धनगढी उपमहानगरके बजेट २ अर्ब ६४ करोड, पूर्वाधार ओ रोजगारीहे प्राथमिकता

पहुरा समाचारदाता
धनगढी, ७ असार । धनगढी उपमहानगरपालिकासे आगामी आर्थिक वर्ष २०८३/८४ के लाग २ अर्ब ६४ करोड ६४ लाख ६४ हजार ४६४ रुप्याके बजेट सार्वजनिक करले बा । अँटवारके बैठल नगरसभाके १५औँ अधिवेशनमे उपप्रमुख कन्दकलाकुमारी रानासे बजेट प्रस्तुत करटी चालुओर १ अर्ब ४३ करोड ६३ लाख ७ हजार ७१ रुप्या ओ पुँजीगतओर १ अर्ब २३ करोड ७६ लाख ६८३ रुप्या विनियोजन करल जानकारी डेली ।

बजेटके स्रोतमे आन्तरिक आयसे ५५ करोड १० लाख, राजस्व बाँडफाँडसे ६० करोड ४५ लाख ३६ हजार २०६, नेपाल सरकारसे वित्तीय हस्तान्तरणमार्फत १ अर्ब ६ करोड ७९ लाख ७ हजार, प्रदेश सरकारसे १४ करोड २२ लाख ७ हजार तथा चालु आर्थिक वर्षके बचतसे ४२ करोड ३० लाख २१ हजार २४८ रुप्या प्राप्त हुइना अनुमान करल बा ।

उपप्रमुख रानाके अनुसार आर्थिक वर्ष २०८१/८२ मे विनियोजित २ अर्ब १६ करोड २९ लाखमध्ये १ अर्ब ६४ करोड ३५ लाख ८४ हजार खर्च हुइल रहे । चालु आर्थिक वर्ष २०८२/८३ मे अनुमानित २ अर्ब ५६ करोड ४ लाख ६६ हजार बजेटमध्ये जेठ मसान्तसम १ अर्ब ७७ करोड ४९ लाख ५१ हजार १४३ रुपैयाँ प्राप्त हुके १ अर्ब १९ करोड ९४ लाख ६५ हजार ७४२ रुप्या खर्च हुइल उहाँ बटैली ।

आगामी वर्षके लाग वडा स्वास्थ्य क्लिनिक सुदृढीकरण, ‘पढ्दै सिक्दै’ कार्यक्रममार्फत विद्यार्थीहे सीपमूलक शिक्षा, नगर गौरवके आयोजना सञ्चालन, दीगो तथा वातावरणमैत्री पूर्वाधार विकास, सिप तथा रोजगार मेला, सडक बत्ती व्यवस्थासँगे मध्यकालीन बजार ओ रात्रीकालीन पर्यटन प्रवद्र्धनहे प्राथमिकता डेहल बा ।

ओस्टे, समुदायिक विद्यालय शैक्षिक गुणस्तर सुधार कार्यक्रम, आमा बचाउ कार्यक्रम, ग्रासरुट लेभल फुटवल ओ क्रिकेट विकास कार्यक्रम, सामुदयिक विद्यालयके शुक्रबारीय सीप विकास कार्यक्रमहे आगामी वर्षफे निरन्तरता डेहल बा ।

उपमहानगरपालिकासे हरियाली प्रवद्र्धन कार्यक्रम, हाम्रो धनगढी, सफा धनगढी अभियान, हाम्रो सुदूरपश्चिम, हामी चिनाउँछौँ अभियान, उज्यालो धनगढी अभियानहे निरन्तरता डेना हुइल बा ।

ओस्टेक करके, विशेषज्ञ वडा स्वास्थ्य क्लिनिक कार्यक्रम, जहाँ खाली, त्यहाँ हरियाली कार्यक्रम, हर घडी, नगर प्रहरी अभियानहे उपमहानगरपालिकासे निरन्तरता डेना हुइल बा । आगमी आर्थिक वर्षसे हाल फूलवारी–धनगढी–अत्तरिया रुटमे सञ्चालनमे रहल नगर बस सेवा विस्तार हुइना हुइल बा । उपमहानगरपालिकासे धनगढी–कनरी–रामपुर– चौमाला, धनगढी–पथरी–बनबेहडा ओ धनगढी–बेली–जुगेडा–घूईयाँघाट–बंगरा ओ धनगढी–घोडसुवा–स्याउले रूटमे नगर बस सेवा विस्तार कैना हुइल बा ।

बजेट प्रस्तुत कैना आघे अँटवारके बैठल बैठकसे नगरसभाके १५ औं अधिवेशनमे उपप्रमुख रानासे आगामी आर्थिक वर्षके नीति तथा कार्यक्रमफे सार्वजनिक करल रही ।