नेत्रज्योति कृषि सहकारीके १४औँ स्थापना दिवस

पहुरा समाचारदाता
चौतारा, ११ सावन । सिन्धुपाल्चोक जिल्ला चौतारा साँगाचोकगढी नगरपालिका वडा नं १४मे प्रधान कार्यालय रहल नेत्रज्योति कृषि सहकारी संस्था लिमिटेडसे अपन १४औँ स्थापना दिवस तथा वार्षिक साधारण सभा बर पिपल लगाके सम्पन्न करले बा ।

चैतारा साँगाचोकगढी नगरपालिकाका नगर प्रमुख कृष्ण प्रसाद सापकोटासे बरके बिरुवा ओ वडा अध्यक्ष उद्धब नेपालसे पिपलके बिरुवा लगाके स्थापना दिवस तथा साधरण सभाके शुभारम्भ करल रहिट । चौतारा साँगाचोकगढी नगरपालिका १४ मे रहल थान्बारेगढी जन्मत्सोव पार्क घमाने डाँडामे हुइल सहकारी सस्थासे स्थापना दिवसके अवसरमे वातावरण संरक्षणके सन्देश प्रवाह करटी वर ओ पिपलके बिरुवा रोपण करके कार्यक्रमके शुभारम्भ करल हो ।

चौतारा साँगाचोकगढी नगरपालिकाके नगरप्रमुख कृष्णप्रसाद सापकोटाके प्रमुख आतिथ्यता तथा १४ नं वडाके वडाके अध्यक्ष उद्धव नेपालके विशेष आतिथ्यतामे सम्पन्न कार्यक्रममे जिल्ला बार इकाई सिन्धुपाल्चोकके अध्यक्ष भूपेन्द्र थिङ, नेपाल राष्ट्रिय वन उपभोक्ता महासङ्घके जिल्ला अध्यक्ष जनक गिरी, जनमिलन बचत तथा ऋण सहकारी संस्थाके अध्यक्ष शेरबहादुर श्रेष्ठ तथा जनहित दुग्ध उत्पादन सहकारी संस्थाके अध्यक्ष बद्रीप्रसाद नेपाललगायतसे कार्यक्रमके शुभकामना डेहल रहिट ।

कार्यक्रमहे सम्बोधन करटी प्रमुख अतिथि नगरप्रमुख कृष्णप्रसाद सापकोटासे सहकारीहुक्रे स्थानीय आर्थिक समृद्धिके महत्वपूर्ण आधार रहल बटैलै । उहाँ सहकारीसे कृषि उत्पादन वृद्धि, रोजगारी सिर्जना ओ ग्रामीण अर्थतन्त्रहे सुदृढ बनैना उल्लेखनीय योगदान पुगैटी आइल उल्लेख करलै ।

राष्ट्रिय कलाकार पहलमान स्व लालबहादुर खातीके ओ पण्डीत बिद्यापती सापकोटाके सालिक समेत धारके बनाइल जन्मत्सोव पार्क अतिरमणीय हुइल बटैटी यी नगरके केल्ह नाही राष्ट्रके पहिचान डेना सम्पति रहल बटैलै । उहाँ सहकारी संस्थासे उत्पादन, उत्पादकत्व ओ बजार व्यवस्थापनमे थप प्रभावकारी भूमिका निर्वाह करेपर्नामे उहाँ जोड डेलै ।

विशेष अतिथि वडा अध्यक्ष उद्धव नेपालसे स्थानीय स्तरमे कृषि क्षेत्रके विकासमे नेत्रज्योति कृषि सहकारीसे विगत १४ वर्षसे खेलल भूमिका प्रशंसनीय रहल बटैलै । उहाँ सहकारीले सदस्यके आर्थिक तथा सामाजिक सशक्तीकरणमे निरन्तर काम करटी आइल कहटी अइना दिनमेफे संस्थासे नवीन कार्यक्रम आघे बह्राई पर्ना धारणा रख्लै ।

ओस्टेक करके शुभकामना मन्तव्य रख्टी जिल्ला बार इकाईके अध्यक्ष भूपेन्द्र थिङ सहकारी संस्थासे कानुनी सुशासन, पारदर्शिता ओ जवाफदेहिताहे आत्मसात् करटी आघे बह्रेपर्ना बटैलै । नेपाल राष्ट्रिय वन उपभोक्ता महासङ्घके जिल्ला अध्यक्ष जनक गिरीसे कृषि ओ वातावरण एकदुसरके परिपूरक हुइल उल्लेख करटी स्थापना दिवसमे करल वृक्षारोपणसे सकारात्मक सन्देश डेहल बटैलै ।

जनमिलन बचत तथा ऋण सहकारी संस्थाके अध्यक्ष शेरबहादुर श्रेष्ठसे सहकारीबीचके सहकार्यसे स्थानीय स्तरमे आर्थिक गतिविधि विस्तार कैना मद्दत पुग्न धारणा व्यक्त करलै ।

ओस्टे, जनहित दुग्ध उत्पादन सहकारी संस्थाके अध्यक्ष बद्रीप्रसाद नेपालसे उत्पादनमूलक क्षेत्रमे केन्द्रित सहकारीहे प्रोत्साहन कैना राज्यसे विशेष नीति अवलम्बन करेपर्ना आवश्यकता औँल्यइलै ।

साधारण सभामे संस्थाके पदाधिकारीसे आर्थिक वर्ष २०८२÷८३ के वार्षिक प्रगति प्रतिवेदन, आय–व्यय विवरण तथा आगामी आर्थिक वर्षके लाग प्रस्तावित कार्यक्रम ओ योजना प्रस्तुत करल रहिट । प्रस्तुत प्रतिवेदनउप्पर सदस्यबीच विस्तृत छलफल हुइल रहे ।

सहभागीसे संस्थाके कार्यसम्पादनप्रति सकारात्मक प्रतिक्रिया जनैटी कृषि क्षेत्रसँग सम्बन्धित थप सीपमूलक तालिम, उत्पादनके बजारीकरण तथा सदस्यके क्षमता विकासमे ध्यान डेना सुझाव डेहल रहिट ।

वि.सं. २०६९ सालमे स्थापना हुइल नेत्रज्योति कृषि सहकारी संस्था स्थानीय कृषकहुकनहे संगठित करटी कृषि उत्पादनमे आत्मनिर्भरता, सदस्यहुकनके आयस्तर वृद्धि तथा सहकारी अभियानहे बल्गर बनैना सक्रिय रहटी आइल बा । संस्थासे समय–समयमे कृषि प्रविधि हस्तान्तरण, चेतनामूलक कार्यक्रम तथा सामुदायिक गतिविधिसे सञ्चालन करटी आइल जनैले बा ।
स्थापना दिवसके अवसरमे करल वर ओ पिपलके वृक्षारोपणहे सहभागीहुक्रे वातावरण संरक्षण ओ भावी पुस्ताप्रतिके उत्तरदायित्वसँग जोरटी प्रशंसा करल रहे । पछिल्का समय जलवायु परिवर्तनके असर बह्रटी रहल बेला यैसिन कार्यक्रमसे समाजमे सकारात्मक सन्देश प्रवाह कैना विश्वास व्यक्त करल रहे ।

कार्यक्रममे सहकारीके शेयर सदस्य, स्थानीय बुद्धिजीवी, समाजसेवी तथा सर्वसाधारणके उल्लेख्य सहभागिता रहल रहे । सहकारीके १४ वर्षे यात्राहे स्मरण करटी सहभागीहुक्रे आगामी दिनमे संस्थासे अझ प्रभावकारी, पारदर्शी ओ सदस्यकेन्द्रित सेवा प्रदान करटी जिल्लामे उदाहरणीय सहकारीके रूपमे स्थापित हुइना विश्वास व्यक्त करल रहिट । सस्थाके अध्यक्ष कृष्ण बहादुर नेपालके अध्यक्षतामे हुइल कार्यक्रममे हलगोरु पलल कृषक रामबहादुर सार्की बाँझ जग्गामे खेती करल भारी चोकबहादुर बस्नेत , राम्चे सामुदायक बनके अध्यक्ष बलराम बस्नेतहे सम्मान करल रहे ।

सस्थाके सचिब धनकुमार नेपालसे स्वागत मन्तब्य राखल रहिट कलेसे व्यवस्थापक नेत्रबहादुर बस्नेतसे कार्यक्रम सञ्चालन करल रहिट । उपस्थित अतिथीहुकनहे सस्थाके कोषाध्यक्ष सिता बानीया ओ सदस्य रेखा नेपालसे स्वागत करल रहिट ।