लागुऔषधसहित ६ जाने पक्राउ
पहुरा समाचारदाता
धनगढी, ८ सावन । कैलाली ओ दार्चुलासे अवैध लागु औषधसहित ६ जाने पक्राउ कैगिल बा ।
कैलालीके धनगढी उ.म.न.पा.४ बोराडाँडीसे अवैध लागुऔषध खैरो हेरोइन १ ग्राम ६५ मिलिग्राम सहित ३ जनहनहे प्रहरी पक्राउ करले बा ।
पक्राउ परुइयामे जिल्ला बैतडी, सुर्नया गा.पा.३ घर हुके हाल धनगढी उ.म.न.पा.४ कोठा करके बैठना बर्ष २८ के दिपक ऐरी, जिल्ला बैतडी, दोगडा केदार गा.पा.६ घर हुके हाल धनगढी उ.म.न.पा.४ कोठा करके बैठना बर्ष ३१ के हेमन्त कार्की ओ गोदावरी न.पा.१ बैठना बर्ष ३२ के सम्भु भट्ट रहल बटै ।
लागुऔषध नियन्त्रण व्युरो शाखा कार्यालय धनगढी ओ अस्थायी प्रहरी पोष्ट चटकपुर, कैलालीसे संयुक्त रुपमे खटल प्रहरी शंका लागके चेकजाँच करेबेर उ पदार्थ फेला पारके उ पदार्थ सहित पक्राउ करल बा ।
ओस्टेक करके कैलाली धनगढी उ.म.न.पा.८ कान्तिपुर टोलसे अवैध लागुऔषध खैरो हेरोइन ३ ग्राम ६१४ मिलिग्राम सहित २ जनहनहे प्रहरी पक्राउ करले बा ।
पक्राउ परुइयामे उहे उ.म.न.पा.७ बैठना बर्ष १९ के महेश राना ओ कैलारी गा.पा.७ घर रहल हाल कान्तिपुर टोल डेरा करके बैठना १७ वर्षिय किशोरी रहल बटै । लागुऔषध सेवन करटी बटै कना सूचनाके आधारमे जिल्ला प्रहरी कार्यालय कैलालीसे खटल प्रहरीसे १७ वर्षिय किशोरीके कोठा खानतलासी करेबेर उ पदार्थ फेला पारके उ पदार्थ सहित पक्राउ करले बा ।
ओस्टेक करके दार्चुला मालिकार्जुन गा.पा.८ धामिगडा स्थित उहे ठाउँ बैठना बर्ष ६० के गगन सिह बोहरासे सञ्चालन करल भगवती खुद्रा पसलसे १३० ग्राम लागुऔषध चरेश ओ १५१ ग्राम गाँजा सहित प्रहरीसे पक्राउ करले बा ।
जिल्ला प्रहरी कार्यालय दार्चुलासे खटल प्रहरी टोलीसे उहाँसे सञ्चालन करल पसलमे खानतलासी करेबेर पसल भिटर नुका छिपाके धारल अवस्थामे उ पदार्थ फेला पारके हुकहिनहे पक्राउ करले बा ।
