युवकके हत्या आरोपमे अक्के परिवारके तीन जाने पक्राउ

पहुरा समाचारदाता
धनगढी, २८ जेठ । कैलालीमे एक युवकके हत्या करल आरोपमे एक्के परिवारके तीन जाने पक्राउ परल बटै ।
कैलालीके धनगढी उपमहानगरपालिका–९ त्रिवेणीघाटस्थित मोहना लडिया किनारमे बेवारिसे अवस्थामे फेला परल २० वर्षीय राजकुमार रानाके हत्या हुइल खुलल प्रहरी जनैले बा ।

जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) योगेन्द्र तिमिल्सिना अँटवार मृत भेटल कैलारी गाउँपालिका–९ गदरियाके रानाके हत्या हुइल प्रारम्भिक अनुसन्धानसे डेखाइल जानकारी डेलै ।

उहाँक अनुसार हत्यामे संलग्न हुइल अभियोगमे धनगढी उपमहानगरपालिका–८ के एक्के परिवारके ६० वर्षीय बम्मन राना, ५८ वर्षीया भँगु राना ओ २० वर्षीया गीता रानाहे पक्राउ करल बा । ओइनेसहित चार जाने रानाके कुटपिट करके हत्या करके शव मोहना लडिया किनारमे फेकल डेखल प्रहरीके कहाई बा ।

योजना बनैले रहिट भारतीय युवक

राजकुमारके शव जेठ–२४ गते धनगढी उपमहानरगपालिका–९ त्रिवेणी घाटस्थित मोहना लडिया किनारमे भेटल रहे । राजकुमारके हत्यामे एक्के परिवार संलग्न रहल बा । राजकुमारहे घरे बोलाके करल रहिट निर्घात कुटपिट ।

उहाँक हत्या आरोपमे धनगढी उपमहानगर–८ के ६० वर्षीय बम्मन राना, उहाँक गोसिनीय ५८ वर्षीय भंगु राना ओ छाई २० वर्षीया गीता रानाहे पक्राउ जिल्ला प्रहरी कार्यालय कैलालीके प्रवक्ता डिएसपी योगेन्द्र तिमिल्सिना जानकारी डेलै । हत्यामे संलग्न एक भारतीय युवक भर फरार बटै ।

चार जाने मिलके राजकुमारउप्पर कुटपिट करके हत्या करके ओ शव मोहना लडिया किनारमे लैजाके फेकल अनुसन्धानसे खुलल बा ।
प्रहरीके अनुसन्धानसे हत्याके कारण त्रिकोणात्मक प्रेम सम्बन्ध डेखल बा ।

अनुसन्धानअनुसार गीता भारतीय युवकसँग प्रेम सम्बन्धमे रहिट । मने विचमे सम्बन्धमे दरार आइलपाछे उहाँ राजकुमारसँग प्रेम सम्बन्धमे रहल खुलल बा । ओइने भोज कैनासमके तयारी करलफे अनुसन्धानसे खुलल बा ।

पाछे भारतीय युवकफे लग्गे हुइल रहिट । विवाद हुके भारतीय युवकहे गीता साथ डेहलपाछे उ राजकुमारके हत्या कैना योजना बनैले रहिट । अपन योजना उहाँ गीता ओ उहाँक परिवारहेफे सुनाइल प्रहरीके अनुसन्धानसे खुलल बा ।
सक्कु जाने सहमत हुइलपाछे गीता राजकुमारहे भेटे आई कहिके साँझके घरमे बोलैले रहिट । उ बेला भारतीय युवकफे गीताके घरमे रहिट ।
राजकुमार वहाँ पुगलपाछे परिवारके सक्कु जाने मिल्के उहाँ उप्पर निर्घात कुटपिट करल रहिट । कुटपिटसे उहाँक घटनास्थलमे मृत्यु हुइल रहे ।
चारु जाने मिल्के उहे रात राजकुमारके शव घरसे झन्डे डेढ किलोमिटर दुर रहल मोहना लडिया किनारमे लैजाके फेकल अनुसन्धानसे खुलल डिएसपी तिमिल्सिना बटैले बटै ।
डिएसपी तिमिल्सिनाके अनुसार हत्या करलपाछे गीताफे भारत भागल रहिट । उहाँहे भारतके प्रहरीके सहयोगमे पक्राउ करके बुधके सकारे केल्ह कैलाली ल्यानल ओरसे थप अनुसन्धान बाँकी बा ।

भारतीय प्रहरीके सहयोगमे गीता पक्राउ परलेसेफे उहाँक प्रेमी भर भाग्न सफल हुइल डिएसपी तिमिल्सिना बटैलै ।
राजकुमार हत्या घटनाके आरोपी गीताके बाबा, डाई बिरुद्ध जिल्ला अदालतसे म्याद थप हुके कर्तव्य ज्यान मुद्दा चलैना करके थप अनुसन्धान हुइटी रहल प्रहरी जनैले बा । राजकुमारके हत्यामे संलग्न गीताहे बुधके प्रहरी म्याद थपके लग अदालत लैजैना तयारी करल रहे । योजना बनुइया भारतीय युवकके भर खोजी कार्य जारी रहल प्रहरी जनैले बा ।