पत्रकार महासंघसे प्रदेश सरकारसे साढे ५ करोड ढेर बजेट माग
पहुरा समाचारदाता
धनगढी, २४ जेठ । नेपाल पत्रकार महासंघ सुदूरपश्चिम प्रदेश समितिसे अइना आर्थिक वर्ष २०८३÷८४ के लाग पत्रकारिता क्षेत्रके विकास, पूर्वाधार निर्माण तथा पत्रकार कल्याणके कार्यक्रम सञ्चालन कैना सुदूरपश्चिम प्रदेश सरकारसंग ५ करोड ६५ लाख रुप्या बजेट माग करल बा ।
महासंघके प्रदेश अध्यक्ष भरतबहादुर शाहसे आन्तरिक मामिला मन्त्रालयमार्फत प्रदेश सरकारसमक्ष पेश करल बजेट प्रस्तावमे पत्रकार महासंघके भवन निर्माण तथा मर्मत, सञ्चार माध्यमके संस्थागत विकास, पत्रकार क्षमता अभिवृद्धि, लोककल्याणकारी विज्ञापन तथा पत्रकार कल्याणसम्बन्धी टमान कार्यक्रमके लाग बजेट विनियोजन कैना आग्रह करल बा ।
महासंघ प्रदेश समितिके भवन मर्मतके लाग ३० लाख रुप्या, सञ्चार माध्यमके संस्थागत विकास अनुदानके लाग १ करोड ५० लाख रुप्या तथा लोककल्याणकारी विज्ञापनके लाग १ करोड रुप्या बजेट माग करल बा । ओस्टे, नौ जिल्लाके पत्रकारके लाग क्षमता अभिवृद्धि कार्यक्रम सञ्चालन कैना ३० लाख रुप्या प्रस्ताव करल बा ।
बजेट प्रस्तावमे बाजुरा, बैतडी, अछाम ओ बझाङ शाखाके अधुरा भवन निर्माण सम्पन्न कैना प्रत्येक शाखाके लाग २५–२५ लाख रुप्या माग करल बा । महासंघसे पत्रकारिता पुरस्कार सञ्चालनके लाग २५ लाख रुप्याके अक्षयकोष स्थापना तथा पत्रकार स्वास्थ्य उपचार सहयोग कोषमे थप ६० लाख रुप्या विनियोजन कैनाफे आग्रह करल बा ।
ओस्टेक करके, नौ जिल्ला शाखाके सदस्य पत्रकारहुकनके दुर्घटना बीमाके लाग १० लाख रुप्या, पत्रकारके लाग लेखनवृत्ति कार्यक्रम सञ्चालन कैना ३० लाख रुप्या, प्रदेशस्तरीय मिडिया सम्मेलनके लाग २० लाख रुप्या तथा आमसञ्चार विषय अध्ययन कैना विद्यार्थीके लाग छात्रवृत्ति कार्यक्रम सञ्चालन कैना १० लाख रुप्या बजेट माग करल बा ।
महासंघसे पत्रकारिता क्षेत्रके संस्थागत सुदृढीकरण, प्रविधिमैत्री क्षमता विकास तथा पत्रकारके सामाजिक सुरक्षाके लाग यी कार्यक्रम आवश्यक रहल उल्लेख करल बा । प्रस्तावके बोधार्थ मुख्यमन्त्री तथा मन्त्रिपरिषद्के कार्यालय ओ आर्थिक मामिला मन्त्रालयहे समेत पठाइल बा ।
