लैङ्गिक तथा यौनिक अल्पसङ्ख्यक समुदायहे सामाजिक पूर्वग्राह ओ विभेद

शिवानी चौधरी
धनगढी, ३ असार । लैङ्गिक तथा यौनिक अल्पसङ्ख्यक समुदायउप्पर सामाजिक पूर्वग्राह ओ विभेद जारी रहल बटागिल बा ।

एकता नेपालके आयोजनामे बुधके रोज धनगढीमे लैङ्गिक तथा यौनिक अल्पसङ्ख्यक समुदाय ओ सञ्चारकर्मी बिच हुइल अन्तरक्रिया कार्यक्रम उ बाट बटागिल रहे ।

एकता नेपालके कार्यकारी निर्देशक राज चौधरी नेपालके संविधान २०७२ मे लैङ्गिक तथा यौनिक अल्पसङ्ख्यक समुदायके लाग टमान हक अधिकार सुनिश्चित करल मने सामाजिक पूर्वग्राह ओ विभेद जारी रहल बटैलै । उहाँ कहली, नागरिक पैना सवालमे होए वा शिक्षा, स्वास्थ्य रोजगारीके सवालमे होए लैङ्गिक तथा यौनिक अल्पसङ्ख्यक समुदाय विभेद खेप्टी आइल बटै ।

लैङ्गिक तथा यौनिक अल्पसङ्ख्यक समुदाय शिक्षा तथा जानकारीमे सीमित पहुँच, रोजगारी तथा आर्थिक अवसरमे असमानता, मानसिक स्वास्थ्यमे असर, सामाजिक बहिष्कारण ओ असुरक्षाके अनुभूति, जीवनस्तर ओ अवसरमे दीर्घकालिन प्रभाव परल निर्देशक राज बटैलै ।

सन २०२३ मे सर्वोच्च अदादतसे समलिङगी विवाहके अस्थायी दर्ताके डगर खुला कैना ऐतिहासिक आदेश डेहल रहे, मने समलिङगी विवाह करुइयाहे समाजसे स्वीकार करे नैसेकल कारण सम्बन्ध विच्छेद कैना अवस्था रहल उहाँ बटैलै । नेपालके संविधान २७२ से लैङिक तथा यौनिक अल्पसंख्यक समुदायके अधिकारहे स्वीकारण् करले बा ओ नागरिक, जनगणना तथा कानूनी पहिचानके क्षेत्रमे कुछ महत्वपूर्ण प्रगती हुइल उहाँ जनैली ।

संविधानके प्रस्तावनासे सामाजिक न्याय सहित सक्कु नागरिकके समान सहभागिताके वाचा करठ । मने, यी प्रगतिशील प्रतिज्ञाके बाबजुदफे लैङ्गिक तथा यौनिक अल्पसंख्यक समुदाय नेपालमे अभिनफे सबसे ढेर बहिष्कृत ओ संस्थागत रूपमे उपेक्षित समूहमध्ये परठै ।

संविधानके धारा ४२ मे ‘आर्थिक, सामाजिक वा शैक्षिक रूपमे पाछे परल महिला, दलित, आदिवासी जनजाति, मधेशी, थारू, मुस्लिम, अल्पसंख्यक, अपांगता हुइल व्यक्ति, लैङ्गिक तथा यौनिक अल्पसंख्यक तथा पाछे परल क्षेत्रके नागरिक’हे राज्यके सक्कु अंगमे समावेशी सहभागिताके हक प्रत्याभूत करल बा ।

नेपाल एशियामे लैङ्गिक तथा यौनिक अल्पसंख्यकके कानूनी मान्यताके दृष्टिकोणसे अग्रणी देश मानजाइठ, लैङिक तथा यौनिक अल्पसंख्यकके नागरिकता, समलैङ्गिक सम्बन्धके गैरअपराधीकरण, अन्तरलिंगी बालबालिकाउप्पर जबर्जस्ती सर्जरी विरुद्धके चेतना आदिमे नेपालसे महत्वपूर्ण कदम चालल बा ।

ओस्टेक करके एकता नेपालके कार्यकारी निर्देशक राज चौधरी प्राइड महिनाके इतिहास बारे जानकारी डेहल रहिट । प्राइड महिना कहल यौनिक तथा लैङ्गिक विविधता रहल व्यक्तिहुकनके अधिकार, सम्मान ओ समानताके लाग हुइल नम्मा संघर्षके विकासक्रम हो, जिहीसे विरोध आन्दोलनसे सुरु हुके आज विश्वव्यापी मानव अधिकार ओ समावेशिताके अभियानके रूपमे लेहल बा ।

कार्यक्रममे एकता नेपालके अध्यक्ष कृति चौधरी, कार्यक्रम अधिकृत सन्दिप भुजेल, रामजनम रानालगागतसे अपनेहुक्रे लैङ्गिक तथा यौनिक अल्पसङ्ख्यक समुदाय हुइलक कारण काम रोजगारीके अवसर गुमाइल, कोठा नैपाइल, यात्रा करेबेर समस्या झेले परल बटैले रहिट ।

ओस्टेक करके भारतीय ट्रान्सजेन्डरहुक्रनके संस्कार सिखके यहाँ दुःख डेटी रहल ट्रान्सजेन्डरहुक्रे करेबर सक्कु दुःख पैटी रहल आशिका चौधरी बटैली । कोठा पैना किल नैहोके इ समुदायके व्यक्ति आपनहे रोजगारी पैना समेत कर्रा रहल बटैले बटै । शरीरके बनावटसे स्वभाव, शैली फरक डेखलपाछे रोजगार प्रदायक काममे नैरख्ना करल उहाँहुक्रनके कहाइ रहल बा ।