लुम्बिनी प्रदेशके नवनियुक्त पाँच मन्त्रीके शपथग्रहण

पहुरा समाचारदाता
दाङ २५ जेठ । लुम्बिनी प्रदेश सरकारके मन्त्रिपरिषद् पुनर्गठनसंगे नवनियुक्त पाँच जाने मन्त्री पद तथा गोपनीयताके शपथ ग्रहण करले बटै ।
प्रदेश प्रमुख कृष्णबहादुर घर्तीमगरसे सोम्मार नवनियुक्त मन्त्रीहुकनहे पद तथा गोपनीयताके शपथ कराइल हो ।
मुख्यमन्त्री चेतनारायण आचार्यके सिफारिसमे नेपालके संविधानके धारा १६८ के उपधारा (९) बमोजिम मन्त्रीपरिषद् पुनर्गठन करल बा ।
पुनर्गठित मन्त्रिपरिषदमे एमालेसे चार जाने ओ जनता समाजवादी पार्टीसे एक जाने करके पाँच जाने नयाँ मन्त्री नियुक्त हुइल बटै ।
नयाँ नियुक्त मन्त्रीमे तुलसी प्रसाद चौधरी, डिल्लीराज भुसाल, रामजी प्रसाद घिमिरे, रत्नबहादुर खत्री ओ भण्डारीलाल अहिर रहल बटै ।
तुलसी प्रसाद चौधरीहे कृषि, भूमि व्यवस्था तथा सहकारी मन्त्रालय, डिल्लीराज भुसालहे ऊर्जा, जलस्रोत तथा सिँचाइ मन्त्रालय, रामजी प्रसाद घिमिरेहे स्वास्थ्य मन्त्रालय, रत्नबहादुर खत्रीहे भौतिक पूर्वाधार विकास मन्त्रालय तथा भण्डारीलाल अहिरहे आन्तरिक मामिला तथा कानून मन्त्रालयके जिम्मेवारी डेहल बा ।
शपथ ग्रहण कार्यक्रममे मुख्यमन्त्री चेतनारायण आचार्य, पूर्व मुख्यमन्त्री जोखबहादुर महरा, सभामुख तुलाराम घर्तीमगर, उपसभामुख मेनुका खाँड केसी लगायतके उपस्थिति रहल रहे ।