मानव अधिकार सहायता कक्ष सवलीकरण, व्यवस्थापन, परिचालन समितिके बैठक सम्पन्न

पहुरा समाचारदाता
धनगढी, ९ असार । अनौपचारिक क्षेत्र सेवा केन्द्र(इन्सेक) सुदूरपश्चिम प्रदेश कार्यालय, धनगढीके आयोजनामे मानव अधिकार सहायता कक्ष सवलीकरण, व्यवस्थापन, परिचालन समितिके बैठक धनगढीमे सम्पन्न हुइल बा ।

मानव अधिकार सहायता कक्षमे टमान हिंसासे पीडित महिला बालिका, अपाङ्गता हुइल पीडितहुकनहे न्यायमे सहज पहुँचके लग पीडित पक्षसे देहल निवेदनके आधारमे १० हजार रुपयाँके दरसे १२ जाने पीडितहे सहयोग करल फाइल अनुमोदन कैना उद्देश्यसे बैठकके आयोजना करल हो ।

इन्सेक प्रदेश संयोजक खडकराज जोशीसे टमान हिंसाके पीडितके न्यायके लग सहयोग करल मुद्दाके निरन्तर अनुगमन ओ फ्लोअप करेक पर्ना ओ पीडितके न्यायके लग सरोकारवाला निकाय प्रहरी, सरकाररी वकिल ओ अदालतसंग सामुहिक छलफल करके नैतिक दवाव देना आवश्यक रहल बटैलै ।

उहाँसे पीडितहे सहयोग कैना अन्य संघसंस्थाके कोष फे इहे मानव अधिकार सहायता कक्षमार्फत सहयोग करटी एक जाने पीडितसे एक ओ एक से ढेर संस्थासंग सहयोग लेना नैपैना ओ नैदोरैना ओ पीडित मैत्री हुइल मानव अधिकार सहायता कक्षमे सहयोगके लग सिफारिस कैना सक्कु संघ संस्थाहे फे मुद्दाके अनुगमन ओ फ्लोअप करटी मानव अधिकार सहायता कक्षमे जानकारी करेक पर्ना बटैलै ।

गैरसरकारी संघ संस्थाके प्रदेश अध्यक्ष तथा मानव अधिकार सहायता कक्ष सवलीकरण, व्यवस्थापन, परिचालन समितिके संयोजक देवीप्रसाद खनालसे सन् २०२६ जनवारी से २०२६ जुन् सम १२ जाने घरेलु ओ यौन हिंसा घटनाके पीडितहे कानुनी सहायताके लग सहयोग करके जेम्ने तीन जाने यौन हिंसामे परल बालिका शारीरिक ओ बौद्धिक अपाङ्गता हुइल पीडितहे सहयोग करल बटैलै ।

राष्ट्रिय मानव अधिकार आयोगके मानव अधिकार अधिकृत विदेशराम चौधरीसे एक्के घरेक दुई दिदी बहिनीया एक्के जाने व्यक्तिसे पीडित हुइल ओ घरके आर्थिक अवस्था फे दयनिय रहल ओरसे पीडित परिवारके जिविकोपार्जनमे ओ आवश्यकताके आधारमे सहयोग कैदेना मानव अधिकार सहायता कक्षहे अनुरोध करल बटै ।

उहाँ पीडित बालिकाहुकनके संरक्षणके लग टमान निकायसंग छलफल करटी रहल ओ मानव अधिकार सहायता कक्षसे फे पहल कैदेना आग्रह करलै ।

दलित महिला अधिकार मंचके सृजना पराजुलीसे पीडितहे सहयोग करेबेर डिसीए परियोजनाके कार्यक्षेत्र से बाहिरके वर्ग, क्षेत्र, भौगोलिक अवस्था हेरके सहयोग करेक पर्ना ओ दलित महिला अधिकार संचसे संचालन करल डिसीए परियोजनाके निर्देशिकाके बारेमे सहयोगी संस्थासंग छलफल कैके सहयोगके दायरा बढाइक लग छलफल कैना बटैलै ।

राष्ट्रिय अपाङ्गग महासंघके प्रतिनिधि नरदिप धामीसे कञ्चनपुर, बेलौरी नगरपालिका—१ मे छोटसे बाँधके धारल बौंद्धिक अपाङ्गता हुइल व्यक्तिके अनुगमन करटी सहयोग ओ उद्धार कैना पर्ना बटैलै ।