमे अपन गैया खोजे गैल के गाउँके चन्द्रकला नेपाल ओ उहाँक छावा नीरजकेफे बाघसंग कुछ मिटरके दूरीमे जम्काभेट हुइल रहे । “वनमे रहल बाँसकेझाडी लग्गे बाघ डेखलपाछे मै डरले चिल्लाई लग्लै”, प्रत्यक्षदर्शी चन्द्रकला कहलै, “छावा भर मोबाइलसे फोटु खिचे लग्लै ।”बाघसंग जम्काभेट हुइलपाछे त्रसित हुइलेसेफे फोटु खिचके केल्ह घरओर लौटल नीरज बटैलै ।

भारतके दुधुवा नेशनलपार्क लग्गे पर्ना उ क्षेत्रमे विगतमेफे पाटेबाघ ओहोरदोहोर करल अभिलेख बा । दुधुवामे बाघके सङ्ख्या ढेर हुइल कारण पोथी बाघसे भालेसे अपन डमरु जोगैना ओ हुरकाइक लाग बसन्ता कोरीडोरसहित टमान सामुदायिक वनमे बच्चा ल्यन्ना करल बटाजाइठ । हरियाली महिला सामुदायिक वनसहित अन्य सामुदायिक वनमे मोहना लडिया ओ घुरहा लडिया किनार हुइटी बाघ दुधुवासे अइना करल जनाइल बा ।

सामुदायिक वन क्षेत्र वरपर विद्यालय रहल कारण क्यामेरा ट्रयाप करके बाघके निगरानी कैना स्थानीयसे डिभिजन वन कार्यालयहे आग्रह करले बटै ।

बच्चासहित बाघ आइलपाछे विद्यालय आसपासके झाडी फडानी कैना काम हुइल स्थानीय तीर्थ नेपाल बटैलै । “वन कार्यालयसे यकर निगरानी करलेसे मजा हुइट”,उहाँ कहलै ।

डिभिजन वन कार्यालय धनगढीके वरिष्ठ डिभिजनल वन अधिकृत रामविचारी ठाकुर कैलारीस्थित सामुदायिक वनमे बाघ आइल विषयमे जानकारी नैहुइल बटैलै । यद्यपि, बाघ आइल हो कलेसे े सतर्कता अपनैना स्थानीयहे उहाँके आग्रह बा ।

सामुदायिक वनमे आइल बाघ हुलाकी राजमार्गस्थित घुुरहा लडियामे रहल पुल क्षेत्रसे लेके उत्तरओर वन क्षेत्र, लडिया किनारमे ओहोरदोहोर करटी रहल स्थानीय जनैले बटै । ओहोर ओर हिडडुुल करेबेर सतर्कता अपनैना ओइनके आग्रह बा ।

यिहे बिच, सयपत्री सामुदायिक वन उपभोक्ता समितिके सचिव नरेन्द्र थारु डमरुसहितके पोथीहे पच्छ्यइटी अब्बेफे भाले बाघफे आइल दाबी करलै । उहाँ भाले बाघ यहोर आइलपाछे पोथी बाघ अपन बच्चासहित मोहनपुर गाउँओरके वनमे भागल बटैलै ।