यूवा/विद्यार्थी तथा सीमान्तकृत समुदायके सवालबारे अन्तरक्रिया
शिवानी चौधरी
धनगढी, २८ जेठ । नागरिक अधिकार, जवाफदेहितता ओ समावेशी सुशासनके सन्दर्भो बर्तमान परिवेशमे यूवा/विद्यार्थी तथा टमान सीमान्तकृत समुदायके मुख्य सवाल उप्पर सरोकारवालाहुकनसंगे विफेक रोज अन्तरक्रिया कार्यक्रम सम्पन्न हुइल बा ।
लोकतान्त्रिक सहभागिताका लागि नागरिक संलग्नता प्रवद्र्धन परियोजना संचार प्रतिष्ठान नेपाल तथा यूएनडिपीके सहकार्यमे यूवा÷विद्यार्थी तथा टमान सीमान्तकृत समुदायके मुख्य सवाल उप्पर सरोकारवालाहुकनसंगे अन्तरक्रिया कैगिल हो ।
संचार प्रतिष्ठान नेपालके अध्यक्ष हेमकर्ण विकके अध्यक्षतामे हुइल कार्यक्रममे मुख्य वक्ता सुदूरपश्चिम प्रदेश सामाजिक विकास समिति सभापति धर्मराज पाठक रहल रहिट । कार्यक्रममे उहाँ कहलै पहिले यूवा/विद्यार्थी तथा टमान सीमान्तकृत समुदायके मुख्य सवाल उठे नैसेकल रहे । अब्बे संघ, प्रदेश ओ स्थानीय तहमे टमान ऐन कानून बन्टी गैल अवस्थामे मुद्दाके उठानसंगे सम्बोधनफे हुइटी गैल बा । प्रदेश सरकारफे टमान ऐन कानून बनैटी गैल, तुरुन्ते सक्कु सवालके समाधान करेनैसेक्लेसेफे विस्तारे सम्बोधन करे सेक्जाई ।
कार्यक्रममे प्रदेश सभा सदस्य गीता चौधरी आवश्यकता ढेर ओ स्रोत साधान न्यून रहल कहटी उठाइल माग विस्तारे पुरा यूहुइना बटैली । ओस्टे प्रदेश सभा सदस्य लक्ष्मी विक सुदूरपश्चिम प्रदेशमे ढेर कानून बनल मने कार्यान्वयन नैहुइल बटैली ।
कार्यक्रममे यूवा विद्यार्थीहुकनके सवालबारे बर्षा सुनार प्रस्तुत करल रहिट । ओस्टेक करके लोपोन्मुख राजी जातीके मुख्य सवाल मानकुमारी राजी प्रस्तुत करल रहिट । कार्यक्रममे अपाङगता हुइल व्यक्तिहुकनके प्रमुख समस्या सवाल, वादी समुदायके सवालफे प्रस्तुत कैगिल रहे ।
मुक्तकमैया,कमलरीके सवाल ओ मुद्दाबारे प्रस्तुतीकरण सोन चौधरी, महिलाके समसमायिक सवाल निर्मला गुरुङ ओ लैगिङक तथा यौनिक अल्पसंख्यक समुदायके मुख्य सवाल राज चौधरी प्रस्तुत करल रहिट । कार्यक्रममे डा. ओम पाण्डे, डिल्लीराज भट्ट आपन बाट राखल रहिट । कार्यक्रममे सहजीकरण लोकतान्त्रिक सहभागिताका लागि नागरिक संलग्नता प्रवद्र्धन परियोजनाके सतितानन्द जोशी करल रहिट । कलेसे कार्यक्रम संचालन अग्रज पत्रकार मनमोहन स्वाँर करल रहिट ।
