पीडितके न्यायमे पहुँच विषयक अन्तरक्रिया
पहुरा समाचारदाता
धनगढी, २९ जेठ । अनौपचरिक सेवा केन्द्र (इन्सेक) सुदूरपश्चिम प्रदेश कार्यालयके आयोजनामे पीडितके न्यायमे पहँु विषयक अन्तरक्रिया कार्यक्रम शुकके रोज धनगढीमे सम्पन्न हुइल बा ।
पीडितहुकनके न्यायमे पहुँच पुगाइक लाग पीडित पक्ष ओ सरोकारवाला निकायहुकन विच अन्तरक्रिया कार्यक्रम कैगिल हो । इन्सेक प्रदेश संयोजक खडकराज जोशीके सहजीकरणमे जबरजस्ती करणी पीडित, अंश नैपाइल, जलम दर्ता, सम्बन्ध विच्छेद तथा जग्गा अंशसे पीडितहुक्रे सरोकारवाला निकाय समक्ष आपन बाट राखल रहिट ।
जबरजस्ती करणीसे पीडितहुक्रे पीडकसे टमान मेरिक धम्कीपाइल बटैले बटै । एक जाने १७ बर्षिय बालिका बलात्कार हुइल मने पीडक कुछ दिनमे छुटके गाउँमे घुम्टी रहल पीडितके डाई बटैलै । उहाँ कहली, पीडकहे कुछ दिनमे छोरगिल । हम्रे न्याय नैपैली, मोर छाई अभिन घरसे बाहेर निक्रे नैसेकल हो ।
कार्यक्रममे राष्ट्रिय मानव अधिकार आयोगके प्रकाशदत्त भट्ट कौनोफे घटनाके पीडकहे कानून बमोजिम कार्वाही ओ पीडित न्याय पैना जरुरी रहल बटैलै । उहाँ कहलै, हरेक मानवहे भयरहितमे बाँचे पैना अधिकार बा, कोई गल्टी करल कलेसे सजायके भागिदार हुइना चाही ।
जिल्ला सरकारी वकिल कार्यालयके सहायक जिल्ला न्यायधिवक्ता लोकबहादुर रावल प्रमाण पुगल मुद्दामे कार्वाही कैना सहजुल हुइल बटैलै ।
जिल्ला प्रहरी कार्यालय कैलालीके ज्ञानबहादुर सिहं घटना हुइल बेला समयमे उजुरी कैना आग्रह करलै । उहाँ कहलै, ढिला हुइटी गैलेसे प्रमाणफे मेटना हुइल ओरसे समयमे अइलेसे कार्वाही कैना सहज हुईठ ।
बार एशोसियशन कैलालीके अध्यक्ष नाथुराम महतो आर्थिक अवस्था कम्जोर रहलके मुद्दा निशुल्क हेरेसेक्ना बटैलै । उहाँ १८ जानेक मुद्दा निशुल्क रुपमे कानूनी सहायत कक्षसे हेरल बट्रलै ।
कार्यक्रममे जिल्ला प्रशासन कार्यालयके इश्वरदत्त जोशी, झंकर रावल, ओरेक नेपालके जिल्ला संयोजक गीता चौधरी, माइती नेपालके शिवचरण चौधरीलगायत आपन बाट धारल रहिट ।
