महिलाउप्पर हुइना लैङिगक हिंसा न्यूनीकरणके लग अभिमुखिकरण कार्यक्रम
शिवानी चौधरी
धनगढी, ६ असार । महिलाउप्पर हुइना लैङिगक हिंसा ओ डिजिटल हिंसा न्यूनिकरणके लग सहभागिता अभिवृद्धि ओ सुशासनके प्रभावकारी जवाफदेहिता अभिमुखिकरण कार्यक्रम शनिच्चरके रोज धनगढीमे सम्पन्न हुइल बा ।
मानव अधिकारका लागि महिला एकल महिला समुह के आयोजना तथा कुर्वे विष्ट्रो के सहयोगमे महिलाउप्पर हुइना लैङिगक हिंसा ओ डिजिटल हिंसा न्यूनिकरणके लग सहभागिता अभिवृद्धि ओ सुशासनके प्रभावकारी जवाफदेहिता अभिमुखिकरण कार्यक्रम हुइल हो ।
समुहके अध्यक्ष मिना भण्डारी के अध्यक्षतामे हुइल कार्यक्रममे गैसस महासंघ सुदूपश्चिम प्रदेश सचिव नरेश प्रसाद ओझा प्रमुख अतिथि रहल रहै । कार्यक्रममे उहाँ अधिकारके क्षेत्रमे बहुट काम हुइल मने जटरा हुइक पर्ना रहे ओटरा नै हुइल बटैलै । अब्बे सम अवस्था हेरे बेला प्रधानमन्त्रिसे लैके राष्ट्रपतिसम महिलाके सहभागिता हुइल मने उहाँ हुक्रे महिलाके लग कत्र आवाज उठैनै, कत्र काम करलै ओकार मुल्याङकन करलै हेरेक पर्ना जरुरी बा ।
संविधानमे महिला हुकन हरेक निकायमे ३३ प्रतिशत सुनिश्चित करल मने अर्थपूर्ण सहभागिता नैहुइल उहाँ बटैलै । धर्म सस्कृतिके करण महिला उप्पर हिंसँ हुइल बटैलै ।
नेपाल महिला संघके जिल्ला अध्यक्ष शारदा सुनाम यी कार्यक्रमसे महिलाहुकनके हकअधिकार आवाज उठान हुइल बटैले बटी । महिलाहुक्रे अभिनफे बहुट पाछे रहल कहटी राज्यसे बनाइल नीति नियम कानून कार्यान्वयन नैहुइल बटैली । महिलाहुकनहे आघे बह्राइक लाग ओइनके लाग निश्चित कोटा, निश्चित क्षेत्र घोषणा करेपर्ना बटैली । पितृ सत्तात्मक सोच परिवर्तनके लाग घरसे सुरु करके समाजसम फैलाईपर्ना बटैली ।
थाकसके केन्द्रीय उपाध्यक्ष प्रभातकुमार चौधरी थारु समुदायके धार्मिक परम्परानुसार विभेद कम रहल बटैलै । महिला उप्पर अभिनफे दाइजो नैल्यानल कारण भारी ंिहसा हुइटी रहल बटैलै । कार्यक्रममे इन्सेक प्रलेख अधिकृत कृष्ण विक लैङिक हिंसा न्यूनिकरणके लाग सक्कु जाने लागेपर्ना बटैलै ।
कार्यक्रममे ओरक नेपालके जिल्ला संयोजक गीता चौधरी बह्रटी महिला तथा बालिका उप्पर हुइना हिंसाके बर्तमान अवस्थाबारे पत्रकार उन्नती चौधरी डिजिटल हिंसाबारे प्रस्तुतीकरण करल रहिट । कार्यक्रमके संचालन मानव अधिकारका लागि महिला एकल महिला समुहके प्रदेश कार्यक्रम अधिकृत वेद अवस्थी करल रहिट ।
