राष्ट्रिय मुक्ती हलिया समाज महासंघ नेपालके अध्यक्षमे रमेशराम कोली
पहुरा समाचारदाता
धनगढी, २२ जेठ । राष्ट्रिय मुक्ती हलिया समाज महासंघ नेपालके अध्यक्षमे रमेशराम कोली निर्वाचित हुइल बटै ।
विफेक रोज धनगढीमे हुइल १४औं वार्षिक साधारणसभा तथा सातौं राष्ट्रिय महाधिवेशनमे कोली निर्वाचित हुइल हइट । अध्यक्ष पदके लाग रमेश राम कोली ओ पर्वत सुनार उम्मेदवारी डेहल रहिट ।
दुई जानेक उम्मेदवारी परलपाछे हुइल निर्वाचनमे ३६ मत खसल रहे । ओम्नेसे कोली २५ मत ओ सुनार १० मत पाइल रहिट । कलेसे एक मत बदर हुइल रहे ।
बाँकी पदमे सर्वसहमतसे चयन हुइल रहे । नयाँ कार्यसमितिके उपाध्यक्ष पदमे शिवि लुहार, इन्दिरा ताम्राकार, महासचिवमे तुलाराम सार्की, कोषाध्यक्षमे सन्जु नेपाली ओ सचिवमे लालविर सार्की रहल बटै ।
ओस्टेक सदस्य पदमे राजुराम भुल, कौशिला दमाई, जगदिश कुमार चुनारा, जयलाल विक, रोशनीकुमारी सुनार, मानवती वड, तिलसरा विक ओ चन्द्रकलाकामी रहल बटै ।
उहीसे आघे महासंघके अध्यक्ष ईश्वर सुनारके अध्यक्षतामे हुइल उदघाटन कार्यक्रममे प्रमुख अतिथि भुमि व्यवस्था कृषि तथा सहकारी मन्त्री विरबहादुर थापा ओ विशिष्ट अतिथि संविधान सभा सदस्य हरि श्रीपाइली रहल रहिट । कार्यक्रममे टमान व्यक्तिहुकनहे सम्मान कैगिल रहे ।
कार्यक्रमके संचालन राष्ट्रिय मुक्ती हलिया समाज महासंघ नेपालके कार्यकारी निर्देशक हरिसिंह बोहरा करल रहिट ।
