पोषणमे सुधार हुइटी गैल बाः जिसस प्रमुख टीका कुमारी
पहुरा समाचारदाता
धनगढी, २९ जेठ । कैलाली जिल्लाके पाँच स्थानीय तहमे संचालन हुइल पोषण परियोजनाके जिल्ला स्तरीय सामाजिक लेखा परिक्षण तथा छलफल कार्यक्रम शुकके रोज धनगढीमे सम्पन्न हुइल बा ।
केयर नेपाल ओ आइडिईके आर्थिक सहयोग तथा याक नेपालके समन्वय सहकार्यमे कैलाली जिल्लाके कैलारी गाउँपालिका, भजनी नगरपालिका, जानकी गाउँपालिका, घोडाघोडी नगरपालिका ओ गोदावरी नगरपालिकामे संचालित पोषण परियोजनाके जिल्ला स्तरीय सामाजिक लेखा परिक्षण तथा छलफल कार्यक्रम हुुइल हो ।
संस्थाके पूर्व अध्यक्ष तथा सल्लाहकार समितिके संयोजक बलबहादुर रोकायाके अध्यक्षतामे हुइल कार्यक्रममे जिल्ला समन्वय समिति कैलालीके सभापति टीकाकुमारी चौधरी भुल प्रमुख अतिथि रहल रहिट । कार्यक्रममे सम्बोधन करटी पोषणके पहिलेक ओ अब्बेक अवस्था हेरेबेर बहुट फरक हुइल बटैली ।
उहाँ कहली, पहिले ग्रामीणस्तरमे पोषणबारे खास पत्ता नैरहे । अब्बे पोषण जानकारी ओ उहीहे न्यनिकरण कैना उपायबारे जानकारीके साथे साथ सपोटफे करल बा । कौनोफे संस्थामे पारदर्शि, जवाफडेहिताके साथे सुशासन अनिवार्य रहल कहटी उ चाही याक नेपालमे पाइल उहाँ बटैली । पोषण परियोजना महिलाहुकनके आर्थिक रुपमे सशक्तीकरण कैनामे अग्रसर कराइट कहटी सह्रनिय कार्य करटी रहल उहाँ बटैली ।
संस्थाके सल्लाहकार समिति संयोजक बलबहादुर रोकाया यी संस्थासे पोषणके क्षेत्रमे मजा कार्य करटी आइल बटैलै । उहाँ कहलै, यी संस्था पोषण सुधारके ढेर सहयोगफे करल उहाँ जनैलै ।
पोषण परियोजना अधिकृत रुचि रानामगर स्वास्थ्यकर्मीके क्षमता अभिवृद्धि संगे चेकजाँच उपकरणफे सहयोग करल बटैली । उहाँ कैलालीके पाँच स्थानीय तहके १८ स्वास्थ्य चौकीमे काम करटी रहल बटैली ।
याक नेपालके कृषि अधिकृत जनक खनाल पोषण बगैचा निर्माणके लाग प्रत्येक २५ अगुवा कृषकहे रु २० हजारके दरसे किसान कार्ड मार्फत वितरण करल बा । ४५३ जाने छोट लर्कनके डाईनहे किसान कार्ड मार्फत पोषण बगैचा निर्माणके लाग ४ हजारके दरसे वितरण करल उहाँ बटैलै ।
१२५ जाने नयाँ हजार दिनके महिलाहुकनहे पोषण बगैचा कृषक निमार्णके लाग रु ५५ सय के दरसे वितरण करल बा । समुहभिटरके किसान कार्ड नैहुइल महिलाहुकनहे पोषण बगैचा निर्माणके लाग रु १६ सय ५० के दरले ४८ जनहनहे बिउबिजन वितरण करल बा ।
कडा शिघ्र कुपोषण हुइल बालबालिकाहुकनहे पोषण बगैचा निर्माणके लाग कृषि सामाग्री वितरण, रु २५ सय ओ ३ हजारके खाद्य तथा पुरक पोषण सामग्री वितरण करल बा । गर्भवती तथा सुत्केरी महिलाहुकनहे रु २५ सयके बराबरके खाद्य तथा पुरक पोषण सामग्री वितरण करल बा ।
रु ४० हजार बराबरके १० जनहनहे कुखुरा पालनके लाग सहयोग, २३ जाने कडा तथा मध्यम शिघ्र कुपोषण हुइल बालबालिकाहे सरसफाई तथा स्वच्छताके लाग सामग्री हाजिनिक किट १६ जनहनहे फिल्टर वितरण करल बा । १३ विपन्न घरधुरीमे शौचालय निर्माण तथा मर्मतफे करल बा जौन आज अनुगमनफे कैगिल हो ।
उद्यम विकासके ला १ जनहनहे अटो लोडर, गड्यौला मल उत्पादनके लाग ४ जनहनहे तालिम ओ एक जनहनहे सामाग्री सहयोग (१२५०००), अचार उत्पादनके लाग सोलार ड्रायर, जुस पेल्न मेसिन, टमान कृषि सामाग्री, मुल्य अभिबृद्धि प्रशोधन तालिम २ जाने, मिस्त्री (कृषि सामाग्री तथा उपकरण सम्बन्धी) तालिम २ जनहन, सिकाई केन्द्रहे १ लाख बराबर सहयोग करल बा ।
पोषण लेखाजोखा व्यबस्थापन तथा बहिरंग उपचार केन्द्रके सुदृढिकरणके लाग ६ थान सेका स्केल वितरण करल, स्वास्थ्य सेवा गुणस्तर सुधार तथा पोषण सेवा विस्तार कैना, मेडिकल तथा अन्य सरसामाग्री वितरण, बाल भिटा वितरण, अनसाईट कोचिगं करल उहाँ जनैलै ।
कार्यक्रममे प्रस्तुतीकरण कैटी हेमकर्ण विक पोषण परियोजना पाँच पालिका कैलारी गाउँपालिकाके वडा नम्बर ४ ओ ७ मे, भजनीके ५ ओ ७ मे, गोदावरीके ९, ११ ओ १२ मे संचालन हुइल जनैलै । ओस्टेक करके जानकीके २ ओ ९ मे, घोडाघोडीके १, ३, ५,६ ओ ८ नम्बर पोषण परियोजना संचालन हुइल उहाँ जनैलै । कार्यक्रममे याक नेपालके कार्यक्रम संयोजक देवी खनाल संस्थाके बारे प्रस्तुतीकरण करल रहिट ।
याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना मार्फत कार्य क्षेत्र रहल पालिकामे आमा समुह पोषण सुधारके लाग पोषण बगैचा सुरुवाट करल बटैली ।
हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।
याक नेपालसे आमा समु्हमे आवद्ध रहलहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।
पोषण बगैचामे टमान मेरिक हरियार साग, मौसमी तथा वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे माध्यम कुपोषणके केसहे सामान्य अवस्थामे ल्यन्ना मद्दत मिलल उहाँ बटैली ।
कार्यक्रमम पाँचु पालिकासे सहभागिहुक्रे आपन क्षेत्रमे पोषण सम्बन्धी हुइल गतिविधिबारे जानकारी डेनाके साथे आपन क्षेत्रमे पोषणबारेक अनुभव साटासाट करल रहिट ।
कार्यक्रममे स्वागत मन्तव्य संस्थाके उपाध्यक्ष सत्यदेवी स्नेही ओ संचालन संस्थाके सचिव तुल्सी शर्मा करल रहिट । कार्यक्रममे सस्थाके पदाधिकारीहुक्रे, सहयोगी संस्थाके प्रतिनिधिहुकनके सहभागिता रहे ।
