यूवा तथा सीमान्तकृत समुदायके सवालमे सरोकारवालासे नीति संवाद
शिवानी चौधरी
धनगढी, ३ असार । नागरिक अधिकार जवाफदेहिता ओ समावेशी सुशासनके सन्दर्भमे वर्तमान परिवेशमे यूवा÷विद्यार्थी तथा टमान सीमान्तकृत समुदायके मुख्य सवालउप्पर सरोकारवालाहुकनसंग नीति संवाद कार्यक्रम कैगिल बा ।
लोकतान्त्रिक सहभागिताको लागि नागरिक संलग्नता प्रवद्र्धन परियोजना संचार प्रतिष्ठान नेपाल तथा युएनडीपीके सहकार्यमे बुधके रोज नीति संवाद कार्यक्रम कैगिल हो । कार्यक्रममे सामाजिक विकास समितिके सभापति धर्मराज पाठक ढेर काम हुइल मने अभिन टमान मुद्दा सम्बोधन कैना बाँकी रहल बटैलै ।
मुक्तकमैया, हलिया कमलरीके लाग ढेर काम मने अभिन कैना बाँकी रहल बटैलै । बन्जरीया मुक्तकमैया बस्तीके ४ सय घरधुरी लालपुर्जा पाकेफे जग्गा नैपाइल बटैलै । कृष्णपुरके छाउगोठमे एक महिलाके सापनके कटाईसे मृत्यु हुइल उहाँ बटैलै । प्रदेश सरकारसे बजेट ल्यानल मने अपनेहुक्रे अभिनसम नैपाइल बटैलै ।
प्रदेश सभा सदस्य घनश्याम चौधरी सिकलसेल एनिमियाके कारण थारु समुदायके बंस ओरैनाहस हुइल बटैलै । सीमान्तकृत समुदायके सरकार काम करलेमे उहीहे परिणाम मुखी बनैना जरुरी रहल बटैलै ।
प्रदेश सभा सदस्य लक्ष्मी विक नीति संगे कार्यविधि बनैना जरुरी रहल बटैली । उहाँ प्रदेश सरकारसे करल मजा कामहे व्यवस्थित बनाई पर्ना बटैली । तथ्यांक बेसमे काम करलेसे प्रतिफल अइना उहाँ बटैली ।
मुक्तकमैया समाजके केन्द्रीय अध्यक्ष पशुपति चौधरी मुक्तकमैया समस्या समाधान नैहुइल बटैलै । उहाँ कहलै, अभिनफे २३ सय ७५ जाने मुक्तकमैया पुनस्र्थापनासे बञ्चित हुइल बटै ।
इन्सेक प्रदेश संयोजक खडकराज जोशी ढेर बरस पहिले जौन समस्या रहे उहे समस्या अभिनफे अइटी रहल बटैलै । उहाँ मुक्तकमैया, हलिया, कमलरी, यूवा तथा अन्य सीमान्तकृत समुदायके पहिले जौन सवाल आए उ अभिनफे अइटी रहल बटैलै । दलित महिला अधिकार मञ्च कैलालीके अध्यक्ष सावित्रा घिमिरे प्रदेश सरकारसे टमान अभियान चलैना कहलेसे उ सार्थकता नैपाइल बटैली ।
कार्यक्रममे भुमि व्यवस्था कृषि सहकारी मन्त्रालयके कानून सचिव राजकुमार झा प्रदेश सरकार पाँच बरसस यूवाहुकनके लाग कृषि कर्जा प्रदान करटी रहल बटैलै । प्रदेश सरकारसे टमान निकाय तथा स्थानीय सरकारसे समन्वय करके सुरक्षित आवास निर्माण कार्य करटी आइल बटैलै । यी बरसफे साढे ३ करोड बजेट विनियोजन करल बट्रैलै ।
सामाजिक विकास मन्त्रालयके सहसचिव लोकेन्द्र भट्ट प्रदेशके सक्कु विद्यालयमे नर्सके व्यवस्था करेपर्ना कहलमे अभिनसम २७ ठो विद्यालयमे व्यवस्था हुइल बटैलै । प्रदेश सरकारसे बादी समुदायके बालबालिकाहुकनके लाग छात्रवृति कार्यक्रमहे निरन्तता डेटी आइलै ।
मुख्यमन्त्री परिषदके कार्यालय सचिव गणेश प्रसाद जोशी मुक्त कमलरीहुकनहे मालिकके घरे छुटाके होस्टेलमे धारके शिक्षा डेहल बटैलै ।
संचार प्रतिष्ठान नेपालके अध्यक्ष हेमकर्ण विक के अध्यक्षतामे हइल कार्यक्रममे प्रदेश सरकारके प्रदेश सभा सदस्य, प्रदेश सचिव, टमान गैरसरकारी संस्था महासंघके प्रतिनिधिहुकनके सहभागिता रहे ।
कार्यक्रममे सहजीकरण लोकतान्त्रिक सहभागिताको लागि नागरिक संलग्नता प्रवद्र्धन परियोजना संचार प्रतिष्ठान नेपालके सचितानन्द जोशी ओ संचालन अग्रज पत्रकार मनमोहन स्वाँर करल रहिट ।
