विपन्न परिवारहे प्रगतिशील दिदीबहिनी समाजसे सहयोग

पहुरा समाचारदाता
हसुलिया, २५ जेठ । कैलाली जिल्ला कैलारी गाउँपालिका वडा नम्बर ५ बैसपुरमे रहल एक विपन्न परिवारहे प्रगतिशील दिदी समाजहे खाद्यन्न सहयोग करले बा ।

कैलारी गाउँपालिका वडा नम्बर ३ स्थित बरका मुडा (सुरमिहान) घर हुके टमान गाउँ भोज हुके गैल दिदीबहिनीयाहुकनसे गठन कैगिल प्रगतिशील दिदी समाजसे सामाजिक उत्तरदायित्व तथा मानव सेवा अन्र्तगत एक परिवारहे खाद्यन्न सहयोग करल हो ।

समाजसे सहयोग करल उ एक ठो विपन्न परिवार हो, कैलारी गाउँपालिका वडा नम्बर ३ स्थित शिवरत्नपुरके बाढसे विस्थापित छुकनी चौधरी ओ मनिराम चौधरी । तीन बरस आघे मोहना लडियक कटानसे शिवरत्नपुरके १६ घरपरिवार विस्थापित हुइल ।

म्ने छुकनी ओ मनिरामके परिवारफे विस्थापित हुइल पुगल रहे ।समाजसे ३० किलो चाउर, २० किलो गोहु, पाँच लिटर खैना तेल, एक किलो सुखल मिर्चा, नोन चार पाकेट, मसला, आलु, लसुन, लहैना साबुन, सर्फ, कोलगेटलगायत टिना टावन सहयोग करल समाजके अध्यक्ष रामप्यारी चौधरी बटैली ।

उहाँ कहली हमार करल सहयोग भारी टे नैहो मने यिहीसे कुछ दिन उहाँहुकनहे समस्या नैपरी । हम्रेफे दिदीबहिनी मासिक बचत कैठी बचत करल पैसासे उहाँहुकनहे सहयोग करल हुई । हमार जस्टे आउर जानेफे सहयोग करलेसे विपन्न परिवारहे मजा रही । उ संगे कुछ नगद ओ लर्कनके लाग शैक्षिक सामाग्री डेगिल बा ।

सहयोग हस्तान्तरणमे बसन्ता गाउँक भल्मन्सा बाबुराम चौधरी ओ उ टोलके भल्मन्सा शान्तीदेवी चौधरीके उपस्थितिमे रहे । बसन्ता गाउँक भल्मन्सा बाबुराम चौधरी कहलै, डिडीबहिनी समाजके यी सह्रनिय कार्य हो । हम्रे लग्गे हुकेफे असिन सहयोग करे नैसेक्ले हुई । उहाँहुक्रे मजा ठाउँमे सहयोग करलैं । जौन एकदम विपन्न परिवार हो ।

उ टोलके भल्मन्सा शान्तीदेवी चौधरी कहली, बैठना घरफे मजा नैहुइन । बैठना घर छोटमोट झोपरी बाटिन । जेम्ने खाना पकैठै ।

खापिके एक ठाउँमे भाँडाकुडा सारके ओम्नेहे सुटठै । मानसिक सुस्त रहल धनीराम चौधरीके सुटना झोपरी झन नाजुक बाटिन । तीन जाने लर्कनहे अपने अपन घरमे सुटना ठाउँ डेहल उहाँ बटैली ।

खानेपानीके लाग नल्काफे नैहुइन, मै बत्ती अपन घरसे डैदेले बटु । जेकर टेकर डेहलसे अभिनसम गुजारा चल्टी बाटिन ।

छुकनी चौधरी ओ मनिरामके थेन शिवरत्नपुर बैठेबेरफे खासे जग्गा जमिन नैरहे । मजदुरी करके दैनिक गुजारा जेनटेन चलल रहे । शिवरत्नपुर बैठबेर भारतिय बजार चन्दनचौकीमे मजदुरी करके परिवारके खर्च जेनतेन चलल रहे ।

विस्थापित हुइलपाछे उहाँहुकनके अवस्था झन नाजुक हुई पुगल । उ परिवारमे अब्बे काम करके खवाई सेक्ना कोईफे नैहुइट । मनिराम चौधरीके परिवारमे हुकान गोसिनीय छुकनी देवी चौधरी विमारहुके कम्जोर हुइल अब्बे पङघुल हस हुइल बटी । कलेसे बरका छावा २५ बरसके धनीराम चौधरी सुस्त मनस्थितिके अपाङता रहल व्यक्ति हुइट । मनिरामके ६ ठो सन्तान रहिन । जौन दुई छाई भोज कैके गैगिल बटिन । ओइनेफे घरेक आर्थिक अवस्था कम्जोर डेखके पहरटी पहरही छोटेम बालविवाह करल रहिट । कलेसे बरका छावा धनिराम मानसिक रुपमे सुस्त बटै ।

शिवरत्नपुर बैठेबेर छुकनीफे चन्दनचौकीके बाजीनके डोकन साफसुफ कैडेना, खाइल भाँरा, कपरा ढोडेना करिट । उ बाफत उहाँ चाउर, तेल, नोन मिर्चा पाइट जिहीसे गुजारा चले । लडियक कटानसे विस्थापित हुके बैसपुर आइलपाछे अब्बे चन्दनचौकीफे दुर हुइल बा । छुकनी विमार हुके पाङघुल हस हुइल बटी, मनिरामफे कम्जोर हुके काम करेसेक्ना अवस्था नैहुइट ।