ओरेकके प्राविधिक सहयोगमे लैससास परीक्षण सम्बन्धी कार्यशाला
पहुरा समाचारदाता
धनगढी, २ असार । बझाङ जिल्लाके मष्टा गाउँपालिका ओ कञ्चनपुरके बेलौरी नगरपालिकाके आयोजना तथा महिला पुनस्र्थापना केन्द्र (ओरेक) के प्राविधिक सहयोगमे मष्टा गाउँपालिका ओ बेलौरी नगरपालिकामे लैङिक समानता तथा सामाजिक समावेशीकरण (लैससास) परीक्षण तथा लैङिगक सम्बन्धी २ दिने कार्यशाला सम्पन्न हुइल बा ।
जेठ २५ ओ २६ मष्टा गाउँपालिका उपाअध्यक्ष हर्क धामी ओ जेठ २८ ओ २९ गते बेलौरी नगरपालिकाके नगरप्रमुख पोतीलाल चौधरीके अध्यक्षतामे आयोजित उ कार्यक्रमसे स्थानीय तहमे लैससास अवधारणाबारे साझा बुझाइ अभिवृद्धि कैना, विद्यमान नीति, ऐन तथा कार्यविधिहे लैससास दृष्टिकोणसे समीक्षा कैना ओ समावेशी तथा सहभागितामूलक नीति निर्माण प्रक्रियाहे संस्थागत कैना लक्ष्य राखल रहे ।
कार्यशालाके क्रममे लैससास उत्तरदायी योजना तथा बजेट तर्जुमा प्रक्रियाहे ठप प्रभावकारी बनैना, सेवा प्रवाहमे सक्कु वर्ग तथा समुदायके समान पहुँच सुनिश्चित कैना, लैङिक हिंसा निवारण कोषके प्रभावकारी सञ्चालनके लाग आवश्यक संशोधन कैना, साथे अनुगमन–मूल्याङकन प्रणाली ओ सामाजिक जवाफदेहिता संयन्त्र सुदृढ कैना विषयमे विस्तृत छलफल करल रहे ।
कार्यक्रममे नगर प्रमुख, उप प्रमुख, तथा कार्यपालिका सदस्य, वडाध्यक्ष, विषयगत शाखा प्रमुख, महिला समूह तथा सञ्जालके प्रतिनिधि, नागरिक समाजके प्रतिनिधिलगायत सक्रिय सहभागिता रहल रहे । सहभागीहुक्रे यी कार्यशालासे स्थानीय तहमे लैङिक समानता ओ सामाजिक समावेशीकरणहे संस्थागत करटी उत्तरदायी ओ समावेशी सेवा प्रवाहके आधार तयार कैना महत्वपूर्ण योगदान पुगाइल बटैले रहिट ।
कार्यक्रममे सहजीकरण ओरेकके प्रदेश सपना थापा ओ जिल्ला संयोजक गीता चौधरी करल रहिट ।
