पहुरा समाचारदाता
धनगढी, ५ असार । एकल तथा सीमान्तकृत समुदायके महिलाहुक्रे गोसिया गुमलपाछे अभिन सामाजिक पीडा भोग्न बाध्य रहल बटैले बटै ।
मानव अधिककारका लागि महिला एकल महिला समुहसे कुर्वे विष्ट्रोके सहयोगमे विफेक रोज धनगढीमे एकल महिला, सीमान्तकृत महिला, द्वन्दपीडित तथा एचआएभी संक्रमित ओ ओइनके छावाछाइके विगत, बर्तमान ओ भविष्यके अवस्था अन्तरपुस्ता संवाद कार्यक्रममे उहाँहुक्रे असिन बटाइल रहिट ।

कार्यक्रमके प्रमुख अतिथि जिल्ला समन्वय समिति कैलालीके सभापति टिकाकुमारी चौधरी भुल महिलाहुकनहे गोसिया गुमाइलके पीडासे कम्जोर बनाइल मने शोकहे शक्तिमे बडल्टी आघे बह्रना आग्रह करली । उहाँ कहली, महिलाहुक्रे आँसु गिराइल बेला दुस्मानसे फाइदा उठैठै । आबसे महिला नैरुके सहासके साथ आघे बह्रे परल ।

जिल्ला समन्वय समिति कैलालीके विमल जोशी युगल जोडीसे एकल हुइल बेला ओइनहे परिवारके साथ सपोट डेहेपर्ना मने पितृ सत्तात्मक सोचके कारण एकल महिला दुःख पैटी रहल बटैलै । महिलाहुक्रे आँस गिरैना कहल अपनही कम्जोर बनैना हो उहाँ कहलै । अब्बे सीपमुलक तालिम प्रदान करेबेर आवश्यकताके आधारमे डेहे पर्ना उहाँ बटैलै ।

धनगढी–१ के वडा अध्यक्ष सन्तोष मुडभरी पीडाहे शक्तिमे बडलके आघे बह्रना जरुरी रहल बटैलै । पहिले पहिले एकल महिलाहुकनहे फरक दृष्टिकोणसे हेरल मने अब्बे उ अवस्था नैरहल बटैलै ।

वडा सदस्य यशोदा भण्डारी एकल महिलाहुकनहे आपन बच्चनके आघे कबु नैरुइना आग्रह करली । एकल महिला हुइलके पीडा अपनेफे भोगल कारण दुनियाके पाछे नैलागके निस्फीक्र आघे बह्रना उहाँ बटैली । दुसर वडा सदस्य माया भण्डारी एकल महिलाहुकनके लाग सरकार नीति बनाके ओइनके आयआर्जन तथा सीपमुलक कार्यक्रम ल्यन्ना जरुरी रहल बटैली ।
गैसस महासंघ प्रदेश अध्यक्ष देवी खनाल कानूनमे एकल महिलाके ढेर व्यवस्था करले बा । उहे अनुसार सेवा सुविधा पाई पर्ना बटैलै ।

एकल महिलाके छाई दिपिका कहली बाबा गुमाइलपाछे समाजसे अपहेल्ना भोगे पर्ना अवस्था आइल । आर्थिक अवस्था कम्जोर हुइल कारण एक बरस पह्राई छोरेपरल ओ अब्बेफे पह्राई खर्च जुटैना विदाके दिन मजदुरी करेपर्ना अवस्था बा । उहाँ अपने भारी संघर्ष करके पह्रटी रहल ओरसे भविष्यमे नेपाली सेनाके जागिर खैना सोख रहल बटैली ।

एकल महिला महिला छाई प्रतिक्षा केसी एकल महिलाके लाग सरकारसे सीपमुलक आयमुलक कार्यक्रम ल्यानेपर्ना बटैली ।
एकल महिला रन्जिता गौतम एकल हुइलपाछे पारिवारीक साथ सपोट पाईपर्नामे उल्हे हेल्हा करल अवस्था रहल बटैली । उहाँ कहली, गोसिया गुमलपाछे अंश बण्ड नैहुइल हो ।

शान्ती महत एकल महिलाके जन्म गोसिया विटलसंगे हुइना करल बटैली । फुलमति डगौराथारु एकल महिलाभिटर सीमान्तकृत महिलाके समस्या झन ढेर रहल बटैली । पहिले पहिले कुछ पत्ता नैरहल मने अब्बे हकअधिकारबारे पत्ता पैटी रहल बटैली ।
अस्मिता पुन मगर अपन छोटमे भोज हुइल ओ संकटकालमे गोसिया गुमाइलसंगे लर्कनहे बहुट समस्याके बाबजुट पह्राइल बटैली । अब्बे ओइनहे कुछ रोजगारी पैलेसे कुछ राहत हुइना बटैली ।

मानव अधिकारका लागि महिला एकल महिला समुह सुदूरपश्चिम प्रदेश अध्यक्ष भगवती हमालके अध्यक्षतामे हुइल कार्यक्रममे सहजीकरण मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी करल रहिट ।
अन्तरपुस्ता संवाद कार्यक्रममे जीवन अनुभव ओ संघर्षके कथा द्वन्द तथा सामाजिक विभेदके अनुभव, संघर्षसे सिखल पाठ,
पुस्ताविच अनुभव आदानप्रदान, पुस्ताविचके सम्बन्ध ओ समझदारी, अभिभावक ओ सन्तानविच संवाद, एक दुसरके भावना ओ अपेक्षा बुझना तरिका, परिवारिक सम्बन्ध सुदृढीकरणबारे अन्तरक्रिया हुइल रहे ।

ओस्टेक करके महिला तथा बालबालिकाके अधिकारमे एकल, द्धन्द्ध पीडित, सीमान्तकृत महिलाके अधिकार, बालअधिकार तथा संरक्षण समान अवसर ओ सामाजिक न्याय, शिक्षा, सीप ओ रोजगारी युवाहुकनके शिक्षा, करियर योजना, स्वरोजगार तथा उद्दमशिलता सीप विकासके अवसरबारे संवाद हुइल रहे ।

मानसिक स्वास्थ्य ओ मनोसामाजिक सहयोगमे द्धन्द्ध तथा हिंसाके असर, तनाव व्यवस्थापन, आत्मविश्वास ओ सकारात्मक सोच, लैङ्गिक समानता तथा समावेशिकरणमे लैङ्गिक विभेदके चुनौती, समावेशी समाज निर्माणमे युवाके भुमिकाबारेफे संवाद कैगिल रहे ।

शान्ति, मेलमिलाप, ओ सामाजिक एकता ओर शान्ति निर्माणमे महिलाके भुमिका, समुदायमे सहकार्य ओ सदभाव, द्धन्द्धके पुनरावृत्ति रोक्न युवाके योगदान, स्थानीय सरकार ओ सेवामे पहँुच ओर सामाजिक सुरक्षा कार्यक्रम, शिक्षा स्वास्थ्य, ओ न्याय सेवामे पहँुच स्थानीय तहसंग समन्वयबारे संवाद हुइल रहे ।

ओस्टेक करके भविष्यके सपना ओ अवसरमे युवाके आकाक्षा ओ लक्ष्य, अभिभावकके अपेक्षा, साझा भविष्य निर्माणके उपाय, कार्य योजना निर्माणमे पहिचान हुइल समस्याके समाधान, समुदायस्तरमे करे सेक्ना पहल, जिम्मेवारी ओ प्रतिवद्धता निर्धारणबारे संवाद कैगिल रहे ।