सुदूपश्चिम प्रदेशके २६ पालिका नैउठाइल रासायनिक मल

पहुरा समाचारदाता
धनगढी, २८ जेठ । सुदूरपश्चिम प्रदेशके ९ जिल्लाके २६ पालिकाहे विनियोजन करल रासायनिक मल हालसम नैउठैले हो । कृषि, वन तथा पर्यावरण मन्त्रालय सम्बन्धित निकायहे कैचो जानकारी करैलेसे फेन मल उठैना विषयमे चास नैडेहल अवस्था बा । उ पालिकासे तुरुन्ते मल नैउठाइलमे कृषि सामग्री कम्पनी लिमिटेड ओ साल्ट ट्रेडिङ कर्पोरेशनके डिपोमार्फत किसानहे सिधे मल बिक्री करना मन्त्रालयके चेतावनी बा ।

मन्त्रालयसे करल पाछे निर्णय अनुसार डडेल्धुरा, बैतडी, दार्चुला, बाजुरा, बझाङ ओ डोटी जिल्लाके स्थानीय तहसे तोकल परिमाणके मल नैउठाइल कृषि सामग्री ओ साल्ट ट्रेडिङके तथ्यांक बा । साथे कैलालीके गोदावारी नागपालिका २१ हजार २३० किलो, गौरीजंगग नगरपालिका ६ हजार ६९० किलो, जानकी गाउँपालिका १० हजार २५० किलो ओ धनगढी महानगपालिका २१ हजार ५०० किलो रासायनिक मल उठैले नैहो ।

अस्टेक, कञ्चनपुर जिल्लाके कुछ पालिका फेन रासायनिक मल उठैले नैहो । यहाँक भिमदत्ता नगरपालिका १ लाख ६ हजार ८०० किलो ओ बेदकोट नगरपालिका १ लाख ६ हजार ४ सय किलो मल उठैले नैहो ।

अस्टेक, अछाम जिल्लामे परना ५ ठो स्थानीय तहमध्ये साँफेबगर नागरपालिका, बन्नीगढ जयगढ गाउँपालिका ओ कमल बजार नगरपालिका मल लैजिना बाँकी बा ।

खेतीपातीके मुख्य सिजन धान रोपाई सुरु होसेक्लेसे फेन सम्बन्धित निकाय मल ढुवानी नैकरलपाछे किसानहे मलके समस्या डेखाइल हो ।

स्थानीय तह रासायनिक मल उठैना तथा वितरण प्रक्रियामे आवश्यक समन्वय नैकैके किसानसम मल समयमे पुगे नैसेकल अवस्था बा । वर्षे धान रोपाइँके समय अइलेसे फेन मल वितरणमे हुइल ढिलाइसे किसान प्रभावित हुइना जोखिम बह्रल बा ।

सुदूरपश्चिम प्रदेशसे पैना कोटामध्ये हाल कृषि सामग्री कम्पनी मार्फत उपलब्ध हुइना रासायनिक मलमध्ये कैलालीमे ५२ प्रतिशत ओ कञ्चनपुरमे ३२ प्रतिशत मल वितरण हुइना व्यवस्था बा । बाँकी १६ प्रतिशत मल डडेल्धुरा, बैतडी, दार्चुला, बाजुरा, बझाङ, अछाम ओ डोटीलगायत अन्य जिल्लाके स्थानीय तहहे छुट्याइल बा । मने यी जिल्लाके सरोकारवाला निकाय मल लैजाइ सेक्ले नैहुइटैं ।

ओस्टेक, सुदूरपश्चिम प्रदेशमे साल्ट ट्रेडिङ कर्पोरेशनमार्फत वितरण हुइना मलमध्ये कैलालीमे ३४ प्रतिशत ओ कञ्चनपुरमे ५४ प्रतिशत हिस्सा बा । बाँकी १२ प्रतिशत मल अन्य जिल्लाके स्थानीय तहमे वितरण करना व्यवस्था रहलेसे फेन उ जिल्लासे अपेक्षित रूपमे मल उठाइ सेकल नैहो । सुदूरपश्चिम प्रदेशमे ४३ पालिकासे रासायनिक मल बिक्री करटि आइल बा । यीमध्ये १७ पालिकासे लैगिलेसे फेन २६ पालिका मल लैजाइ नैसेकल अवस्था बा ।

कृषि सामग्री कम्पनी लिमिटेडके जिल्ला शाखा कार्यालयसे झण्डे १० करोड केजी मल नैउठल

ओहोर, कृषि सामग्री कम्पनी लिमिटेडके टमान जिल्लास्थित वितरण व्यवस्था महाशाखासे झण्डे १० करोड केजी रासायनिक मल नैउठल पाइल बा ।

कृषि कम्पनीके जिल्ला शाखा कार्यालयमे रहल ९ करोड ८२ लाख ३५ हजार ४५० किलो रासायनिक मल नैउठाइल कृषि, वन तथा पर्यावरण मन्त्रालय जनैले बा ।

जिल्लास्थित शाखा कार्यालयमे केन्द्रसे मल पठैलेसे फेन उठे नैसेकल ओरसे किसान समयमे मल प्राप्त करे नैसेकल अवस्था नैडेखाइठ ।

कोशी प्रदेशके शाखा कार्यालयमे १ करोड १९ लाख ५४ हजार ५०० केजी यूरिया मल मौज्दात रहल बा कलेसे, डीएपी २० लाख ९२ हजार ६०० केजी मौज्दात बा । ओस्टेक, पोटास ३२ लाख ४८ हजार ८५० केजी मौज्दात रहल कम्पनीके तथ्यांक बा । मने शाखा कार्यालयसे नैउठल अवस्था डेखाइठ ।

अस्टेक, मधेश प्रदेशके शाखा कार्यालय फेन रासायनिक मल नैउठल अवस्था बा । यी प्रदेशमे टमान शाखा कार्यलयमे ३ करोड ११ लाख ३१ हजार २०० केजी यूरिया, १ करोड १४ लाख ५६ हजार २०० केजी डीएपी ओ ५५ लाख ८४ हजार ६०० केजी पोटास मल मौज्दात बा ।

अस्टेक, बागमती प्रदेशमे ४० लाख ९३ हजार ३०० केजी यूरिया, ५ लाख ९९ हजार १५० केजी डीएपी ओ २ लाख ५१ हजार ७५० केजी पोटास मौज्दात रहल कृषि कम्पनीके तथ्यांक बा ।

गण्डकी प्रदेशके जिल्ला शाखामे ४ लाख ६ हजार ६५० केजी यूरिया, १ लाख ३० हजार ८०० केजी डीएपी ओ ६१ हजार ८०० केजी पोटास मौज्दात बा । मने यहाँसे फेन मल नैउठाइल अवस्था बा ।

अस्टेक, लुम्बिनी प्रदेशके जिल्ला कार्यालयमे १ करोड ५० लाख ३५ हजार ८५० केजी यूरिया, ४६ लाख ४३ हजार ९०० केजी डीएपी ओ ४४ लाख १२ हजार ४०० केजी पोटास मौज्दात बा ।

कर्णाली प्रदेशके कृषि कम्पनीके जिल्ला शाखामे २ लाख १२ हजार २५० केजी यूरिया, ७४ हजार ६५० केजी डीएपी, ४८ हजार ९५० केजी पोटास मौज्दात बा ।

अस्टेक, सूदूरपश्चिम प्रदेशस्थित कृषि कम्पनीके जिल्ला शाखामे २४ लाख ५४ हजार १०० केजी यूरिया, २ लाख ९३ हजार २५० केजी डीएपी ओ ४ लाख २३ हजार २०० केजी पोटास मौज्दात बा ।