लुम्बिनी प्रदेशमे अध्यक्षमे पहिल चो तेस्रोलिंगी उपस्थिति

पहुरा समाचारदाता
दाङ, २५ जेठ । लुम्बिनी प्रदेश नागरिक समाज युवा मञ्चके अध्यक्षमे तेस्रोलिंगी वर्षा ठकुरी निर्वाचित हुइल बटी । लुम्बिनी प्रदेशके भालुवाङमे सम्पन्न १२ जिल्लाके युवाहुकनके सम्मेलनसे तेस्रोलिंगी ठकुरीहे अध्यक्षमे निर्वाचित करल हो ।

उहाँसंगे चुनावी प्रतिस्पर्धामे रहल पुरुष ओ महिला उम्मेदवार पराजित हुइल बटै । वर्षा ३ मतके अन्तरसे निर्वाचित हुइल हुइट । उहाँ यिहीहे हार–जितके रूपमे नैहुके सक्कुहुनके साझा जितके रूपमे लेहेपर्ना बटैले बटी ।

फरक पहिचान समाज नेपाल ओ मायाको पहिचान नेपालमे कार्यरत वर्षाके अध्यक्षतामे १३ सदस्यीय कार्यसमिति चयन हुइल बा । पहिल चो लुम्बिनी प्रदेश नागरिक समाज युवा मञ्चके अध्यक्षमे तेस्रोलिंगी व्यक्ति निर्वाचित हुइलहे यौनिक तथा लैङ्गिक अल्पसंख्यक समुदायसे महत्वपूर्ण उपलब्धीके रूपमे लेहल बा ।

लुम्बिनी प्रदेश युवा मञ्चके सह–अध्यक्षमे आस्था बि.क. ओ सदस्य सचिवमे प्रियङ्का गिरी निर्वाचित हुइल बटै । सदस्यमे समीक्षा पुन मगर, रुद्रमणि भुसाल, कविता बुढा, विष्णु बि.क., रवि बि.क., अमृत बि.क., आशिष शक्ति राज, रेजिना मिया, रमेश बड ओ समीक्षा बि.क. निर्वाचित हुइल बटै । मायाको पहिचान नेपाल ओ फरक पहिचान समाज नेपालसे लुम्बिनी प्रदेशमे यौनिक तथा लैङ्गिक अल्पसंख्यक समुदायके प्रतिनिधित्वसँग सम्बन्धित एक महत्वपूर्ण उपलब्धि हासिल हुइल बटैले बटै ।

लुम्बिनी प्रदेशके १२ जिल्लाके युवाहुकनके सहभागितामे सम्पन्न युवा सम्मेलनसे यौनिक तथा लैङ्गिक अल्पसंख्यक (एलजीबीटीआईक्यूए+) समुदायके प्रतिनिधि वर्षा ठकुरी लुम्बिनी प्रदेश नागरिक समाज युवा सञ्जालके अध्यक्ष पदमे निर्वाचित हुइल बटी ।

मायाको पहिचान नेपाल ओ फरक पहिचान समाज नेपालसे यिही उपलब्धिहे कौनो एक व्यक्तिके सफलता केल्ह नैहुके सक्कु यौनिक तथा लैङ्गिक अल्पसंख्यक समुदायके सामूहिक विजयके रूपमे व्याख्या करले बटै ।

दुनु संस्थासे लोकतन्त्रके वास्तविक अभ्यास कहल सीमान्तकृत तथा बहिष्कृत समुदायके अर्थपूर्ण ओ समावेशी सहभागिता सुनिश्चित कैना रहल उल्लेख करटी समाजके सक्कु तह ओ संरचनामे समान अवसर ओ प्रतिनिधित्व आवश्यक रहल बटैले बटै ।
संस्थाके अनुसार छोट समयमे यौनिक तथा लैङ्गिक अल्पसंख्यक समुदायके प्रतिनिधि सम्मानित नेतृत्वदायी भूमिकामे निर्वाचित हुइना गौरवके विषय हो । यी उपलब्धिसे समावेशिता, समानता ओ सशक्तीकरणके लाग हुइटी रहल अभियानहे थप ऊर्जा, उत्साह ओ प्रतिबद्धतासहित आघे बह्रैना प्रेरणा प्रदान करल ओइनके कहाई बा ।

मायाको पहिचान नेपाल ओ फरक पहिचान समाज नेपालसे यी सफलतासे आगामी दिनमे अझ प्रभावकारी हस्तक्षेप, व्यापक प्रतिनिधित्व ओ समुदायके नेतृत्व विकासके लाग काम कैना थप प्रेरित करल बटैले बटै ।