नवनियुक्त मन्त्रीनसे सपथ ग्रहण

पहुरा समाचारदाता
धनगढी, २६ जेठ । सुदूरपश्चिम प्रदेश सरकारके ंनवनियुक्त मन्त्री ओ राज्यमन्त्रीहुक्रे पद् तथा गोपनीयताके सपथ ग्रहण करले बटै ।
प्रदेश प्रमुखके कार्यालयमे आयोजित सपथ ग्रहण समारोहमे प्रदेश प्रमुख नजिर मियाँसे मन्त्रीहुकनहे पद् तथा गोपनीयताके सपथ ग्रहण कराइल हुइट ।

नेपाली कांग्रेससे अपन यी आघेक मन्त्रीहुकनहे फिर्ता बोलाके नयाँ मन्त्री पठैले बा । नवनियुक्त मन्त्री विक्रमसिंह धामी आर्थिक मामिला मन्त्रालयके जिम्मेवारी प्राप्त करले बटै ।

दार्चुलास्थित मार्मा–३ स्थायी ठेगाना रहल धामी निर्वाचन क्षेत्र नम्बर १ (१) से प्रदेश सभा सदस्यमे निर्वाचित हुइल रहिट । २०३४ सालसे उहाँ राजनीतिक जीवन सुरुवात करल रहिट । धामी २०५० सम नेविसंघ दार्चुलाके अध्यक्ष रहिट । ओस्टेक करके मन्त्री मानबहादुर रावल उद्योग, पर्यटन, वन तथा वातावरण मन्त्रालयके जिम्मेवारी पैले बटै ।

अछामके मंगलसेन नगरपालिका–९ धामी गाउँ वली गाउँ स्थायी ठेगाना रहल उहाँ अछाम निर्वाच क्षेत्र नम्बर २ (२) से प्रदेश सभा सदस्यमे निर्वाचित हुइल रहिट । २०६३ सालसे रावल राजनीतिमे सक्रिय रहल रहिट ।

ओस्टे, नवनियुक्त मन्त्री बेलबहादुर रानामगर सामाजिक विकास मन्त्रालयके जिम्मेवारी प्राप्त करले बटै । कञ्चनपुरके दोधारा चाँदनी नगरपालिका–७ लक्ष्मी चौराहा स्थायी ठेगाना रहल उहाँ कञ्चनपुर निर्वाचन क्षेत्र नम्बर ३ (२) से प्रदेश सभा सदस्यमे निर्वाचित हुइल रहिट । रानामगरके राजनीतिक जीवन २०३८ सालसे सुरु हुइल रहे ।

ओस्टे करके, जुना दानी भौतिक पूर्वाधार विकास राज्यमन्त्री ओ मधु भारती सामाजिक विकास राज्यमन्त्रीके रुपमे सपथ ग्रहण करल बटै । प्रदेश प्रमुखके उपस्थितिमे मुख्यमन्त्री कमलबहादुर शाह उहाँहुकनहे पद् तथा गोपनीयताके सपथ ग्रहण करैलै ।

नेपाली कांग्रेससे तत्कालीन आर्थिक मामिलामन्त्री बहादुरसिंह थापा, सामाजिक विकासमन्त्री मेघराज खड्का ओ उद्योग, पर्यटन, वन तथा वातावरणमन्त्री शिवराज भट्टसहित राज्यमन्त्री सरस्वती खड्का एवम् प्रकाशबहादुर बमहे फिर्ता बोलैले बा । यी आघे, सत्तारुढ दल नेकपा (एमाले) सेफे अपन मन्त्री फेर्ना चर्चा चलल रहे । मने, सरकारमे रहल मन्त्रीहुकनके विरोधपाछे एमाले मन्त्री फेरबदल कैना निर्णयसे पाछे हटल बटाइल बा ।

सपथ ग्रहण समारोहमे मुख्यमन्त्री कमलबहादुर शाह, पूर्व मुख्यमन्त्री राजेन्द्रसिंह रावल, मन्त्रीहुक्रे, प्रदेश सभा सदस्यहुक्रे, राजनीतिक दलके नेताहुकनके उपस्थिति रहल रहे ।

ओस्टेक करके मंगरके रोज सुदूरपश्चिम प्रदेशके नवनियुक्त उद्योग, पर्यटन, वन तथा वातावरण मन्त्री मानबहादुर रावलहे निवर्तमान मन्त्री शिवराज भट्ट मन्त्रालयमे पुगके स्वागत करले बटै ।

पद हस्तान्तरण तथा स्वागतके यी सौहार्दपूर्ण शैलीके सर्वत्र प्रशंसा हुइटी रहल बा । राजनीतिक परिवर्तन स्वाभाविक प्रक्रिया हुइलेसेफे जिम्मेवारी हस्तान्तरणके क्रममे डेखल आपसी सम्मान ओ सहकार्यके भावनाहे सकारात्मक रूपमे हेरल बा ।